نۇرسۇلتان نازارباەۆ: ەلوردامىز – بۇكىل ازييانىڭ مارجانى

1449
0
بولىسۋ:

ەسىلدىڭ قوس جاعالاۋىنداعى استانانىڭ ەسكى جانە جاڭا ورتالىعى تۇيىسەر تۇستا ورنالاسقان قازاقستانداعى ەڭ ۇلكەن تۋتۇعىردا كوك بايراقتى جەلبىرەتۋ ارقىلى استانا كۇنىن مەرەكەلەۋ شارالارىن باستاۋ داستۇرگە اينالعانى مالىم. قالىپتاسقان جورالعى بويىنشا ەلباسى نۇرسۇلتان نازارباەۆ وسى «اتامەكەن» ەتنو-مەموريالدى كەشەن الاڭىندا مەملەكەتتىك تۋدى كوتەرۋدىڭ سالتاناتتى راسىمىنە قاتىستى.
بۇل سالتاناتتى ىس-شاراعا پرەزيدەنت اكىمشىلىگىنىڭ وكىلدەرى, پارلامەنت دەپۋ­تاتتارى, ۇكىمەت مۇشەلەرى, مينيسترلەر مەن ۆەدومستۆو باسشىلارى, استانا باس­شىلىعى, قالا تۇرعىندارى مەن قوناق­تارى – بارلىعى 5 مىڭعا جۋىق ادام شا­قى­رىلىپتى.
جۇرتشىلىققا سوز ارناعان پرەزيدەنت اربىر قازاقستاندىق ۇشىن مەملەكەتتىك تۋ ەرەكشە ماڭىزعا يە ەكەنىن ايتىپ, ەلىمىز تاۋەلسىزدىك جىلدارىندا ابىرويلى دامۋ جولىنان وتكەنىنە توقتالدى.
– بىز ەلوردا كۇنى قارساڭىندا مەملە­كەتتىك تۋىمىزدى كوتەرۋ راسىمىن داستۇرلى تۇردە وتكىزىپ كەلەمىز. 25 جىل ىشىندە بىز قازاقستاندى بىر تۋدىڭ استىنا بىرىككەن بىرتۇتاس ۇلت رەتىندە قالىپتاستىرا ال­دىق, – دەدى قازاقستان كوشباسشىسى.
نۇرسۇلتان نازارباەۆ قازاقستاننىڭ جاھاندىق تەحنولوگييالىق دامۋدىڭ الدىڭ­عى شەبىنەن تابىلۋعا ۇمتىلاتىنىن ايتىپ, ەلىمىزدىڭ ەكونوميكا جانە سپورت سالالا­رىنداعى جەتىستىكتەرىنە ەرەكشە توقتالدى.
– قازاقستاننىڭ كوك بايراعى الەمنىڭ كوپتەگەن ىرى ارەنالارىندا ۇلتتىق جەڭى­سىمىزدىڭ سالتاناتىندا جەلبىرەيدى. بىز ەلىمىزگە دەگەن شىنايى قۋانىش پەن ماق­تانىش سەزىمىنە تولى ساتتەرگە الماتىدا وت­كەن قىسقى ۋنيۆەرسيادا ويىندارى بارىسىندا كۋا بولدىق. اسپان تۇستەس كوك تۋى­مىزدىڭ استىندا قازاقستان بۇكىل الەم­­گە تانىلدى, – دەدى مەملەكەت باس­شىسى.
ەلباسى قازاقستاننىڭ جاھاندىق ۇدەرىستەرگە بەلسەندى اتسالىسىپ وتىر­عا­نىنا نازار اۋدارىپ, ەلىمىز حالىقارالىق ارەنادا بىتىمگەرشىلىك قىزمەتتى جالعاس­تىرا بەرەتىنىن ايتتى.
نۇرسۇلتان نازارباەۆ بىرلىك ەلىمىزدىڭ ودان ارى دامۋىنىڭ جانە الدىمىزعا قوي­عان بارلىق مىندەتتەر مەن باعدارلا­مالار­دى ىسكە اسىرۋدىڭ نەگىزى ەكەنىن اتاپ وتتى.
