پوليتسيياعا سەنىم ەرەكشە ماڭىزعا يە

1647
0
بولىسۋ:

مەملەكەت باسشىسى قازاقستان رەسپۋبليكاسى ىشكى ىستەر ورگاندارىنىڭ قۇرىلعانىنا 25 جىل تولۋىنا جانە پوليتسييا كۇنىنە وراي وسى سالانىڭ قىزمەتكەرلەرىمەن كەزدەستى.

ەلباسى جيىنعا قاتىسۋشىلاردى ايتۋلى كۇنمەن قۇتتىقتاپ, دال وسى كۇنى شيرەك عاسىر بۇرىن قازاقستان رەسپۋبليكاسى ىشكى ىستەر ورگاندارىنىڭ قۇرىلعانىن اتاپ وتتى.
– بۇل تاۋەلسىزدىگىمىزدىڭ باستاپقى كەزەڭىنىڭ ايتۋلى قادامى بولدى. ىشكى ىستەر ورگاندارىنىڭ قالىپتاسۋ تاريحى مەملەكەتىمىزدىڭ دامۋ تاريحىمەن تىعىز بايلانىستى, – دەدى نۇرسۇلتان نازارباەۆ.
مەملەكەت باسشىسى قازاقستان پوليتسيياسىندا جانكەشتىلىك پەن ەرلىك ۇلگىلەرىن كورسەتكەندەر از ەمەس ەكەنىن ايتتى.
– ولار قىلمىسپەن كۇرەستە الدىڭ­عىلاردىڭ قاتارىنان تابىلىپ, ازا­ماتتاردىڭ قۇقىقتارى مەن بوستان­دىقتارىن بىرىنشى بولىپ قورعايدى. سوڭعى جىلدارى قىزمەتتەرىڭىزدىڭ ناتيجەلەرى ايقىن كورىنۋدە. بىلتىرعى جىلمەن سالىستىرعاندا قىلمىس جاساۋ 15 پايىزدان اسا ازايعان. اۋىر جانە اسا اۋىر قىلمىستاردى اشۋ كورسەتكىشى 72 پايىزعا جەتتى. قالا مەن اۋىل كوشە­لەرىندەگى تۇرعىنداردىڭ قاۋىپسىزدىك دەڭگەيى ايتارلىقتاي ارتتى. وندا قىلمىس جاساۋ 14 پايىزدان اسا ازايدى, – دەدى قازاقستان پرەزيدەنتى.
سونىمەن قاتار ەلباسى جاھاندىق تۇراقسىزدىق جاعدايىندا بيلىك وكىلدە­رى – پوليتسيياعا دەگەن سەنىم ەرەكشە ماڭىزعا يە بولىپ وتىرعانىنا نازار اۋداردى.
– سىزدەر قىزمەتتىك پارىزدى مۇلتىكسىز اتقارعاندا عانا قوعام مەن مەملەكەتتىڭ جاڭعىرۋى جۇزەگە اسادى. سوندىقتان بىز قازىر قابىلدانعان باعدارلامالاردىڭ اياسىندا قۇرىلىمداردى قايتا قۇرۋ جونىندە جۇمىستار جۇرگىزىپ جاتىرمىز. سونىڭ ناتيجەسىندە, جەرگىلىكتى پوليتسييا قىزمەتى قۇرىلدى. زاڭدىلىقتىڭ, ازاماتتاردىڭ قۇقىقتارى مەن بوستان­دىقتارىنىڭ ساقتالۋىن قاتاڭ باقىلاۋعا الۋ قاجەت. بۇل – ەلىمىزدىڭ ورنىقتى ارى تۇراقتى دامۋىنىڭ باستى فاكتورىنىڭ بىرى. سونداي-اق زاماناۋي تۇرعىدا تيىمدى پوليتسييا قىزمەتى, مەملەكەت پەن حالىق­تىڭ باسەكەگە قابىلەتتىلىگىن ارتتىرۋعا سەپتىگىن تيىگىزەدى, – دەپ تۇيىندەدى نۇرسۇلتان نازارباەۆ.
