Нұрсұлтан НАЗАРБАЕВ: Еліміздің сыртқы саясаты толық қалыптасты

Ақордада Н.Назарбаев Қазақстанда тіркелген дипломатиялық миссиялар және халықаралық ұйымдар өкілдіктерінің басшыларымен кездесті. Мемлекет басшысы биыл еліміздің сыртқы саясат саласы үшін мерейлі меже болып саналатынын, осыдан 25 жыл бұрын Қазақстанның дипломатиялық қызметін құру туралы Жарлыққа қол қойылғанын атап өтті.
– Тәуелсіздіктің алғашқы жылдарында біздің басқа мемлекеттермен өзара іс-қи­мыл жасау жөніндегі тәжірибеміз де, өзіміздің дипломатиялық қызметіміз де болған жоқ. Дипломатиялық кадрлардың тапшылығы ерекше байқалды, – деді Қазақстан Президенті.
Нұрсұлтан Назарбаев бұл проблемалар республикадағы күрделі әлеуметтік-эко­номикалық жағдаймен тұспа-тұс келгенін айтты.
– Қысқа уақыт ішінде дипломатиялық корпус құрып, өз елшілерімізді шет елдерге жіберуге мүмкіндік алдық. Міне, ширек ғасырдан кейін еліміздің сыртқы саясаты толық қалыптасты деп айта аламын, – деді Мемлекет басшысы.
Сонымен қатар Қазақстан Президенті егемендігіміздің алғашқы жылдарында елімізде аумақтық тұтастығымыз бен ұлттық тәуелсіздігімізді сақтап, қауіп­сіздігіміздің берік кепілін қалыптастыра алғанымызды атап өтті.
Өз сөзінде Қазақстан көшбасшысы «Астана процесі» аясындағы алдағы ке­зекті келіссөздердің тиімділік әкелеті­нінен үміт білдірді.
– Біз ары қарай да Сирия бойынша халықаралық кездесулер өткізу үшін алаң ұсынуға дайынбыз. Астана алаңы өзінің тиімділігін дәлелдеді. Сирияның ресми үкіметі мен қарулы оппозициясы өз көз­қарастары мен ұсыныстарын бір-біріне жеткізе алды. Ең бастысы – келіссөздер жүргізіп, нақты қадамдар бойынша келісу. Соның нәтижесінде алғаш рет әскери ұрыс қимылдары тоқтатылды. Астанада 4-5 шілдеге белгіленген кезекті кездесулер де алдыңғылары секілді тиімді болады деген үміттеміз! – деді Елбасы.
Сонымен бірге, өз сөзінде Қазақстан Президенті 2014 жылдан бері бір-бірімен қырғи-қабақ қатынасқа көшкен Ресей мен Украинаны келіссөздер үстеліне отыруға шақырды.
– Украинаның оңтүстік-шығысын­дағы оқиғалар әрдайым жақын бауырлас ел­­дер – Ресей мен Украина халықтары ара­сында күрт егестің тууына және конструк­тивті емес, әрі жариялы айтыс-тартысқа соқтыр­ды. Бұл жайт осы халық­тардың барлық дос­тарында, әсіресе, менде үлкен қын­жылыс туғызады. Біз барлық тараптар­ды туындаған мәселелер­ді күн тәртібінен түсіру үшін салмақты диалогты бастауға шақырамыз. Кез келген қақтығыстар, тіпті дүниежүзілік соғыстар да келіссөз үстелінде аяқталады. Екі елді де осыған үндей­мін! – деді Нұрсұлтан Назарбаев.
Ол Қазақстанның осы келіссөз проце­сіне де барлық күшімен көмектесуге даяр екенін мәлімдеді: «Біз қазірдің өзінде осы процестеміз. Мен G20 кездесуі кезінде АҚШ пен Ресей президенттерінің кез­де­суіне үлкен сенім артамын. Соның бары­сында ойлар тоғысатын ортақ тұстар табылып, нығайтылуы керек. Бұл бейбіт­шілік үшін қажет, ортақ қауіп – тер­роризммен бірлесе күресуіміз үшін керек» деді Елбасы.
Нұрсұлтан Назарбаев заманауи қазақ­стан­дық дипломатия байырғы ата-баба­ларымыздың дәстүрлі жолын жалғас­тырып отырғанын шетелдік елші мыр­залар есіне салды. «Ұлы Дала өз мүдделерін қорғау және ілгерілету үшін әрдайым диплома­тиялық құралдар мен тәсілдерді пайда­ланған. Қа­зіргі заманғы отандық дипло­матия да осы тарихи дәстүрлерді жал­­ғас­­ты­руда. Тәуел­сіздік жылдарында Қа­зақстан өзінің таяудағы барлық көр­шілерімен, сондай-ақ біздің елімізбен ынтымақтастыққа мүдделі барлық мемле­кеттермен достық және конструктивті қатынастар орнатты» деді Мемлекет бас­шысы.
Ақордадағы осы кездесуде Өскемен­дегі ядролық отын банкінің алдағы тамыз айының соңында ресми түрде ашылатыны мәлім болды. 29 тамыз – Ядролық сынақтарға қарсы күрестің халықаралық күнінде Астанада ядролық қарусыздану бойынша ғалымдардың Пагуош қозғалы­сының 60 жылдығына арналған ме­рей­тойлық сессиясы өтеді деп жоспар­лануда. Елбасы сол күні Қазақстан аумағындағы МАГАТЭ-нің тарихтағы тұңғыш «Төмен­байытылған уран банкі­нің» ашылу салта­наты өтетінін хабарлады. 29 тамызда сондай-ақ Қазақстан бекіткен, ядролық қарусыздануға қосқан үлес үшін берілетін тұңғыш сыйлықты тапсырудың да салта­наты өтеді деп күтілуде.

Айхан ШӘРІП