«ەكسپو» – تۇرلى وركەنيەتتىڭ توعىسقان جەرى

1351
0
بولىسۋ:

9 ماۋسىمدا استانا «ەكسپو – 2017» حالىقارالىق كورمەسىنىڭ رەسمي اشىلۋ سالتاناتى وتتى. كورمە ۇش ايعا سوزىلادى. وسى ۋاقىت ىشىندە 5 ميلليوننان استام ادام كورمە كەشەنىن ارالاپ, 20 حالىقارالىق ۇيىم مەن مىڭداعان كاسىپورىننىڭ بولاشاق ەنەرگيياسى سالاسىندا ۇسىنعان يننوۆاتسييا­لىق شەشىمدەرى كورسەتىلمەك.

بولاشاقتىڭ ەنەرگيياسى تاقىرىبىن­داعى «ەكسپو – 2017» كورمە كەشەنىنىڭ اۋماعى – 25 گەكتار. كورمە اياسىندا «CO2 قالدىقتارىن ازايتۋ», «ەنەرگييا تيىم­دىلىگى», «ەنەرگييا بارىمىز ۇشىن» تاقىرى­بىندا ىس-شارالار وتەدى. «ەكسپو – 2017» كورمەسىنە 44 ەلدىڭ وكىلدەرى بيلەت ساتىپ العان. قوناق­تاردىڭ كوپشىلىگى قىتاي مەن رەسەيدەن كە­لەدى. بىرىنشى كۇنى كەلۋشى­لەردىڭ سانى 10 مىڭ ادامعا جەتكەن. ەڭ ۇلكەن پاۆيلون – شار شەڭبەرىندە سالىنعان بيىكتىگى 100 مەترگە جەتەتىن قازاقستان كەشەنى. 7 قاباتتىق پاۆيلوندى ارالاپ شىعۋعا 3 ساعاتتان استام ۋاقىت كەتەدى. بۇكىل پا­ۆيلون­داردى قاراپ شىعۋعا كەمى 4 كۇن ۋاقىت كەرەك.
«ەكسپو – 2017» حالىقارالىق كورمەسى – زاماناۋي يننوۆاتسييالىق تەحنو­لوگييالاردىڭ عانا ەمەس, جۇزدەگەن ما­دە­نيەت­تىڭ توعىسقان ايماعى. مۇندا 115 ەل­دەن كەلگەن ميلليونداعان جۇرت وزگە ەلدىڭ وركەنيەتىمەن تانىسۋعا مۇمكىندىك الادى.

فرانتسييا – داستۇرىن تانىتقان ەل
فرانتسييا پاۆيلونىنىڭ باس كوميسسارى پاسكال لورو 10 ماۋسىم كۇنى پاۆيلوننىڭ رەسمي اشىلۋ سالتاناتىن وتكىزدى. پاۆيلون اۋماعى – 1084 شارشى مەتر. بۇل – كورمە كە­شەنىندەگى ەڭ ىرى پاۆيلونداردىڭ بىرى. اشىلۋ سالتانا­تىندا باس كوميسسار پاسكال لورو:
– استانا «ەكسپو – 2017» كورمەسىندەگى فرانتسييا پاۆيلونى بىزدىڭ يننوۆاتسييالىق تەحنولوگييا سالاسىنداعى بىلىم, بىلىگىمىزدى كورسەتە وتىرىپ, جەتەكشى كاسىپورىندارى­مىزدى بىرىكتىرەدى جانە فرانتسييانىڭ حالىقارالىق ارەناداعى ابىرويىن ارتتىرا تۇسەدى, – دەدى ول.
سونىمەن بىرگە, ول پاۆيلوندا ەكو-قالا, جاڭعىرمالى ەنەرگييا جانە ەكو­لوگييالىق كولىك سىندى ۇش تاقىرىپقا باسىمدىلىق بەرىلگەنىن اتاپ وتتى. پاۆيلوندا بۇعان دەيىن ەش جەردە كور­سەتىلمەگەن اۆتوكولىكتىڭ تانىستىرىلىمى وتتى. فرانتسۋز حالقى وزىنىڭ ۇلتتىق ان-كۇيلەرىنە كوپ كوڭىل بولدى. كورمە اياسىندا كەلۋشىلەرگە مۋزىكا كەشى وتكىزىلىپ, كابارە مەن تسيرك قويىلىمدارى ۇسىنىلماق. سونداي-اق پاۆيلون قوناقتارى فرانتسۋز ەلىنىڭ اتاقتى سۋرەتشىلەرى مەن مۇسىن­شىلەرىنىڭ دە ونەرىن تاماشالاي الادى.

