ديپلوماتتار قۇرىلتايىنا قاتىستى

1071
0
بولىسۋ:

سەنات توراعاسى قاسىم-جومارت توقاەۆ ەلۋگە جۋىق ەل ۇشىن ديپلوماتتار دايارلاعان ماسكەۋ مەملەكەتتىك حالىقارالىق قاتىناستار ينستيتۋتى تۇلەكتەرىنىڭ IV حالىقارالىق فورۋمىنا قاتىستى. ەلورداداعى تاۋەلسىزدىك سارايىندا وتكەن ديپلوماتتاردىڭ بۇل قۇرىلتايىنا قازاقستان, رەسەي, ازىربايجان, چەحييا, ۆەنگرييا, لاتۆييا, موڭعولييا, لاوس سەكىلدى ەلدەردەن سىرتقى ساياسات جانە حالىقارالىق جۋرناليستيكا سالالارىندا ەڭبەك ەتۋشى بيىك لاۋازىمدى تۇلعالار قاتىستى.

اشىلۋ سالتاناتىندا سوز سويلەگەن سەنات توراعا­سى قاسىم-جومارت توقاەۆ الدىمەن ەلباسىنىڭ فورۋم قاتىسۋشىلارىنا ارنا­عان قۇتتىقتاۋ سوزىن وقىپ بەردى. وندا مەملەكەت باس­شىسى قازىرگى ۋاقىتتا پلانەتامىزدا «ساياساتتا, ەكو­نوميكادا جانە قوعام­دىق ومىردە تۋربۋلەنتتى قۇ­بىلىستاردىڭ كۇشەيۋى ايا­سىندا حالىقارالىق ىس­تەر ماماندارىنىڭ رولى مەن جاۋاپكەرشىلىگى وسىپ وتىرعانىن» ايتا كەلە, ديپ­لوماتتاردىڭ بۇل تۇرعىداعى بىلىكتى ارى تابىستى قىز­مەتىنىڭ ۇلكەن ماڭىزعا يە ەكەنىنە نازار اۋدارتتى.
ن.نازارباەۆ سونداي-اق وسىنداي فورۋمدار وتكىزۋدى جانە بىر جوو تۇلەكتەرىنە جينالىپ, جاھاندىق كۇن تارتىبىندەگى وزەكتى ماسە­لەلەر بويىنشا وزارا پى­كىر الماسۋعا مۇمكىندىك بەرۋدى «جاقسى داستۇر» دەپ سانايتىنىن ايتتى.
وز سوزىندە قاسىم-جو­مارت كەمەلۇلى بۇۇ قاۋىپ­سىزدىك كەڭەسىنىڭ تۇراقتى ەمەس مۇشەسى قازاقستان يادرولىق قارۋدى تاراتپاۋ, تەرروريزمگە قارسى كۇرەس, دىنارالىق ۇنقاتىسۋدى قالىپ­تاستىرۋ ماسەلەلەرىن شەشۋگە سۇبەلى ۇلەس قوسىپ كەلە جاتقانىنا توقتالدى. وسىنىڭ ارقاسىندا استا­نا اتاۋى حالىقارالىق قوعامداستىقتا بەيبىتشىلىك جانە بىتىم ۇعىمدارىمەن ۇيلەسەدى.
– استانا – جاڭا قا­لا. اسىرەسە, ەسىلدىڭ سول جا­عالاۋىندا قالا ەشقا­شان بولماعان. الى ەسىم­دە, بىرىنشى رەت وسى جەرگە ديپلوماتييالىق كورپۋستى الىپ كەلدىم دە, مۇندا بىزدىڭ جاڭا استانامىز بولاتىنىن حابارلادىم. ارينە, ماعان ول كەزدە ديپلوماتتاردىڭ ەشقاي­سىسى دا سەنبەدى. ال قازىر استانا ىرى حالىق­ارا­لىق ورتالىق رەتىندە قالىپ­تاستى. وسىندا ەقىۇ, يىۇ, شىۇ, تمد, ەاەو, اوسشك سامميتتەرى وتتى, – دەدى سەنات توراعاسى.
ق.توقاەۆ قازاقستان ەلورداسىندا جۇيەلى تۇر­دە ۇيىمداستىرىلاتىن الەمدىك جانە داستۇرلى دىن­دەر ليدەرلەرىنىڭ سەزىنە باسا ماڭىز بەرىپ, ونىڭ جۇمىسىنا رۋحاني جانە ساياسي قايراتكەرلەردىڭ بىرگە قاتىساتىنىن اتاپ كورسەتتى. بۇل رەتتە سەزدەرگە بۇۇ باس حاتشىسى, يوردانييا كورولى, فينلياندييا پرەزي­دەن­تى جانە تاعى باسقا دا تۇل­عالار قاتىسقانى ايتىلدى.
ول وز سوزىندە قازاق­ستان­دا جۇرگىزىلىپ جاتقان ساياسي, ەكونوميكالىق جانە الەۋمەتتىك ترانسفورماتسييا ۇدەرىستەرىنە ەكپىن تۇسىردى. قاسىم-جومارت توقاەۆ فورۋمعا قاتىسۋشىلارعا مەملەكەت باسشىسىنىڭ باستاماسىمەن جۇزەگە اسقان كونستيتۋتسييالىق رەفورما تۋرالى, سونداي-اق «100 ناقتى قادام» ستراتەگيياسى مەن «رۋحاني جاڭعىرۋ» باعدارلاماسىنىڭ جۇزەگە اسىرىلۋى تۋرالى ايتىپ بەردى.
فورۋمدا رەسەيدىڭ سىرتقى ىستەر مينيسترى سەرگەي لاۆروۆ پرەزيدەنت ۆلاديمير پۋتيننىڭ قۇت­تىقتاۋىن وقىدى. رە­سەي كوشباسشىسى استا­نانى «كوپتاراپتى ديپلو­ماتييانىڭ, حالىقارالىق ەكونوميكالىق ىنتى­ماق­تاستىقتىڭ, ەۋرازييالىق ينتەگراتسييالىق ۇدەرىستەر ورتالىقتارىنىڭ بىرى» دەپ اتادى.
شاراعا قاتىسۋشىلارعا قازاقستان سىرتقى ىس­تەر مينيسترى قايرات ابدراحمانوۆ جانە مگيمو رەكتورى اناتوليي توركۋنوۆ تا ۇندەۋ جولداپ, سوز سويلەدى.

 

ايحان شارىپ 

بولىسۋ:

پىكىر جازۋ


*