ەلباسى ەلشىلەردى قابىلدادى

1094
0
بولىسۋ:

اقوردادا ەلباسى بىرقاتار مەملەكەتتەردىڭ جاڭا ەلشىلەرىنەن سەنىم گراموتالارىن قابىلدادى. راسىم بارىسىندا قازاقستان پرەزيدەنتى نۇرسۇلتان نازارباەۆقا شۆەتسييا كورولدىگىنىڭ ەلشىسى ماتس فويەر, كۋبا ەلشىسى ەميليو پەۆيدا پۋپو, ۇندىستان ەلشىسى پرابحات كۋمار, ۇلىبريتانييا جانە سولتۇستىك يرلاندييا قۇراما كورولدىگىنىڭ ەلشىسى مايكل دجون گيففورد وز ەلى اتىنان سەنىم گراموتاسىن تاپسىردى.
مەملەكەت باسشىسى راسىمگە قاتىسۋ­شىلاردى قازاقستانداعى ديپلوماتييالىق ميسسييالارىنىڭ رەسمي تۇردە باستالۋىمەن قۇتتىقتاپ, ولاردىڭ جاۋاپتى ارى مار­تەبەلى قىزمەتتەرى ەلدەرىمىز اراسىنداعى ىنتىماقتاستىقتى جان-جاقتى دامىتۋعا سەپتەسەرىنە سەنىم بىلدىردى.
– سىزدەردىڭ جۇمىستارىڭىز قىزىقتى جانە جاۋاپتى كەزەڭگە تۇسپا-تۇس كەلىپ وتىر. بۇگىندە الەم جاھاندىق وزگەرىستەر جولىنا تۇستى. تەحنولوگييالىق رەۆوليۋتسييا جاڭا سىن-قاتەر اكەلۋمەن قاتار, كەز كەل­گەن ەلدىڭ دامۋىندا سەرپىلىس جاساۋعا مۇم­كىندىك بەرەدى. سوندىقتان قازاقستان حال­قىنا «تورتىنشى ونەركاسىپتىك رەۆوليۋتسييا جاعدايىنداعى دامۋدىڭ جاڭا مۇمكىن­دىك­تەرى» اتتى جولداۋىمدى جارييالادىم, – دەدى نۇرسۇلتان نازارباەۆ.
قازاقستان پرەزيدەنتى الەمنىڭ وزىق دامىعان 30 ەلىنىڭ قاتارىنا قوسىلۋدى جە­دەلدەتۋ ۇشىن قاجەتتى زاماناۋي تەحنولو­گييالاردى پايدالانۋدىڭ ماڭىزدىلىعىن اتاپ وتتى. سونىمەن بىرگە, بيىلعى جول­داۋدا ەكونوميكانى, الەۋمەتتىك سالانى, سونداي-اق مەملەكەتتىك باسقارۋ ىسىن دامىتۋدىڭ نەگىزگى باعىتتارى بويىنشا ناقتى ون مىندەت قويعانى تۋرالى ەلشى مىرزالاردى قۇلاعدار ەتتى.
– بۇل مىندەتتەردى شەشۋ زاماناۋي تەحنولوگييالاردى پايدالانۋدى كوزدەيدى. جاڭا تسيفرلىق داۋىرگە تابىستى بەيىم­دەلۋ, وزىق دامىعان 30 ەلدىڭ قاتارىنا قو­سىلۋ ماسەلەسىنە كومەكتەسەدى. سول ۇشىن بىزدە «تسيفرلى قازاقستان» مەملەكەتتىك باع­دارلاماسى قابىلدانىپ, ىسكە اسىرى­لۋدا. ول ەكونوميكا مەن تىرشىلىكتىڭ بار­لىق سالاسىن قامتيدى, – دەدى ن.نازارباەۆ.
