جاڭارعان قۇرامدا جۇمىسقا كىرىستى

947
0
بولىسۋ:

قاسىم-جومارت توقاەۆتىڭ توراعالىق ەتۋىمەن, پارلامەنتتىڭ جاڭا سەسسيياسىنداعى سەناتتىڭ العاشقى جالپى وتىرىسى وتتى. جيىندا بىرقاتار ۇيىمداستىرۋ جانە كادرلىق ماسەلەلەر قارالدى.

وز سوزىندە قاسىم-جومارت كەمەلۇلى «پارلامەنت پالاتالارىنىڭ بىرلەسكەن وتىرىسىندا پرەزيدەنت نۇرسۇلتان نازارباەۆتىڭ دەپۋتاتتارعا الدا تۇرعان اسا ماڭىزدى ارى اۋقىمدى مىندەتتەر تۋرالى جان-جاقتى تۇسىن­دىرگەنىن» اتاپ وتتى.
– مەملەكەتىمىزدىڭ وركەندەۋى مەن حالقىمىزدىڭ يگىلىگى جولىندا دەپۋ­تات­تىق كورپۋس ۇكىمەتپەن تىعىز بايلا­نىس­تا جۇمىس جۇرگىزىپ, ەلباسى بەلگى­لە­گەن مىندەتتەردى ورىنداۋدى زاڭ­نا­ما­لىق جاعىنان دەر كەزىندە جانە ساپالى قامتاماسىز ەتەدى دەپ سەنەمىن, – دەدى سەنات توراعاسى.
ق.توقاەۆ جاڭادان سايلانعان دەپۋتاتتاردى قۇتتىقتادى جانە اسا جاۋاپتى قىزمەتتەرىنىڭ تابىستى بولۋىنا تىلەكتەستىگىن بىلدىرە كەلىپ, بۇل پرەزيدەنتتىڭ, حالىقتىڭ زور سەنىمىنىڭ كورىنىسى ەكەنىن اتاپ وتتى.
پالاتانىڭ كەشەگى العاشقى وتى­رىسىندا بيىلعى سايلاۋدا قاتارعا جاڭا­دان قوسىلعان سەنات دەپۋتات­تا­رى­نىڭ انت بەرۋ سالتاناتى ۇيىمداستىرىل­دى.
جاڭا سەناتورلار انت قابىلدا­عان­نان كەيىن پالاتا تۇراقتى كوميتەتتەر­دىڭ اتاۋلارىن بەكىتىپ, ولاردىڭ جەتەك­شىلەرى مەن مۇشەلەرىن سايلادى. بىر قىزىعى, جوعارعى پالاتا كو­ميتەت­تەرىنىڭ جارتىسىنىڭ تورا­عالىق تىزگىنى ايەل دەپۋتاتتارعا بۇيىردى.
سونىمەن, سەناتتىڭ كونستيتۋتسييا­لىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنە – گەورگيي كيم, قارجى جانە بيۋدجەت كوميتەتىنە – ولگا پەرەپەچينا, حالىقارالىق قاتىناستار, قورعانىس جانە قاۋىپسىزدىك كوميتەتىنە – داريعا نازارباەۆا, ەكونوميكالىق ساياسات, يننوۆاتسييالىق دامۋ جانە كاسىپكەرلىك كوميتەتىنە – اسقار بەيسەنباەۆ, الەۋمەتتىك-مادەني دامۋ جانە عىلىم كوميتەتىنە – بىرعانىم ايتىموۆا, اگرارلىق ماسەلەلەر, تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنە جەڭىس نۇرعاليەۆ جەتەكشىلىك ەتەتىن بولدى.
جاڭا كونستيتۋتسييالىق وكىلەتتىك­تەرىنە سايكەس, سەناتورلار العاش رەت قازاقستان رەسپۋبليكاسىنداعى ادام قۇقىقتارى جونىندەگى ۋاكىل قىزمەتىنە اسقار شاكىروۆتى قايتا سايلادى. ومبۋدسمەندى سايلاۋ بويىنشا قۇقىق سەناتورلارعا بيىل ەلباسى باستاما­سىمەن جۇزەگە اسقان كونستيتۋتسييالىق رەفورما ارقاسىندا بەرىلىپ وتىر.
ەلدوس سەنباي

بولىسۋ:

پىكىر جازۋ


*