سونىمەن قاتار ەلباسى استانانىڭ تاۋەلسىز قازاقستان تاريحىنداعى رولى مەن مانىنىڭ جوعارى ەكەنىن ايتتى.
وسى ورايدا پرەزيدەنت قازاقستان­دىق­تاردى كەلە جاتقان مەرەكەمەن – استا­نانىڭ 19 جاسقا تولۋىمەن قۇتتىق­تادى.
– استانا – مۇمكىندىكتەرىمىزدىڭ, حال­قى­مىزدىڭ ۇلىلىعى مەن اۋىزبىرشىلىگىنىڭ نىشانى. ەلوردامىز – ورتالىق ازييانىڭ, بۇكىل ازييا قۇرلىعىنىڭ مار­جانى. بىز باس قالامىزدى سۇيەمىز, ال قوناقتارىمىز وعان تاڭىرقاي قارايدى. استانا كۇنى – بارشا قازاقستاندىقتارعا ورتاق مەرەكە. بىز – باقىتتى ۇرپاقپىز! سەبەبى, اتا-بابالارىمىز كورگەن سۇراپىل سوعىستار مەن اشارشىلىقتار زارداپتارى مەن قيىندىقتارىن باستان وتكەرگەن جوق­پىز. بۇگىنگى ۇرپاق اتا-بابا­لارى­مىزدىڭ, اعا بۋىننىڭ ارقاسىندا وسى كۇنگە جەتىپ وتىر. بىزدىڭ ەندىگى ماقساتى­مىز – بىرلىك پەن بەرەكەنى ساقتاۋ. بىز الەمدەگى باسەكە­لەستىككە توتەپ بەرىپ, تەك جەڭىسكە جەتۋىمىز كەرەك. سوندا العا قويعان بيىك مۇرات-ماق­ساتتارعا جەتىپ, قابىلداعان ستراتەگييالىق باعدارلاما­لاردى ىسكە اسىرا الامىز, – دەدى قازاق­ستان كوشباسشىسى.
جىل سايىن استانا كۇنى مەرەكەسى قار­ساڭىندا, مەملەكەتتىك تۋدى بيىك تۇعىرىنا قوندىرۋ راسىمى اياسىندا وتان شەبىن قور­عاۋعا كىرىسكەن ۇلانداردىڭ ۇزدىكتەرىنە العاشقى اسكەري شەندەرىن تابىس ەتۋ دە داستۇرگە ەنگەن. قازاقتىڭ كوك تۋىن سا­رىار­قانىڭ سامالىنا تەر­بەلتىپ, وسى الىپ تۋتۇعىرعا كوتەرۋ راسىمى العاش رەت 2009 جىلى وتكىزىلگەن ەكەن. سول كەزدەن بەرى 108 تۇلەككە اسكەري شەن تاپسىرىلىپتى. قۇ­زىر­لى ورگانداردىڭ دەرەگىنشە, ول ازا­ماتتار قازىرگى ۋاقىتتا ەلدىڭ ار وڭىرىندە پوليتسييا قۇرىلىمدارى مەن اسكەري بەكىنىس­تەردە وزدەرىنىڭ اسكەري قىزمەتتەرىن اتقارۋدا.
بيىلعى سالتاناتتى راسىم بارىسىندا مەملەكەت باسشىسى – قازاقستان قارۋلى كۇشتەرىنىڭ جوعارعى باس قولباسشىسى نۇرسۇلتان نازارباەۆ ەلىمىزدىڭ جوعارى اسكەري وقۋ ورىندارىنىڭ 12 تاڭداۋلى تۇ­لەگىنە وز قولىمەن العاشقى وفيتسەر شە­نىن تاپسىردى. ولار قورعانىس مي­نيسترلىگىنە قاراستى قۇرلىق اسكەرلەرى اسكەري ينستي­تۋتىن, قورعانىس مينيستر­لىگىنىڭ راديو­ەلەكترونيكا جانە بايلانىس اسكەري-ينجە­نەرلىك ينستيتۋتىن, ۇلتتىق قاۋىپ­سىزدىك كوميتەتىنىڭ شەكارا اكادە­ميياسىن, ىشكى ىستەر مينيسترلىگى اكادە­ميياسىن, ىشكى ىستەر مينيسترلىگىنىڭ ۇلت­تىق ۇلان اسكەري ينستيتۋتىن, ىشكى ىستەر مينيسترلىگىنىڭ كوكشەتاۋ تەحنيكالىق ينستيتۋتىن بىتىرىپ وتىر.
