Конституциялық заң жобалары қаралды

Спикер Қасым-Жомарт Тоқаевтың төрағалығымен Сенаттың жалпы отырысы өтті.
Отырыс барысында сенаторлар Қазақ­стан мен Өзбекстан арасындағы мем­ле­кеттiк шекара арқылы өткiзу пункттерi туралы үкіметаралық келiсiмге өзгерістер мен толықтырулар енгізетін хаттаманы ратификациялады. Онда еліміздің «Бейнеу» стансасындағы теміржол өткізу бекетін «Оазис» стансасына ауыстыру көзделіп отыр. Сондай-ақ «Қапланбек», «Қазығұрт» және «Атамекен» автомобиль өткізу бе­кеттеріне халықаралық (көпжақты) мәр­тебе беріліп, тәулік бойы жұмыс істейтін тәртіпке көшеді. Одан басқа, тек жеңіл автокөліктерге арналған «Целинный» және «Сырдария» екіжақты (мемлекетаралық) өткізу бекеттері ашылады. Бұл бекеттерден жүк пен коммерциялық мақсаттағы тауар өткізілмейді және кедендік рәсімдер аясындағы тауарға байланысты кедендік операциялар жүзеге асырылмайды.
Осы жиындарда сенаторлар биыл Ата заңға енгізілген өзгерістерді заңнамалық қолдауға бағытталған заң жобалар топта­масын қарады. Мысалы, «Кейбір заңна­малық актілерге мемлекеттік биліктің тар­мақтары арасында өкілдіктерді қайта бөлу мәселелері бойынша өзгерістер мен то­лықтырулар енгізу туралы» заң жобасы екі оқылымда қаралып қабылданды. Әділет министрі Марат Бекетаевтың түсін­ді­руін­ше, заң жобасы Президенттің экономи­калық үдерістерді реттеу саласындағы және ұйымдастырушылық сипаттағы, сондай-ақ әлеуметтік маңызы бар кейбір өкілеттік­терін Үкіметке береді.
Сенат отырысы барысында сенатор Қ.Айтахановтың көпбалалы аналарға мін­детті медициналық сақтандыру жарна­ларын мемлекеттің өз мойнына алуы қа­жеттігі туралы депутаттық сауалы тың­далды.

Елдос СЕНБАЙ