ەلباسىنىڭ ساپارى ەل مەرەيىن وسىرەدى

1074
0
بولىسۋ:

قازاقستان پرەزيدەنتى نۇرسۇلتان نازارباەۆ اقش-قا جاسايتىن رەسمي ساپارى بارىسىندا دونالد ترامپپەن كەزدەسەدى. بۇل ساپاردىڭ ماڭىزى تۋرالى قازاقستاننىڭ xالىقارالىق قاتىناستار كەڭەسىنىڭ توراعاسى ەرلان قارين جان-جاقتى تۇسىندىرىپ بەردى.

مەملەكەت باسشىسى نۇرسۇلتان نازارباەۆتىڭ امەريكاعا جاسايتىن رەسمي ساپارى ەلىمىزدىڭ مارتەبەسىن اسقاقتاتادى. ويتكەنى ترامپ شەتەلدىك كوشباسشىلار اراسىندا بىرىنشى رەت قازاقستان پرەزيدەنتىن اق ۇيدە قارسى الادى. سونداي-اق ەلباسى قىرىپ-جويۋ قارۋلارىن تاراتپاۋعا ارنالعان جوعارى دەڭگەيدەگى تاقىرىپتىق بريفينگكە قاتىسادى. ەرلان قاريننىڭ ايتۋىنشا, قازاقستان مەن اقش-تىڭ پرەزيدەنتتەرى الدىمەن اۋعانستان ماسەلەسىن تالقىلايدى.
– امەريكا نۇرسۇلتان نازارباەۆتىڭ ساپارىنا ۇلكەن مان بەرىپ وتىر. سەبەبى اقش جاقىن ارادا اۋعانستانعا قاتىستى جاڭا ستراتەگييانى ازىرلەيمىز دەپ مالىم­دەگەن بولاتىن. الايدا ونى الى تانىستىرعان جوق. مەنىڭشە, ەكى ەل باسشىلارى كەزدەس­كەندە اۋعانستان ستراتەگيياسىنا باسا نازار اۋداراتىن بولادى. بۇگىندە قازاقستان بۇۇ قاۋىپسىزدىك كەڭەسىنىڭ توراعاسى عانا ەمەس, اتالعان ۇيىمنىڭ بىرقاتار كوميتەتتەرىنە دە جەتەكشىلىك ەتەدى. سونىڭ ىشىندە اۋ­عانستان مەن تاليبان جونىندەگى كوميتەت تە بار. سول سەبەپتى, نازارباەۆ پەن ترامپتىڭ كەلىسسوزدەرى كەزىندە اۋعانستان ماسەلەسىنە باسا نازار اۋدارىلادى. سوندىقتان دا پرەزيدەنتىمىزدىڭ اقش-قا جاسايتىن ساپارى – ماڭىزدى وقيعا. نەگىزى, دونالد ترامپ شەتەلدىك كوشباسشىلاردىڭ ىشىندە قازاقستاننىڭ پرەزيدەنتىن بىرىنشى بولىپ اق ۇيدە قارسى الادى. جالپى, الداعى ساپار ەكى ەل اراسىنداعى ىنتىماقتاستىقتىڭ باسىم باعىتتارىن عانا ەمەس, اقش پەن ورتالىق ازييانىڭ ارىپتەستىگىن دە, اقش-تىڭ وسى ايماقتاعى رولىن دە انىقتايدى, – دەدى ە.قارين.
ساياساتتانۋشىنىڭ ايتۋىنشا, بۇگىندە الەم قاۋىمداستىعى قازاقستاندى يادرولىق قارۋسىزداندىرۋدىڭ كوشباسشىسى رەتىندە جاقسى بىلەدى. سوندىقتان ترامپپەن كەزدەسۋ كەزىندە اتالعان ماسەلە دە تالقىعا سالى­نادى.
ايتا كەتەيىك, وسى ايدا ەلباسى نۇرسۇلتان نازارباەۆ اقش-قا رەسمي ساپارمەن بارادى. 18 قاڭتاردا نيۋ-يوركتە جاپپاي قىرىپ-جويۋ قارۋلارىن تاراتپاۋعا ارنالعان جوعارى دەڭگەيدەگى تاقىرىپتىق بريفينگ وتەدى. وعان بىرقاتار ەلدىڭ باسشىلارى مەن مينيسترلەرى قاتىسادى. بريفينگتە قازاقستان پرەزيدەنتى نۇرسۇلتان نازارباەۆ سوز سويلەيدى دەگەن جوسپار بار. اتالعان شارا قازاقستاننىڭ بىرىككەن ۇلتتار ۇيىمىنىڭ قاۋىپسىزدىك كەڭەسىنە توراعالىعى اياسىندا ۇيىم­داستىرىلادى. توراعالىق 31 قاڭتارعا دەيىن جالعاسادى.

 

سەرىك جولداسباي

 

بولىسۋ:

پىكىر جازۋ


*