АЛҒАШҚЫ КҮН, АЛҒАШҚЫ СЫНАҚ

1240
0
Бөлісу:

Кеше елімізде Ұлттық бірыңғай тестілеу сынағы басталды.
20 маусымда басталып, 1 шілдеде қорытындыланатын тестілеу мерзімі жаңа форматта өткізіліп отыр. Сон­дықтан да бұл тестілеу бұрынғы тестілеуден өзгерек болатын түрі бар.
Білім және ғылым министрлігінің мә­ліметіне қарағанда, биылғы ҰБТ 165 пункт­те өткізіледі. Бірыңғай тестілеуге қатысуға мектеп бітіруші 131 377 түлектің 92827-сі өтініш білдірген.
Жаңа формат бойынша, ҰБТ бес пән бойынша өтетіні белгілі. Түлектер Қазақ­стан тарихы, математикалық сауаттылық, оқу сауаттылығы және таңдаған маман­дығына сәйкес екі бейінді пәннен сынақ тапсырады.
Ұлттық бірыңғай тест тапсыруға ниетті түлектердің қатарында 69209-ы – қазақ тілінде, 23 618 түлек орыс тілінде бақ сы­намақ. Мектеп бітірушілер 165 пунктте сынақ тапсырады дедік, ҰБТ өткізілетін әр­бір аудитория байланыс сигналдарын бөгейтін құрылғылармен, металл детектор­ларымен, ҰБТ барысын бақылау және жазу камераларымен, сондай-ақ интернет арқылы онлайн тарату камераларымен жабдықталған.
Ата-аналар үшін де арнайы жағдай жасалған. 108 пункттегі ҰБТ барысы мо­ни­торға шығарылып, көрсетіліп отырады. Министрлік өкілдері арнайы медицина қызметкерлерінің де сақадай сай тұр­ғандығын айтады. ҰБТ өткізілетін орын­дарды қадағалау үшін министрлік арнайы жоғары оқу орындары мен колледждердің оқытушыларын да бақылаушы ретінде жіберіп отыр.
Өңірлерде ұйымдастыру мәселелерін шешу мақсатында арнайы комиссиялар да құрылған. Комиссия құрамына жергілікті жоғары оқу орындарының білім бөлімдері, әкімдіктер, құқық қорғау органдары, қоғамдық ұйымдар мен БАҚ өкілдері еніп отыр. Арнайы аппелляциялық арыздарды қадағалайтын комиссия да жұмыс істеуді бастап кетті. Олар техникалық ақауларға байланысты қателіктер орын алса, апел­ляциялық комиссияға шағым беруге мүм­кіндігі бар. Комиссия шағымды бір күн ішінде қарап шығуға міндетті.
Жаңа форматтың түлекке берер пай­дасы мол екендігін айтушылар да көп. Тағы бір ерекшелік, сынақ тестілеумен қатар, онлайн-тестілеуден өту мүмкіндігі ашылғанын айта кетуіміз керек. Маусым айынан бастап бұл қызмет бойынша ақы төлеу интернет-банкинг арқылы жүзеге асырылды. Бұған кез келген банк картасы жарамды, әрі комиссиялық пайыз ұстал­майды.

 

Гүлзина БЕКТАС

 

Бөлісу:

Пікір жазу


*