ەكى مۇناي وڭدەۋ زاۋىتىن جاڭعىرتۋ بيىل اياقتالادى

1301
0
بولىسۋ:

ەلباسى نۇرسۇلتان نازارباەۆ ەنەرگەتيكا مينيسترى قانات بوزىمباەۆتى قابىلدادى.
بۇل تۋرالى اقوردانىڭ باسپاسوز قىزمەتى حابارلادى.

كەزدەسۋدە مەملەكەت باسشىسىنا جا­نار-جا­عارماي نارىعىنداعى قازىرگى احۋال مەن مۇناي وڭدەۋ زاۋىتتارىن جاڭعىرتۋ بارىسى جو­نىندە مالىمدەلدى.
نۇرسۇلتان نازارباەۆ ەلىمىزدەگى جانار­ماي تاپشىلىعى قازاقستان ۇكىمەتى مەن ەنەر­گەتيكا مينيسترلىگى تاراپىنان نا­رىق­­­تى جانار-جاعارمايمەن قامتاماسىز ەتۋ ۇشىن ۋاقتىلى شەشىم قابىلداماۋى سال­­دارى­نان ورىن الىپ وتىرعانىن ايتتى.
– ەنەرگەتيكا مينيسترلىگى – ەلىمىزدىڭ وتىن-ەنەرگەتيكا ماسەلەلەرىنە, سونىڭ ىشىن­­دە ىشكى نارىقتى جانار-جاعارمايمەن قام­­تاماسىز ەتۋگە جاۋاپتى. ەلىمىزدە ونىڭ تاپ­­­شىلىعىنا بايلانىستى ورىن العان اح­ۋال ۇكىمەت پەن ەنەرگەتيكا مينيسترلىگى تا­­راپىنان, نەمقۇرايلىلىق پەن جاۋاپ­سىز­دىققا جول بەرىلگەنىن كورسەتىپ وتىر. سىز بيىلعى مامىر ايىندا مۇناي وڭدەۋ زاۋىت­­تا­رىنا جوندەۋ جۇمىستارىن جۇرگىزۋ كەس­تە­سىن بەكىتتىڭىز. كۇزدە ۇش زاۋىتتىڭ ەكەۋى جون­­دەۋ ۇشىن توقتاتىلاتىنىن بىل­دىڭىز. مۇن­داي جاعداي جىل سايىن قايتا­لا­نىپ كە­لەدى. سونى بىلە تۇرا, الدىن الا دايىن­­دا­لىپ, حالىقتى قامتاماسىز ەتۋ ۇشىن قاجەتتى كو­لەمدە جانار-جاعارماي جەت­كىزۋگە تيىس ەدى­ڭىز. ولاي بولمادى, – دەدى قازاقستان پرە­زيدەنتى.
سونداي-اق ەلباسى مينيسترلىكتىڭ جا­نار-جاعارماي نارىعىنداعى احۋالدى تۇ­راق­­­­تان­­دىرۋعا باعىتتالعان بۇعان دەيىنگى شا­­را­لا­رىنىڭ تيىمدىلىگى تومەن بولعانىن اتاپ وتتى.
– سىز ۇسىنعان جاقسى باستامالار از ەمەس. ولار مەنىڭ تاراپىمنان دا, ۇكىمەت تا­را­پىنان دا قولداۋ تاۋىپ كەلەدى. جا­نار­ماي تاپ­شىلىعىن بولدىرماۋ ۇشىن باعانى مەم­لەكەتتىك رەتتەۋدەن باس تارتۋ ۇسىنىل­دى. الاي­دا نارىقتا تاعى دا جانار-جا­عار­ماي جە­تىسپەۋشىلىگى ورىن الدى. وسىعان باي­لا­نىس­تى, ۇكىمەتتىڭ ۇسىنىسى بويىنشا سىز­گە سوگىس جارييالادىم. بۇل – قىزمەتتەن بو­سا­تىل­عان­مەن بىردەي, – دەدى مەملەكەت باس­شىسى.
سونداي-اق قانات بوزىمباەۆ قازاق­ستان پرەزيدەنتىنە پاۆلودار جانە اتىراۋ مۇ­ناي وڭدەۋ زاۋىتتارىن جاڭعىرتۋ جۇمىس­تا­رىنىڭ بارىسى تۋرالى مالىمدەدى.
– ەكى مۇناي وڭدەۋ زاۋىتىن جەتىلدىرىپ, جاڭ­عىرتۋ بيىل اياقتالادى. قاراشا ايىن­دا پاۆلودارداعى زاۋىتتى ىسكە قوسۋ جوس­پارلانىپ وتىر. اتىراۋداعى مۇناي وڭدەۋ زاۋىتىنداعى جۇمىستاردى وسى جىلدىڭ 16 جەلتوقسانىنا دەيىن اياقتاۋ كوزدەلگەن. مۇن­دا مۇناي ونىمدەرىنىڭ كولەمىن ارت­تىرۋعا جانە ولاردىڭ ساپاسىن جاقسارتۋعا مۇمكىندىك بەرەتىن كاتاليزدىك كرەكينگ قون­دىرعىسى بىرىنشى رەت پايدالانىلاتىن بولادى.
ق.بوزىمباەۆ مەملەكەت باسشىسىنا شىم­كەنتتەگى مۇناي وڭدەۋ زاۋىتىندا دا جو­عارى وكتاندى بەنزين شىعارۋعا ار­نال­عان كاتاليزدىك كرەكينگ قوندىرعىسىن سالۋ جوسپارلانىپ وتىرعانى تۋرالى مالىمدەدى.
ەنەرگەتيكا مينيسترى كەلەسى جىلى قا­زاق­ستان نارىعى جوعارى ساپالى جانار­ماي­مەن, سونىڭ ىشىندە اۆياتسييالىق جانار­مايمەن قامتاماسىز ەتىلەتىنىن ايتتى.
سوڭىندا قازاقستان پرەزيدەنتى نا­رىق­تى جانار-جاعارمايمەن قامتاماسىز ەتۋ ۇشىن جاۋاپكەرشىلىك جۇكتەلەتىنىن تاعى دا ەسكەرتىپ, جانارماي تاپشىلىعىن بول­دىرماۋ ۇشىن بارلىق قاجەتتى شارالار قا­بىلداۋدى تاپسىردى.

بولىسۋ:

پىكىر جازۋ


*