كورمە مەيماندارى 1 ميلليونعا جۋىقتادى

1139
0
بولىسۋ:

EXPو – 2017 حالىقارالىق مامانداندىرىلعان كورمەسىن 920 مىڭنان استام كەلۋشى تاماشالادى. بۇل تۋرالى كەشە كورمەنىڭ 1 ايلىق جۇمىسىن قورىتىندىلاۋعا ارنالعان بريفينگتە «استانا EXPو – 2017» ۇلتتىق كومپانيياسىنىڭ باسقارۋشى ديرەكتورى بەيبىت قارىمساقوۆ مالىمدەدى.
1 ايدىڭ ىشىندە كورمەگە 921 مىڭ 293 ادام كەلگەن. بۇگىن تۇستەن كەيىن ميل­لونىنشى كەلۋشى كىرەدى دەپ كۇتىلۋدە. حالىقارالىق پاۆيلوندارعا كىرىپ-شىعۋ سانى – 5 ملن 960 مىڭ. كەلۋشىلەر كورمەنىڭ نەگىزگى نىساندارىنا 834 مىڭ 579 رەت كىرىپ-شىققان. «نۇر الەم» پاۆيلونىنا كىرىپ-شىعۋ كورسەتكىشى جوعارى – 303 مىڭ 7 رەت.
– كورمە باستالعان ۋاقىتتان باستاپ قوناقتار 160 مىڭنان استام جەڭىل­دەتىلگەن تاريفپەن كىردى. ولار – 6 جاسقا دەيىنگى بالالار, وقۋشىلار, ستۋدەنتتەر, زەينەتكەرلەر جانە مۇگەدەكتەر. 409 مىڭ 700 ادام ەلىمىزدىڭ باسقا وڭىرلەرىنەن ۇيىمداستىرىلعان توپتارمەن كەلدى. ونىڭ ىشىندە 17 مىڭ 700-ى – بالالار. قا­راعاندى, اقمولا, پاۆلودار وبلىس­تارىنىڭ تۇرعىندارى كورمە تاماشا­لاۋشىلارىنىڭ كوشىن باستاپ تۇر, – دەدى بەيبىت قارىمساقوۆ.
كورمەگە 130 مىڭداي شەتەل ازاماتتارى كەلگەن. ولار كەلۋشىلەردىڭ 14 پايىزىن قۇرايدى. اتاپ ايتقاندا, رەسەيدەن – 35 مىڭ 500, گەرمانييادان – 19 مىڭ, قىتايدان – 11 مىڭ 500 ادام كورمەنى تاماشالاعان.
– EXPو وتىپ جاتقان ۋاقىتتا اشىق اسپان رەجيمى بار. ەلىمىزدە 21 اۋە كومپانيياسى 28 حالىقارالىق باعىت بويىنشا جۇمىس ىستەپ جاتىر. استاناعا بىر اپتادا 166 رەيس كەلەدى. بىزدىڭ مالىمەت بويىنشا, قالاداعى قوناق ۇيلەردىڭ 60 پايىزى تولىق. بۇل كورسەتكىش وتكەن جىلمەن سالىستىرعاندا 3 ەسەگە ارتىق. بىر ايدىڭ ىشىندە كورمەدە 1 مىڭ 31 ويىن-ساۋىق جانە ىسكەرلىك شارالار وتتى. سونىمەن قاتار مەملەكەت باسشىلا­رىنىڭ, مينيسترلەردىڭ, حالىقارالىق كوميسسييالاردىڭ قاتىسۋىمەن 84 حات­تامالىق شارا وتتى. 1-10 شىلدە ارالى­عىندا جەڭىلدەتىلگەن 2 اكتسييا بولدى. جالپى, كورمە شتاتتىق رەجىمدە جۇمىس ىستەۋدە. وقىس وقيعالار بولعان ەمەس, – دەدى كومپانييا باسقارۋشى ديرەكتورى.
«استانا ەكسپو – 2017» ۇلتتىق كومپانيياسى كوممەرتسييالاۋ دەپار­تامەنتىنىڭ ديرەكتورى داۋلەت ەركىم­باەۆتىڭ مالىمەتىنشە, كورمەدە 40 مىڭعا جۋىق كادەسىي ساتىلعان.
– قازىرگى ۋاقىتتا بىز 80 ملن تەڭگەدەن استام سوماعا شامامەن 40 مىڭ كادەسىي ساتتىق. بۇل كەلۋشىلەردىڭ كورمەگە قى­زىعۋشىلىعى جوعارى ەكەنىن كورسەتەدى. كورمە اۋماعىندا قوعامدىق تاماقتانۋعا ارنالعان 25 نىسان, 33 كيوسك بار. بىر ايدىڭ ىشىندە ولار 210 مىڭنان استام ادامعا قىزمەت كورسەتتى. بىزدە لوگيس­تيكالىق ورتالىق جۇمىس ىستەيدى. ورتا­لىق ارقىلى كورمەگە كەلەتىن بارلىق جۇك, ونىڭ ىشىندە ازىق-تۇلىك تە جەت­كىزىلەدى. كورمە اۋماعىندا سانيتارلىق قىزمەت كەزەكشىلىك جاسايدى جانە ۆەتەرينارلىق باقىلاۋ جۇرگىزىلەدى, – دەدى داۋلەت ەركىمباەۆ.
دەپارتامەنت ديرەكتورىنىڭ ايتۋىن­شا, كورمەگە 1 ملن 800 مىڭ بيلەت ساتىل­عان.
– 1 شىلدە مەن 10 شىلدە ارالىعىندا بىزدە قوسىمشا اكتسييا وتكىزىلىپ, تاعى بىر جاڭا بيلەت ەنگىزىلگەن ەدى. ول – ساعات 18:30-دان باستاپ كورمە جابىلعانعا دەيىن جارامدى كەشكى بيلەت. بۇل بيلەتتى 25,5 مىڭ ادام ساتىپ العان. ودان بۇ­رىنعى 3+1 اكتسيياسىن 14,5 مىڭ ادام پاي­دالاندى. 17 جاسقا دەيىنگى بالالار دەمالىس كۇندەرى تەگىن كىرە الاتىن جاس­تار تاريفىن 50 مىڭنان استام كامە­لەتتىك جاسقا تولماعاندار قولداندى, – دەدى ول.

 

تاڭشولپان بەگالىقىزى

 

بولىسۋ:

پىكىر جازۋ


*