ۇيىم باسشىسىمەن جۇزدەستى

1011
0
بولىسۋ:

قازاقستان پرەزيدەنتى يسلام ىنتىماقتاستىعى ۇيىمىنىڭ عىلىم جانە تەحنولوگييالار جونىندەگى سامميتى اياسىندا وسى ۇيىمنىڭ باس حاتشىسى يۋسەف بەن احماد ال-وسەيمينمەن كەزدەستى.

اڭگىمە بارىسىندا مەملەكەت باسشىسى قازاقستان بۇل ۇيىمنىڭ جۇمىسىنا تولىقتاي قاتىسۋ ۇشىن قاجەتتى بارلىق شارالاردى قابىلداپ وتىرعانىن اتاپ وتتى.
– بۇگىنگى ىس-شارا اسا ماڭىزدى. بىز سامميتتىڭ ناتيجەلەرى تابىستى بولادى دەپ ۇمىتتەنەمىز, – دەدى نۇرسۇلتان نازارباەۆ.
يسلام ىنتىماقتاستىعى ۇيىمىنىڭ باس حاتشىسى قازاقستان پرەزيدەنتىنە سامميتتى جوعارى دەڭگەيدە ۇيىمداستىرعانى ۇشىن ريزاشىلىعىن بىلدىردى.
– قازاقستاننىڭ يسلام الەمىندەگى بەدەلى زور. بۇگىنگى سامميتكە كەلگەن بارلىق دەلەگاتسييا وكىلدەرىنىڭ اتىنان سىزگە جانە قازاقستان حالقىنا قوناقجايلىلىق كورسەتىپ, ىس-شارانى جوعارى دەڭگەيدە وتكىزگەندەرىڭىز ۇشىن العىس ايتامىن, – دەدى باس حاتشى.
يۋسەف بەن احماد ال-وسەيمين يسلام ىنتىماقتاس­تىعى ۇيىمىنىڭ عىلىم جانە تەحنولوگييالار جونىندەگى سامميتى العاش رەت وتكىزىلىپ وتىرعانىنا توقتالدى.
– مۇنى تاريحي وقيعا دەپ زور سەنىممەن ايتۋعا بولادى. 57 يسلام ەلىنىڭ وكىلى عىلىم مەن تەحنولوگييا سالاسىنداعى وزەكتى ماسەلەلەردى تالقىلاۋ ۇشىن باس قوستى. بىز ۇلى دىنىمىزدىڭ جاڭا قىرلارىن اشا تۇسەمىز دەپ ۇمىتتەنەمىن. وكىنىشكە قاراي, تەرروريستىك ۇيىمدار الەمدەگى يسلامنىڭ بەدەلىنە نۇقسان كەلتىرۋدە, – دەدى يسلام ىنتىماقتاستىعى ۇيىمىنىڭ باس حاتشىسى.
ۇيىم باسشىسى كەڭ اۋقىمدا تانىمال وكىلدەر قاتىسقان بۇل كەزدەسۋ قازاقستان پرەزيدەنتى بەدەلىنىڭ ارقاسىندا وتكىزىلىپ وتىرعانىن ايتتى.
يۋسەف بەن احماد ال-وسەيمين يسلام ەلدەرىنىڭ حالىقارالىق كۇن تارتىبىندەگى وزەكتى ماسەلەلەر جونىندە ورتاق ۇستانىم قالىپتاستىرۋعا جانە يسلامدىق ەمەس ۇيىمدارمەن سىندارلى ىنتىماقتاسۋعا باعىتتالعان ۇيىمنىڭ الداعى جۇمىس جوسپارى تۋرالى وي بولىستى.
سونداي-اق ۇيىم باسشىسى قازاقستاننىڭ جاڭا ەلورداسى – استانانىڭ اسەمدىگىنە تامساناتىنىن ايتىپ, قالانىڭ ينۆەستيتسييالىق تارتىمدىلىعىنا توقتالدى.
نۇرسۇلتان نازارباەۆ يۋسەف بەن احماد ال-وسەي­ميننىڭ يسلام ىنتىماقتاستىعى ۇيىمىنىڭ دامۋىنا تىڭ سەرپىن بەرەتىن بىلىكتى باسشى ەكەنىن اتاپ وتتى.
– سىزدىڭ قىزمەتىڭىزگە تابىس تىلەيمىن, بىزدى قولدايتىنىڭىزعا سەنەمىن. قازىرگى ۋاقىتتا لاڭكەستىك شابۋىلداردىڭ كوبىسى يسلام ەلدەرىندە بولۋدا. وسى ورايدا سىزدىڭ بۇل زاۋالمەن بىرلەسە كۇرەس جۇرگىزۋ قاجەتتىگى جونىندەگى سوزىڭىز ورىندى, – دەدى مەملەكەت باسشىسى.
سوڭىندا قازاقستان پرەزيدەنتى ورتا عاسىرلاردا نەگىزگى عىلىمي جاڭالىقتار يسلام الەمىندە اشىلعانىنا ەرەكشە توقتالدى.
– مۇنى اردايىم ەستە ۇستاپ, ايانباي ەڭبەك ەتۋىمىز قاجەت. بىز عىلىم مەن تەحنولوگييالارعا ارنالعان سامميتتى تورتىنشى ونەركاسىپ توڭكەرىسى كەزەڭىندە تەكتەن-تەك وتكىزىپ وتىرعان جوقپىز, – دەدى نۇرسۇلتان نازارباەۆ.

بولىسۋ:

پىكىر جازۋ


*