جالىندا, جاسا, «جايدارمان!»

1695
0
بولىسۋ:

استانا كونتسەرت زالىندا سان جاناردى جاۋلاعان «جايدارمان» ويىندارى وتتى. بۇل جولعىسى كۇندەگىدەن وزگەرەك, جىلداعىدان باسقاراق. بيىل كوڭىلدى ارى تاپقىر جاستاردىڭ باسىن قوسقان باعدارلاماعا بىر مۇشەل تولىپ وتىر. ويىننىڭ مەنشىكتى مەرەكەسى قارساڭىندا ۇيىمداستىرىلاتىن «تۋعان كۇن» جوباسى بيىل دا جالعاسىن تاپتى.

«جايدارمان» ويىندارى العاش رەت 2005 جىلدىڭ 29 ماۋسىمدا كورەرمەندەرگە جول تارتقان ەدى. سودان بەرى تۇرلى كەزەڭدى باستان وتكەرە كەلە بۇگىندە ەر جەتىپ, ساپ تۇزەگەن جىگىتتەي العاشقى مۇشەلىنە دە كەلىپ جەتتى. تۋعان كۇن كەشىن استانا كۇنى قارسا­ڭىندا اتاپ وتۋ – العاشقى جىلدان بەرگى داستۇر رەتىندە قالىپتاستى. «تۋعان كۇنىڭمەن, استانا!», «تۋعان كۇنىڭمەن, جايدارمان!» دەسىپ, كەلەسى جىلعا امان جەتكەنشە قوشتاسۋ دا جوبانىڭ ومىرشەڭدىگىن, كورەرمەنىمەن قاۋىشۋعا دەگەن ىستىق ىقىلاسىن كورسەتسە كەرەك.
ويىن الدىندا دىن ىستەرى جانە ازاماتتىق قوعام مينيسترى نۇرلان ەرمەكباەۆ سوز سويلەپ, جايدارمان­شىلارعا ساتتىلىك تىلەدى. «بۇل – جاي عانا سايىس ەمەس, جاستارمەن بايلا­نىستىراتىن, ولاردىڭ وي-پىكىرىن, مۇڭ-مۇقتاجىن دا بىلۋگە بولاتىن الاڭ» دەدى ول. مينيستر ويىندى تاما­شالاپ قانا قويماي, ادىلقازى رەتىندە قاتىسۋشىلارعا باعا بەردى. سونىمەن بىرگە, قازىلار القاسى قۇرامىندا ما­جىلىس دەپۋتاتى باقتييار ماكەن, بەل­گىلى تەلەجۇرگىزۋشى بەرىك ۋالي, قوعام قايراتكەرى مۇرات ابەنوۆ, تەاتر جانە كينو اكتەرى ادىل احمەتوۆ بولدى.
كورەرمەنى ساعىنعان, كورەرمەنىن ساعىنعان جايدارمانشىلار بۇل مەرە­كەنى اسىعا كۇتەدى. ويتكەنى بۇل – ساعى­نىشتى باساتىن, تىنىسىڭدى اشاتىن كۇن. قاناتىڭدى كەڭ سەرپىپ, كوسىلىپ ساحناعا شىعاتىن كۇن. بيىلعى تۋعان كۇن تويىندا ەلىمىزدىڭ ەڭ تانىمال جايدارمانشىلارى باس قوسىپ, «اعالار» مەن «ىنىلەردىڭ» تارتىستى ويىنىن كورسەتتى. الدىڭعى بۋىن اعا­لار ىشىندە ارداگەر جايدار­مان­شىلار بولسا, سوڭىنان ەرگەن قارالارى رەتىن­دە بيىلعى ماۋسىمدا ونەر كورسەتىپ جۇر­گەن جاستار قاتىستى. تاعى بىر اي­تار­­لىقتاي ەرەكشەلىك – ۋاقىت پەن تا­قىرىپ جاعىنان ەش شەكتەۋ بول­مادى. سوعان بايلانىستى تۇرلى تىڭ تاقىرىپتار قوزعالىپ, سانانى سەر­پىلتتى.
«سالەمدەسۋ» جانە كورىنىس كورسەتۋ بارىسىندا جاستاردىڭ بابىندا ەكەندىگى بايقالدى. ۇلكەندەر بولسا, تاجىريبەنىڭ ارقاسىندا «سۇراق-جاۋاپتا» باسىپ وزدى. دەگەنمەن ويىن ناتيجەسىندە قوس كوماندانىڭ ۇپايى تەڭ بولىپ, ۇلكەن كۋبوك ەسەن ەلەۋكەننىڭ ۇسىنىسىمەن «اعالار» قۇراماسىنا تابىستالدى. «ۇزدىك ويىنشى» اتالىمىن جەتىسايلىق جاس جايدارمانشى مارات سارسەنباەۆ يەلەندى.
بۇل جوبانىڭ ماقساتى – ارزان ازىلدى ازايتۋ, جاستاردىڭ تانىم كوك­جيەگىن كەڭەيتۋ. بۇگىندە «جاي­دارمان» حالىقتىق جوباعا اينالىپ ۇلگەردى. الىس-جاقىن شەتەلدە دە ويىنشى­لارىمىزدىڭ ونەر كورسەتىپ جۇرگەنىنە كۋامىز. ەندەشە, ون ۇش جىلدىڭ ىشىندە بوي تۇزەپ ۇلگەرگەن «جايدارماندى» بىز دە تۋعان كۇنىمەن قۇتتىقتايمىز!

جادىرا اققايىر

 

بولىسۋ:

پىكىر جازۋ


*