ەلباسى العىس ايتتى

1373
0
بولىسۋ:

لاتىن قارپىنە كوشۋ ماسەلەسى – مەملەكەت باسشىسىنىڭ «بولاشاققا باعدار: رۋحاني جاڭعىرۋ» اتتى ماقالاسىندا اتالىپ كورسەتىلگەن ساتتەن بەرى كۇن تارتىبىنەن تۇسكەن ەمەس. اسا اۋقىمدى ارى وزەكتى وسى قۇبىلىستىڭ قارقىن الۋى مەن قادام-قادام بويىنشا جۇيەلەنۋىن ەلىمىزدەگى ەڭبەكتەگەن بالادان ەڭكەيگەن قاريياعا دەيىن قاپەرىنە ىلىپ, كوڭىلىنە تۇيىپ جۇر. ۇلت زييالىلارى مەن اعا بۋىن وكىلدەرى بۇل ماسەلەنىڭ تەرەڭ تاريحىنان سىر شەرتىپ, بۇگىنى مەن بولاشاعى جايىندا تەبىرەنە ايتىپ, تالداپ تۇرىپ جازۋدا. بۇعان ەلباسىنىڭ رەسمي حات قورجىنىنا كەلگەن بۋما-بۋما ۇشبۋ حاتتارى دالەل. 

سوتسياليستىك ەڭبەك ەرى بيبىگۇل تولەگەنوۆا, ەلىمىزگە تانىمال حالىق ارتيسى, مەملەكەتتىك سىيلىقتىڭ لاۋرەاتتارى: ەسكەندىر حاسانعاليەۆ, نۇرعالي نۇسىپجانوۆ, اباي اتىنداعى قازاق مەملەكەتتىك اكادەمييالىق وپەرا جانە بالەت تەاترىنىڭ باس بالەتمەيس­تەرى گ.تۇتقىباەۆا, «سال­تانات» مەملە­كەتتىك بي انسامبلىنىڭ كور­كەمدىك جە­تەك­شىسى ارى باس بالەت­مەيس­تەرى, ەڭبەك سىڭىرگەن ونەر قاي­راتكەرى گ.ورىمباەۆا, «استانا وپەرا» مەملەكەتتىك وپەرا جانە بالەت تەاترى­نىڭ جەتەكشى سوليسى ا.بەكەتاەۆا سيياق­تى قايراتكەرلەر دە لاتىن قارپىنىڭ يگىلىگىن تۇسىندىرۋدە شەت قالمادى.
رەسپۋبليكالىق نەمىس دراما تەاترى ديرەك­تورىنىڭ مىندەتىن اتقارۋشى ن.دۋبس «لاتىن قارپىنە كوشۋ – كۇردەلى ۇدەرىس. بۇل ماسەلەنى تالقىلاۋعا ما­مان­داردىڭ عانا ەمەس, قالىڭ بۇقا­رانىڭ دا قاتىسۋى – حالىقتىڭ بىرلىگى مەن قوعام­دىق سانانىڭ جاڭعىرۋىن كورسەتەدى. قازاق تىلىنىڭ رەفورماسى تىل ۇيرەنۋدەگى بارلىق كەدەرگىلەردى جويىپ, ونى انا­عۇر­لىم جەڭىل ارى تەز دامىتۋعا مۇم­كىندىك بەرەدى» دەپ جازادى. باتىس قا­زاق­ستان وبلىسىنىڭ زييالى قاۋىم وكىل­دەرى اتىنان حات جولداعان ت.مەر­عاليەۆ, د.مۇشتانوۆا, ب.عۇ­بايدۋللين, ش.قىدىرنييازوۆا, م.سۇيىنشاليەۆا, ر.سۇيەرباەۆ قازاق تىلىن لاتىن قارپىنە كوشىرۋ جونىندەگى باستاماسىن ماڭ­گىلىك ەل يدەياسىنىڭ تۇپقازىعىنا, جارقىن بولاشاققا قىزمەت ەتەتىن وزىق وي, قازاق تىلىنىڭ مارتەبەسىنە دەم بەرەر يگى قادامعا بالاعان. ەلىمىزدىڭ ىرى قالا­لارىنداعى مادەني-ادەبي وشاقتارى, سونداي-اق بىلىم مەن عىلىم وردالارى ەلباسىنىڭ بۇل باستاماسىن تولىق قول­دايتىنىن ارى وسى ماسەلەنىڭ ۇلتتىڭ پايداسىنا جاراۋ ۇشىن جان-جاقتى اتسالىساتىنىن جەتكىزىپتى.
مەملەكەت باسشىسى قازاق الىپبيى­نىڭ تاع­دىرىنا الاڭداپ حات جازعان ەل ازاماتتارىنا جىلى لەبىزدەرى مەن قولداۋ بىلدىرگەنى ۇشىن العىسىن ايتتى.
ايدانا نۇرمۇحان

بولىسۋ:

پىكىر جازۋ


*