قازاقستاندا 106 تەڭگە بار

1437
0
بولىسۋ:

15 قاراشا – تول تەڭگەمىزدىڭ تۋعان كۇنى. وسىدان 24 جىل بۇرىن ساعات تىلى تاڭعى 8:00-دى كورسەتكەن ساتتە, ەلباسىمىز نۇرسۇلتان ابىشۇلى دۇنيەگە تەڭگەنىڭ كەلگەنى جايلى كۇللى قازاق جۇرتىنا جار سالعان بولاتىن. ستاتيستيكا كوميتەتىنىڭ مالىمەتىنە سايكەس, بۇگىندە ەلىمىزدە تەڭگە ەسىمدى 106 ازامات بار. ونىڭ 88-ى – قازاق.
ەگەمەندىگىن ەندى العان ەلدە بۇل كەزدە ماڭىزدى دۇنيەنىڭ بارى بولدى: پرەزيدەنت, ۇكىمەت, جو­عارعى سوت, مەملەكەتتىك تۋ مەن ەل­تاڭبا بارلىعى بار. جەتپەي تۇرعانى – تەڭگە عانا. اكادەميك ساۋىق تاكەجانوۆتىڭ باستاماسى­مەن بۇل ىس باس-اياعى بىر جىلدا شە­شىمىن تاپتى. ەلىمىزدىڭ ۇزدىك سۋرەتشىلەرىنىڭ جۇمىستارىن ىرىكتەپ, ماسەلەنىڭ مانىمەن اينا­لىساتىن ارنايى توپ قۇرىلدى. تەڭگەنىڭ ەڭ العاشقى كۋرسى – 4,75 تەڭگە – 1 اقش دوللارى. سول ساتتەن بەرى باس ۆاليۋتا تاعدىر تا­لايىنا «توزىپ» كەلەدى.
پوليگرافشىلاردىڭ جەر-جاھاندى كەزىپ, تەرگەن بىلىمدەرى­نىڭ ارقاسىندا سانى مەن سالتاناتى ۇيلەسكەن بانكنوتا پايدا بولدى. قۇندى قاعازدار شىعاراتىن فاب­ريكانىڭ تۇساۋى 1993 جىلدىڭ2 ماۋسىمىندا كەسىلدى. اشىلۋ سال­تاناتىنا ەلباسىمىز قاتىس­قان. 15 قاراشاعا دەيىن قاعاز اقشا دايىن بولعانىمەن, تيىن تۇرىندە سوعىپ ۇلگەرمەگەن. وسىلايشا, باس­تاپقىدا قاعاز تيىندار اينا­لىمدا جۇرگەن. توزىعى تەز جەتەتىن ونداي بانكنوتانى شالعايداعى انگلييادان ۇشاقپەن تاسۋ وڭاي شارۋا ەمەس ەدى. تەڭگە سوعاتىن فاب­ريكانى جەدەل ارادا اشۋ كەرەك بولدى. جوسپار بويىنشا ەكى جىلدا سالىنۋى تيىس فابريكا­نىڭ قۇرىلىس جۇمىستارى بىر جىلدا بىتەدى. 1995 جىلدىڭ 19 ما­مىرىنان باستاپ, قازاقستان­دىقتار ەلىمىزدەگى «وتاندىق تەڭ­گەنى» پايدالانا باستادى.
اعىلشىن فۋنتىن التى جىل بەينەلەگەن دەسەدى. بىراق مۇنداي ۇزاق ۋاقىت كۇتۋ بىزدە مۇمكىن ەمەس-تىن. جاڭا بانكنوتالاردىڭ كولەمى دە كەڭەستىك ۇلگىمەن سايكەس بولدى. ونداعى وي – بارىنشا ۇنەمدەۋ بو­لاتىن. شىعىن دەمەك­شى ۇنەم­دەۋگە بايلانىستى بىر قىزىق جاع­داي ورىن العان دەسەدى. انگلييادا اقشا شىعاراتىن فاب­ريكا باسشى­لارى «جابايى» قازاق­تاردى الداپ تۇسىرەمىز دەگەن ويمەن ساپاسىز بانك­نوتالار بەرىپ جىبەرگەن ەكەن. تۇرى تىپتى اقشا ەمەس, لوتورەيا بي­لەتى ىسپەتتەس. سول كەزدە ۇلتتىق بانك بىردەن حابار­لاسىپ, «تاپسى­رىستى ەندىگىدە وزگە فابريكاعا بەرەتىن بولامىز» دەگەن ەكەن سۇستى داۋىسپەن. اپ-ساتتە ماسەلە شەشى­لىپ, سودان بەرى الى كۇنگە دەيىن بانكنوتا تەك ساپالى شىعىپ كە­لەدى. العاشقى ديزاينىنان كەيىن دۇنيەگە تۇرلى تەڭگەلەر كەلدى. بار­لىعى – ەرەك­شە. بارلىعى – بىزگە باعالى. تۋ­عان كۇنىڭمەن, تەڭگە!

جادىرا اققايىر

 

بولىسۋ:

پىكىر جازۋ


*