مەملەكەت باسشىسى قازاقستاننىڭ حالىقارالىق ارەنادا بەلسەندى پوزيتسييا ۇستانىپ كەلە جاتقانىن ايتىپ, بۇل بىزگە ەڭ وزەكتى جاھاندىق جانە وڭىرلىك پروبلە­مالاردى شەشۋگە مۇمكىندىك بەرەتىنىنە ەكپىن تۇسىردى. سونىڭ ىشىندە تۇراقتىلىق پەن قاۋىپسىزدىكتى نىعايتۋعا, وركەنيەتتەر ديالوگىن ىلگەرىلەتۋگە ەرەكشە ۇلەس قوسۋعا جاعداي جاسايدى.
ەلباسى 2017 جىلى استانادا وتكەن بىر­قاتار ىرى ىس-شارانىڭ ناتيجەلەرىنە نازار اۋداردى. ولاردىڭ قاتارىندا يميدجدىك تۇرعىدان عانا ەمەس, سونداي-اق ەكونوميكالىق تۇرعىدان وڭ اسەرى بولعان حالىقارالىق EXPO – 2017 ماماندان­دىرىلعان حالىقارالىق كورمەسى, شانحاي ىنتىماقتاستىق ۇيىمى سامميتى مەن يسلام ىنتىماقتاستىعى ۇيىمىنىڭ عىلىم جانە تەحنولوگييالار جونىندەگى تۇڭ­عىش سامميتى اتالدى.
– سيريياارالىق قاقتىعىستاردى رەت­تەۋدىڭ جاڭا تەتىگى رەتىندەگى استانا پروتسەسى اياسىنداعى وڭ ناتيجەلەر بىزدىڭ ەلدىڭ دەر­بەس جانە بەيتاراپ الاڭ رەتىندە تاڭدا­لۋىنىڭ دۇرىستىعىن كورسەتتى جانە ونى الەمدىك قوعامداستىق مويىندادى, – دەدى قازاقستان پرەزيدەنتى.
مەملەكەت باسشىسى بيىلعى قاڭتار ايىندا قازاقستاننىڭ بۇۇ قاۋىپسىزدىك كەڭەسىنىڭ توراعاسى رولىندەگى تاريحي قىز­مەتىنە كىرىسكەنىنە نازار اۋدارتا كەلە, توراعا رەتىندە قاراستىراتىن ماسەلەلەرىنە جان-جاقتى توقتالىپ, جاھاندىق ورگان­نىڭ بارلىق مۇشەلەرىنىڭ وزارا ىمىراعا كەلۋى ۇشىن بەلسەندى تۇردە كۇش جۇمىل­دىرۋدىڭ ماڭىزدىلىعىن ايتتى.
– وسى ماڭىزدى ورگاننىڭ كۇنتارتى­بىندەگى بارلىق ماسەلەلەرگە ساي جۇمىس جۇرگىزىلىپ جاتىر. بيىلعى 18 قاڭتاردا بۇۇ قاۋىپسىزدىك كەڭەسىنىڭ «جاپپاي قى­رىپ-جويۋ قارۋلارىن تاراپتاۋ: سەنىم شارالارى» اتتى بريفينگىنە قاتىسۋدى جوسپارلاپ وتىرمىن. بۇل تاقىرىپ كەز­دەيسوق تاڭدالعان جوق. بىز تاراتپاۋ رەجيمىن دايەكتى تۇردە نىعايتۋ مەن كەڭەيتۋ ارقىلى عالامدى يادرولىق قارۋدان ازات ەتۋ, سونداي-اق جاھاندىق سوعىس قاۋپىنىڭ الدىن الىپ, ونى تولىق جويۋ ۇشىن الەمدىك قوعامداستىقتىڭ كۇش-جىگەرىن جۇمىلدىرا بەرۋگە نيەتتىمىز, – دەدى نۇرسۇلتان نازارباەۆ.
قازاقستان پرەزيدەنتى ەكونوميكالىق باعىت ەلىمىزدىڭ شەتەلدىك ارىپتەستەرمەن ىنتىماقتاستىعىنىڭ باستى وزەگى بولىپ سانالاتىنىن اتاپ وتتى. بۇل ۇشىن ىسكەرلىك احۋالدى جاقسارتاتىن جۇمىستار جالعا­سۋدا. وسىعان وراي, ەلشىلەردى ن.نازارباەۆ ولاردىڭ ەلدەرىنىڭ كاسىپورىن­دارى مەن ينۆەستورلارىن قازاق­ستان ەكونوميكاسىن يندۋسترييالاندىرۋعا جانە تسيفرلان­دىرۋعا, ينفراقۇرىلىم باعدارلاما­لا­رىنا قاتىسۋعا شاقىردى.
