العاشقى كۇن, العاشقى سىناق

1259
0
بولىسۋ:

كەشە ەلىمىزدە ۇلتتىق بىرىڭعاي تەستىلەۋ سىناعى باستالدى.
20 ماۋسىمدا باستالىپ, 1 شىلدەدە قورىتىندىلاناتىن تەستىلەۋ مەرزىمى جاڭا فورماتتا وتكىزىلىپ وتىر. سون­دىقتان دا بۇل تەستىلەۋ بۇرىنعى تەستىلەۋدەن وزگەرەك بولاتىن تۇرى بار.
بىلىم جانە عىلىم مينيسترلىگىنىڭ ما­لىمەتىنە قاراعاندا, بيىلعى ۇبت 165 پۋنكت­تە وتكىزىلەدى. بىرىڭعاي تەستىلەۋگە قاتىسۋعا مەكتەپ بىتىرۋشى 131 377 تۇلەكتىڭ 92827-سى وتىنىش بىلدىرگەن.
جاڭا فورمات بويىنشا, ۇبت بەس پان بويىنشا وتەتىنى بەلگىلى. تۇلەكتەر قازاق­ستان تاريحى, ماتەماتيكالىق ساۋاتتىلىق, وقۋ ساۋاتتىلىعى جانە تاڭداعان مامان­دىعىنا سايكەس ەكى بەيىندى پاننەن سىناق تاپسىرادى.
ۇلتتىق بىرىڭعاي تەست تاپسىرۋعا نيەتتى تۇلەكتەردىڭ قاتارىندا 69209-ى – قازاق تىلىندە, 23 618 تۇلەك ورىس تىلىندە باق سى­ناماق. مەكتەپ بىتىرۋشىلەر 165 پۋنكتتە سىناق تاپسىرادى دەدىك, ۇبت وتكىزىلەتىن ار­بىر اۋديتورييا بايلانىس سيگنالدارىن بوگەيتىن قۇرىلعىلارمەن, مەتالل دەتەكتور­لارىمەن, ۇبت بارىسىن باقىلاۋ جانە جازۋ كامەرالارىمەن, سونداي-اق ينتەرنەت ارقىلى ونلاين تاراتۋ كامەرالارىمەن جابدىقتالعان.
اتا-انالار ۇشىن دە ارنايى جاعداي جاسالعان. 108 پۋنكتتەگى ۇبت بارىسى مو­ني­تورعا شىعارىلىپ, كورسەتىلىپ وتىرادى. مينيسترلىك وكىلدەرى ارنايى مەديتسينا قىزمەتكەرلەرىنىڭ دە ساقاداي ساي تۇر­عاندىعىن ايتادى. ۇبت وتكىزىلەتىن ورىن­داردى قاداعالاۋ ۇشىن مينيسترلىك ارنايى جوعارى وقۋ ورىندارى مەن كوللەدجدەردىڭ وقىتۋشىلارىن دا باقىلاۋشى رەتىندە جىبەرىپ وتىر.
وڭىرلەردە ۇيىمداستىرۋ ماسەلەلەرىن شەشۋ ماقساتىندا ارنايى كوميسسييالار دا قۇرىلعان. كوميسسييا قۇرامىنا جەرگىلىكتى جوعارى وقۋ ورىندارىنىڭ بىلىم بولىمدەرى, اكىمدىكتەر, قۇقىق قورعاۋ ورگاندارى, قوعامدىق ۇيىمدار مەن باق وكىلدەرى ەنىپ وتىر. ارنايى اپپەللياتسييالىق ارىزداردى قاداعالايتىن كوميسسييا دا جۇمىس ىستەۋدى باستاپ كەتتى. ولار تەحنيكالىق اقاۋلارعا بايلانىستى قاتەلىكتەر ورىن السا, اپەل­لياتسييالىق كوميسسيياعا شاعىم بەرۋگە مۇم­كىندىگى بار. كوميسسييا شاعىمدى بىر كۇن ىشىندە قاراپ شىعۋعا مىندەتتى.
جاڭا فورماتتىڭ تۇلەككە بەرەر پاي­داسى مول ەكەندىگىن ايتۋشىلار دا كوپ. تاعى بىر ەرەكشەلىك, سىناق تەستىلەۋمەن قاتار, ونلاين-تەستىلەۋدەن وتۋ مۇمكىندىگى اشىلعانىن ايتا كەتۋىمىز كەرەك. ماۋسىم ايىنان باستاپ بۇل قىزمەت بويىنشا اقى تولەۋ ينتەرنەت-بانكينگ ارقىلى جۇزەگە اسىرىلدى. بۇعان كەز كەلگەن بانك كارتاسى جارامدى, ارى كوميسسييالىق پايىز ۇستال­مايدى.

 

گۇلزينا بەكتاس

 

بولىسۋ:

پىكىر جازۋ


*