رەسەيدىڭ مۇزدى جارۋ جوبالارى
رەسەي فەدەراتسيياسى پاۆيلونىنىڭ رەسمي اشىلۋى 10 ماۋسىم كۇنى وتتى. اشىلۋ سالتاناتى قوناقتاردى ستاندارتتى لەنتا قييۋمەن ەمەس, مۇزدى لەنتانى جارىپ اشىلعانىمەن تاڭ­داندىردى. مۇنىڭ وزى سولتۇستىك كورشىمىزدىڭ كورمەگە اكەلگەندەرىنىڭ باسىم بولىگى مۇزجارعىش فلوتتارى ەكەنىنەن حابار بەرەدى. سونداي-اق پاۆيلون رەسەيدىڭ ەنەرگەتيكا وبلى­سىنداعى جەتىستىكتەرىن كورسەتەدى. كورمەگە الەمدە ەڭ مىقتى سانالاتىن, بىر دەگەندە 2,8 مەترلىك مۇزدى جارۋعا قاۋقارى بار «روساتوم» اتومدىق مۇزجارعىش فلوت­ى­نىڭ ماكەتى قويىلعان. اتالمىش مۇز­جارعىش كەمە اۋا رايى جاعدايىنا تاۋەلسىز تۇردە اركتيكادا جىل بويى ناۆيگاتسييالاۋ جۇمىستارىن جۇرگىزە الادى. مۇنىڭ بارلىعى سولتۇستىك تەڭىز جولىمەن جۇك تاسىمالداۋ ۇزاقتىعىن بارىنشا قىسقار­تۋعا مۇمكىندىك بەرەدى. سونىمەن قاتار كەلۋشىلەرگە الى سالىنىپ بىتپەگەن, سولاي بولسا دا «روساتومنىڭ» الدىن ورايتىن مۇز­جارعىش قۋاتىنا يە «ليدەر» اتومدىق مۇز­جار­عىسىنىڭ پرەزەنتاتسيياسى ۇسى­نىل­دى. 4 مەترلىك مۇزدى جارۋعا كۇشى جەتەتىن مۇزجارعىش كەمە – سولتۇستىكتەگى الىس اۋ­داندارعا جۇك جەتكىزۋ, تۋريستەردى سولتۇستىك پوليۋسكە اپارۋ قىزمەتتەرىن اتقارماق.

تاتارستان تۋريستەردى شاقىرادى
كەشە رەسەي پاۆيلونىنىڭ ىشىندە تاتارستاننىڭ كورمەسى اشىلدى. تاقىرىبى – «ادام قۋاتى – حالىقارالىق كووپەراتسييا مەن تەحنولوگييالىق دامۋدىڭ درايۆەرى». ولار وز ەلىنىڭ تۇرلى سالاسىندا جەتىستىككە جەتكەن ادامدارىن تاۋسىل­مايتىن ەنەگرييا كوزى رەتىندە تانىستىردى. ول ۇشىن ينتەراكتيۆتى تاقتاعا جاقىنداپ, قىزىقتىرعان سالانى تاڭدايسىز. وندا سول سالانىڭ الدىڭعى قاتارلى وكىلى وزىنىڭ جۇمىس وتىلىن, جەتكەن جەتىستىگىن, سول ارقىلى ەلىنە تيگىزگەن پايداسىن تىزبەلەپ ايتىپ بەرەدى. ولاردىڭ قاتارىندا ستۋدەنتتەر مەن عىلىمي قىزمەتكەرلەردى, كومپانييا باسشىلارى دا بار. كورمەدە 1 اپتا بويى تاتارستاننىڭ ونەركاسىپ, بىلىم, تۋريزم سالاسىندا جەتكەن جەتىس­تىكتەرى كورسەتىلەدى. ۇيىمداستىرۋشىلارى كورمەنى پايدالانىپ تۋريستەردى كاسىبي شەبەرلىكتى ارتتىرۋعا باعىتتالعان WorldSkills Competition – 2019 حالىقارالىق چەمپيوناتىنا شاقىردى. كورمە 18 ماۋ­سىمعا دەيىن جالعاسادى.

سۋدان ەنەرگييا الۋعا بەيىم تاجىكستان
8 ميلليوننان استام حالقى بار تاجىكستان پاۆيلونىنىڭ تاقىرىبى – «ورنىقتى دامۋعا ارنالعان سۋ جانە سۋ رەسۋرستارىنىڭ را­تسيونالدى قولدانىسى». بۇل ەلدە قازىر 23 سۋ ەلەكتر ستانساسى بار. بولاشاقتا 40-تان استام گيدرو ەلەكتر ستانسالارى سالىنباقشى. كورمەدە ولار سۋدى راتسيونالدى قولدانۋ, ياعني, بىرنەشە رەت پايدالانىپ, ەنەرگييا الۋعا بولاتىنىن كورسەتكىسى كەلەدى. كورمەگە تاجىك حالقى «باقىت پەن دەنساۋلىق اعاشى» دەپ ەسەپ­تەيتىن اعاشتى دا قوسا الىپ كەلىپتى. ول لازۋليت, مرامور, افيت, نيفريت سەكىلدى 20-دان استام قۇندى تاستاردان قۇراستى­رىل­عان. ونىڭ جانىنا شىن ارقاردىڭ مۇيىزى قويىلعان. تاۋ ارقارى – جەرىنىڭ 90 پايىزى تاۋدان تۇراتىن تاجىكستاننىڭ سيمۆولدارىنىڭ بىرى.

تاڭشولپان تولەگەن

بولىسۋ:

پىكىر جازۋ


*