وسىدان كەيىن ەلباسى ديپلوماتييالىق ميسسييالارىن جاڭارتىپ وتىرعان ار ەلمەن ىنتىماقتاستىققا جەكە توقتالا كەتتى.
– ەلدەرىمىزدىڭ ىنتىماقتاستىعى وزارا قۇرمەت پەن سەنىمگە بەرىك نەگىزدەل­گەن. بۇگىندە ۇلىبريتانييا قازاقستاننىڭ ىرى ينۆەستورلارىنىڭ جانە ساۋدا ارىپ­تەستەرىنىڭ بىرى بولىپ سانالادى, – دەدى مەملەكەت باسشىسى ۇلىبريتانييا ەل­شىسىنە ارناعان سوزىندە.
نۇرسۇلتان نازارباەۆ شۆەتسييامەن ىنتىماقتاستىقتى دامىتۋعا ايرىقشا مان بەرەتىنىن نىقتاپ, شۆەتسييا ريكسداگى­نىڭ سپيكەرى ۋربان اليننىڭ ەلىمىزگە ساپارى وتكەن جىلدىڭ باستى وقيعاسىنا اينالعانىن ايتتى.
قازاقستان پرەزيدەنتى ەلشى پرابحات كۋماردى ۇندىستاننىڭ شىۇ-نىڭ تولىق مۇشەسى بولۋىمەن قۇتتىقتاپ, قازاقستان ۇندىستاندى ماڭىزدى سىرتقى ساياسي جانە ساۋدا سەرىكتەسى رەتىندە قاراستىراتىنىن مالىم ەتتى.
– ەلدەرىڭىز شانحاي ىنتىماقتاستىق ۇيىمىنىڭ جۇمىسىنا تىڭ سەرپىن بەرىپ, مارتەبەسىن ارتتىرادى دەپ سەنەمىن, – دەدى مەملەكەت باسشىسى.
سونىمەن قاتار نۇرسۇلتان نازارباەۆ سوڭعى جىلدارى قازاقستان-كۋبا قارىم-قاتىناستارى ايتارلىقتاي جاندانعانىن جوعارى باعالاپ, ەلدەرىمىزدىڭ ساۋدا-ەكو­نوميكالىق جانە ساياسي ىنتىماقتاستىعىن نىعايتۋ ۇشىن ناقتى جۇمىستاردى جال­عاستىرۋ قاجەت ەكەنىن جەتكىزدى. ەلباسى 2017 جىلدىڭ ساۋىرىندە العاش رەت كۋباعا رەسمي ساپارمەن بارعان بولاتىن.
سوز سوڭىندا قازاقستان پرەزيدەنتى شەتەلدىك ديپلوماتتاردىڭ استاناداعى قىزمەتتەرى قىزىقتى ارى جەمىستى بو­لۋىنا تىلەكتەستىك بىلدىرىپ, الداعى جۇ­مىستارىنا تابىس تىلەدى.
– ميسسييالارىڭىز تابىستى بولىپ, مەملەكەتتەرىمىز اراسىنداعى قارىم-قا­تىناستارىمىزدى جان-جاقتى دامىتا تۇسەدى دەپ سەنەمىن. قازاقستاندا وتكىزەتىن كۇندەرىڭىز وزدەرىڭىز ۇشىن دە, جاقىن­دارىڭىز ۇشىن دە جايلى بولسىن. ول جا­عىنان بىزدىڭ مينيسترلىك تە, ۇكىمەت تە بارلىق جاعدايدى جاسايدى, – دەپ تۇيىن­دەدى نۇرسۇلتان نازارباەۆ.

 

ايحان شارىپ

 

بولىسۋ:

پىكىر جازۋ


*