بۇدان بولەك مەملەكەت باسشىسى جوعارىدا كورسەتىلگەن ستراتەگييالىق مىندەتتەردىڭ ىسكە اسىرىلۋىن قامتاماسىز ەتۋ ۇشىن 2017 جىلعى 1 شىلدەدەن باستاپ, ىشكى ىستەر ورگاندارى قىزمەتكەرلەرىنىڭ ەڭبەكاقىسىن 25 پايىزعا وسىرۋ جونىندە شەشىم قابىلدانعانىن ايتتى.
– جۇرت سىزدەرگە قاراپ مەملەكەتتىك بيلىك تۋرالى پىكىر قالىپتاستىرادى. سول سەبەپتى, پوليتسييا قىزمەتكەرى بارشاعا ۇلگى بولۋى تيىس. قازاقستان پوليتسەيلەرى الداعى ۋاقىتتا دا بار كۇشىن, تاجىريبەسى مەن قۋاتىن ابىرويلى پارىزدى ساتتى ورىنداۋعا جۇمسايتىنىنا سەنىمدىمىن, – دەدى قازاقستان پرەزيدەنتى.
نۇرسۇلتان نازارباەۆ كەزدەسۋدە ىشكى ىستەر مينيسترلىگى ارنايى ماقساتتاعى بولىمشەسىنىڭ ينسپەكتورى ب.دۇيسەنوۆتى ى دارەجەلى «ايبىن» وردەنىمەن, پاۆلودار وبلىسى ىشكى ىستەر دەپارتامەنتىنىڭ شارباقتى اۋداندىق ىشكى ىستەر بولىمىنىڭ باستىعى ج.مۇقاتوۆتى ىى دارەجەلى «ايبىن» وردەنىمەن, وڭتۇستىك قازاقستان وبلىسى ىشكى ىستەر دەپارتامەنتىنىڭ ورداباسى اۋداندىق ىشكى ىستەر بولىمىنىڭ باستىعى ق.ساحوۆتى ىى دارەجەلى «ايبىن» وردەنىمەن, استانا قالاسى ىشكى ىستەر دەپارتامەنتىنىڭ تەرگەۋ باسقارماسىنىڭ اسا ماڭىزدى ىستەر جونىندەگى اعا تەرگەۋشىسى ۆ.شۋتكونى ىى دارەجەلى «ايبىن» وردەنىمەن, ىشكى ىستەر مينيسترلىگى قىلمىستىق-اتقارۋ جۇيەسى كوميتەتىنىڭ اسا ماڭىزدى ىستەر جونىندەگى اعا ۋاكىلى ا.عاليەۆتى «ەرلىگى ۇشىن» مەدالىمەن, الماتى وبلىسى ىشكى ىستەر دەپارتامەنتىنىڭ جەدەل-كريميناليستىك باسقارماسىنىڭ باستىعى ل.كيمدى «ەرلىگى ۇشىن» مەدالىمەن ماراپاتتادى.
قازاقستان رەسپۋبليكاسىنىڭ قۇرمەت گراموتاسىمەن اقتوبە قالاسى ىشكى ىستەر باسقارماسىنىڭ ۋچاسكەلىك پوليتسييا ينسپەكتورى س.بالتامبەكوۆا, اقتاۋ قالاسى ىشكى ىستەر باسقارماسىنىڭ ۋچاس­كەلىك پوليتسييا ينسپەكتورى ە.جولداسوۆ جانە قاراعاندى قالاسى ىشكى ىستەر باسقارماسى ارناۋلى مەكەمەسىنىڭ پوليتسەيى ن.رەدچەنكو ماراپاتتالدى.
سوڭىندا قازاقستان پرەزيدەنتى كەزدەسۋگە قاتىسۋشىلارعا العىس ايتىپ, زور دەنساۋلىق, باق-بەرەكە جانە جاۋاپتى قىزمەتتەرىنە ساتتىلىك تىلەدى.

بولىسۋ:

پىكىر جازۋ


*