«جوعارعى باس قولباسشى مىرزا! ەلدىگىمىزدىڭ ايبىنى – ەلوردامىز استانا كۇنىندە سىزدىڭ قولىڭىزدان وسىناۋ اسكەري شەندى سالتاناتتى تۇردە الۋ مەن ۇشىن ۇلكەن قۋانىش. وفيتسەر جۇلدىز­شاسى بىزگە ۇلتتىق قاۋىپسىزدىكتى ساقتاۋ, ازاماتتاردىڭ جانە ولاردىڭ وتباسىلا­رىنىڭ تىنىش­تىعىن قورعاۋ, قازاقستان وفيتسەرىنىڭ مارتەبەسىن بيىكتەتە تۇسۋ بويىنشا ۇلكەن جاۋاپكەرشىلىك جۇكتەيدى. وسى جولدا تاۋەل­سىز وتانىمىزعا, قازاق­ستان حالقى مەن ونىڭ پرەزيدەنتىنە ادال قىزمەت ەتۋگە انت ەتەمىن!» دەدى جاس شەكارا­شىلار اتىنان ۇلتتىق قاۋىپسىزدىك كوميتەتى شەكارا قىزمەتى اكادەميياسىنىڭ تۇلەگى, لەيتەنانت مادييار دوبەكوۆ.
وسى سالتاناتتى راسىمنەن كەيىن قا­زاق­ستان پرەزيدەنتى تەك اسكەري عانا ەمەس, ەلىمىزدەگى بارلىق جوعارى وقۋ ورىننىڭ تۇلەكتەرىنە قايىرىلىپ, «وتانىمىزعا قىزمەت ەتۋ جانە قازىرگى الەمدەگى ۇدەرىس­تەر جاعدايىندا ۇلتىمىزدىڭ مۇددەسىن قورعاۋ» پارىزىن ولاردىڭ قاپەرىنە سالدى.
– بارلىق وقۋ ورىننىڭ تۇلەكتەرىنە تىلەيتىنىم – اق جول! بىز, اعا ۇرپاق, مەم­لەكەتتى قۇردىق, ونى بۇكىل دۇنيەجۇزىنە پاش ەتتىك. سىزدەر ەندى تاۋەلسىزدىكتى كوزدىڭ قاراشىعىنداي ساقتاپ, كوك تۋى­مىزدى تورتكۇل دۇنيەنىڭ ار بۇرىشىندا جەل­بىرەتەتىن بولىڭىزدار! – دەدى ن.نازارباەۆ.
ەلباسى اسكەري جوعارى وقۋ ورىن­دا­رىن بىتىرگەن كۋرسانتتاردان ەندى وفي­تسەرلىك مىندەتتى مۇلتىكسىز ورىنداۋ تالاپ ەتىلەتىنىن نىقتادى.
سوزىن تۇيىندەي كەلە, قازاقستان پرە­زيدەنتى تۇلەكتەرگە اسكەردە, قۇقىق قورعاۋ ورگاندارىندا, باسقا دا مەملەكەتتىك قۇرى­لىمداردا جۇمىس جاساۋ بارىسىندا تابىس­قا جەتۋىنە, ابىروي مەن باقىتتىڭ ەڭ بيىك شىڭىنا كوتەرىلۋگە تىلەكتەستىك بىلدىردى.
سوڭىندا پرەزيدەنت تۋ كوتەرۋ راسى­مىنەن كەيىن ەلوردا كۇنى قۇر­مە­تىنە ار­نالعان مەرەكەلىك ىس-شارالار­دىڭ باس­تالاتىنىن ايتىپ, بارشا جۇرتتى كەلە جاتقان مەيراممەن قۇتتىقتادى.

 

ايحان شارىپ

 

بولىسۋ:

پىكىر جازۋ


*