تورت كۇندە – 88 مىڭ ادام

1428
0
بولىسۋ:

«ەكسپو – 2017» كورمەسىن العاشقى 4 كۇندە 88 مىڭ 300 ادام تاماشالاعان. بۇل تۋرالى استانا قالاسى اكىمشىلىگىنىڭ «استانا كون­ۆەنشن بيۋرو» جشس-نىڭ ديرەكتورى سانييار ايتەكەنوۆ حابارلادى.
ميگراتسييالىق پوليتسييادا 1970 قوناق تىركەلسە, وڭىرلەردەن 6 مىڭ 200 بالا كەلگەن. كور­مەگە كەلگەن قوناقۇيلەردەگى كەلۋ­شى­لەر­دىڭ سانى – 27 مىڭ ادام. قوناقۇيلەردىڭ – 81 پايىزى, حوستەلداردىڭ 25 پايىزى تولىق. قوعامدىق كولىكتەر وسى ۋاقىت ىشىندە 2,6 ميلليون جولاۋشىنى تاسىعان.
كورمەدە ار ەلدىڭ ۇلتتىق كۇندەرىن اتاپ وتۋگە ارنالعان ۇلتتىق كۇن ساحناسى بار. وندا كۇن سايىن ار ەل وكىلدەرىنىڭ, ونەرپازدارىنىڭ قاتىسۋىمەن ۇلتتىق كۇن اتالىپ وتەدى.

ۋكراينا «ەكسپو»-عا رەكوردتى سۇلگى سىيلادى
ۋكراينا «ەكسپو»-عا ەلەكتر وندى­رەتىن يننوۆاتسييالىق كۇن گەنەراتورلا­رىن, جوعارى تەحنولوگييالى پەردەلەر مەن اقىلدى ۇي جوباسىن اكەلدى. بۇل تۋرالى حالىقارالىق مامانداندىرىلعان كور­مە­نىڭ شەڭبەرىندە ۋكراينانىڭ ۇلتتىق كۇنىن مەرەكەلەۋ بارىسىندا ۋكراينا مەملەكەتىنىڭ ۆيتسە-پرەمەرى گەنناديي زۋبكو ايتىپ بەردى.
سۋدى جانە عيماراتتاردى جىلىتاتىن گەنەراتور كۇن ەنەرگيياسىن سورىپ الاتىن پلاستەليننىڭ كومەگىمەن بارلىق جىلۋدى گەنەراتوردىڭ ورتالىعىنا جينايدى. وندا ۆاككۋم جاسايتىن شىنى تۇتىك ورنالاسقان. ۆاكۋۋم تسەلسي بويىنشا 900 گرادۋسقا دەيىن قىزىپ, سونىڭ ناتي­جەسىندە الىنعان جىلۋمەن ەدەندى, باسسەيندى جانە كولەمى شاعىن ۇيلەردى جىلىتۋعا بولادى. ۇيىمداستىرۋشىلار اپپاراتتىڭ قۋاتى 4 كيلوۆاتت بولعان­دىقتان, ۇلكەن ۇيلەردى جىلىتۋعا كەلمەي­تىنىن ايتادى. الايدا قازىر 8 كيلوۆاتتىق اپپارات جاسالىنىپ جاتىر ەكەن. قۇ­رىلعىنىڭ بىرەگەيلىگى ول كۇننىڭ باعىتىن وزى تاۋىپ, پلاستەليندى سوعان قاراي بۇرىپ وتىرادى.
كۇن جاليۋزى وزىنە كۇن ساۋلەسىن سىڭىرىپ, ەنەرگييا وندىرەدى. ولار ۇي شامدارىنىڭ جارىعىن سىڭىرىپ ەنەرگييا وندىرە الادى. بۇل ەنەرگييا كىشىگىرىم تۇرمىستىق تەحني­كالاردى, ماسەلەن, تەلەفون مەن نوۋتبۋك­تى قۋاتتاۋعا پايدالانۋعا بولادى. ۋكراي­نانىڭ ۇلتتىق كۇنىن اتاپ وتۋ شاراسىندا ۇزىندىعى 30 مەترگە دەيىنگى سۇلگى كورسە­تىلدى. ول گيننەستىڭ رەكوردتار كىتابىنا كىرەدى. «ەكسپو – 2017» كورمەسىنەن كەيىن بۇل تۋىندى قازاقستانداعى ۋكراينا ەلشىلىگىنە سىيلانادى.

ەنەرگييا كوزى – ادامدار
گرۋزييا – «ەكسپو»-عا قاتىساتىنىن راستاعان العاشقى مەملەكەتتەردىڭ بىرى. بۇل مەملەكەتتەن كورمەگە ون مىڭ ادام كەلەدى دەپ كۇتىلۋدە. كەشەگى گرۋزييانىڭ ۇلتتىق كۇنىن تويلاۋعا مەملەكەت باس­شىسى گەورگيي مارگۆەلاشۆيلي قاتىستى.
500 شارشى مەتر اۋماققا ورنالاسقان گرۋزييا پاۆيلونىنىڭ تاقىرىبى – «ەنەر­گييا كوزى – ادامدار». پاۆيلوندا سۋ, جەل, كۇن ارقىلى پايدالانىلاتىن ەنەرگييا كوزدەرى كورسەتىلگەن. سونىمەن قاتار پاۆيلون ىشىندە ۇيىمداستىرىل­عان جارمەڭكەدە گرۋزين قولونەر شەبەر­لەرىنىڭ بۇيىمدارى قويىلىپ, گرۋزين شارابىنىڭ تۇر-تۇرى ۇسىنىلعان.
«ەكسپو – 2017» كورمەسىندەگى گرۋزييا كوميسسارى, ەنەرگەتيكا ۆيتسە-مينيسترى يلييا ەلوشۆيليدىڭ ايتۋىن­شا, ەلدە وندى­رىلەتىن ەنەرگييانىڭ 80 پايىزى جاڭعىر­مالى ەنەرگييا.
– بىزدىڭ پاۆيلوننىڭ ماڭىزدى ەكسپوناتتارىنىڭ بىرى تەك جاڭعىرمالى ەنەرگييا عانا قولدانىلاتىن بولا­شاقتىڭ قالاسىنا كوز تاستاۋعا مۇمكىندىك بەرەتىن اۆتوموبيلدىڭ ماكەتى. سونداي-اق ۇزدىكسىز قوزعالىس پەن ەنەرگييانىڭ سيمۆولى مۋلتيمەدييالىق تۋربينانى دا كەلۋ­شىلەر تاماشالاي الادى, – دەدى ول.
شارا سوڭىندا كورەرمەندەر گرۋزين ونەرپازدارىنىڭ ونەرىن تاماشالادى.

1 پوست = 1 ۆاتت
دۇنيەجۇزىندەگى اربىر تورتىنشى فوتو­ەلەمەنتتەردى وندىرۋشى مالايزييانىڭ پاۆيلونى ازيياداعى كورشىلەرى قىتاي مەن ۇندىستاننىڭ ورتاسىندا ورنا­لاس­قان. ونىڭ اۋماعى – 727 شارشى مەتر. كور­مەدەگى تاقىرىبى – «جاسىل ەنەر­گييانى كوبەيتۋ». ەڭ ىرى ورمان القاپتارى بار ەلدەردىڭ ىشىندە – بىرىنشى ورىندا, ال دامىپ كەلە جاتقان نارىق­تاردىڭ ارا­سىندا تورتىنشى ورىندا تۇرعان­دىقتان, «جاسىل» ەنەرگەتيكانى دا­مى­تۋ بويىنشا كوشباسشى. مالايزييا – دۇنيەجۇزىندەگى كۇن فوتوەلەكترلىك مو­دۋلدەر مەن ۇياشىق­تارىن وندىرۋشى­لەردىڭ بىرى.
مالايزييانىڭ پاۆيلونى «1 پوست – 1 ۆاتت» بايقاۋىن جارييالادى. ول ۇشىن Facebook, Instagram جانە VK الەۋمەتتىك جەلىلەرىندە «جاسىل» ەنەرگەتيكا, «جاسىل» تەحنولوگييالار تاقىرىپتا­رىنداعى #MyButterflyEffect حەشتەگىمەن جولدانعان اربىر حابارلاماعا بىر ۆاتت كۇن ەنەر­گيياسىن قوسۋعا مىندەتتەنەدى.
«جاسىل وسۋ» تاقىرىبىنداعى 2 اسەرلى جارييالانىم جازعان مالايزييا مەن قازاقستان ازاماتتارى «ەكسپو – 2017» كورمەسىن تاماشالاي الادى. ساپار كە­زىندە تۋىنداعان بارلىق شىعىنداردى, ونىڭ ىشىندە «ەكسپو – 2017» كورمەسىنە كىرۋ, استاناعا كەلىپ-قايتۋ بيلەتتەرىن مالاي­زييا جاعى كوتەرىپ الادى. مالايزييا ازا­ماتتارى ۇشىن سايىس – 10 شىلدەدە, ال قا­زاق­ستاندىقتار ۇشىن 30 شىلدەدە اياقتالادى.
سونىمەن قاتار مالايزييا وكىلدەرى كورمەگە قاتىسىپ جاتقان جۇزدەن استام مەملەكەتتەردى دە #MyButterflyEffect-كە قاتىسۋعا شاقىردى. #MyButterflyEffect كومپانيياسىنىڭ ارقاسىندا جانە قارا­پايىم #Wattif سۇراعىنا جاۋاپ ىزدەي وتى­رىپ, بىز «كوبەلەك اسەرىن» ىسكە قوسا الا­مىز, ول وز تۇرعىسىنان Future Energy-گە نەگىزدەلگەن الەمگە جەتەلەيدى.

تاڭشولپان تولەگەن

بولىسۋ:

پىكىر جازۋ


*