ەل كۇتكەن «ەكسپو»

2748
0
بولىسۋ:

بۇگىن استانادا «ەكسپو – 2017» دۇنيەجۇزىلىك كورمەسى سالتاناتتى تۇردە اشىلادى.

بۇگىن ايتۋلى حالىقارالىق شارا قازاقستاننىڭ تورىندە تۋىن جەلبىرەتەدى.
«ەكسپو» وتكىزگەن ەل رەتىندە قا­زاقستان بۇگىننەن باستاپ دۇنيە تاريحىنا التىن ارىپتەرمەن جازىلىپ قالادى.
«ەكسپو» ارقىلى ەلىمىز دۇنيەدەن وز ورنىن ويىپ تۇرىپ الادى.
الەمنىڭ نازارى بۇگىن الماتىنىڭ القىزىل اپورتىنا اۋادى.
الەم قازاقتىڭ قوڭىر دومبىراسىنىڭ ۇنىنە ەرىكسىز ەلىتەدى.
بۇگىن الەمنىڭ اسەم ارۋلارى استاناعا يىلىپ سالەم سالادى, الەم نازارى استانا­نىڭ ايشىقتى عيماراتتارىنا اۋادى.
بۇگىن قازىرگى زامانعى الەم تاريحىنىڭ ەڭ باستى اتريبۋتىنىڭ بىرى دە بىرەگەيى – «ەكسپو – 2017» استانا تورىندە اسپانعا ايرىقشا وتشاشۋ بولىپ شاشىلادى. .
بۇگىن وزىمىزدى الەمگە تانىتۋدىڭ بىرە­گەي جولى باستالادى.
بۇگىن – ەل يميدجىن كوتەرەتىن جاھان­دىق دەڭگەيدەگى اسا اۋقىمدى شارا! الاتاۋداي ابىرويىمىزدى اسىراتىن كۇن!
تاۋەلسىز قازاقستاننىڭ ەلدىگىن تانى­تاتىن ۇلكەن سىناق ارى اسقان ماڭىز­دى وقيعا. الاشتىڭ استاناسىنىڭ وسىناۋ الا­مان بايگەگە ۇسىنعان «بولاشاق ەنەر­گييا­سىنىڭ» اسىعى الشىسىنان تۇسەتىن كۇن!
بۇگىن – حالقىمىز ۇشىن اسقان ابىروي ارى ۇلكەن ەلدىك جاۋاپكەرشىلىك كۇنى. قازاقستاننىڭ استاناسى بۇگىن الەمنىڭ تۇكپىر-تۇكپىرىنەن كەلگەن تۇرلى مادە­نيەتتەردىڭ ۇندەسەتىن ورنىنا اينالماق.
جاھاندىق ەنەرگەتيكالىق قاۋىپسىزدىك جانە ەنەرگييا تاپشىلىعى ماسەلەسى بويىنشا الەم ەلدەرى بۇگىن «ەكسپو» وتەتىن استاناعا ەرەكشە قۇلاق تۇرىپ وتىر. اۋقىمدى عالامات شاراعا اربىر استانالىق بولىپ قانا ەمەس, بارشا قازاقستاندىق بو­لىپ بىرلەسە جۇمىلىپ, اۋقىمدى جوبا­نى ساتىمەن جۇزەگە اسىرايىق.
بىز ونى «بولاشاقتىڭ ەنەرگيياسى» دەپ اتادىق. ەلىمىز ۇشىن ماڭىزدى ۇدەرىسكە – «جاسىل» ەكونوميكا جوباسىن جۇزەگە اسى­رۋعا ارقايسىسىمىز وزىندىك ۇلەسىمىزدى قو­سايىق. استانانى تىڭ يدەيالار مەن جا­ڭا­شا ىستەردىڭ التىن كوپىرىنە اينال­دىرايىق.
ەل پرەزيدەنتى نۇرسۇلتان ابىشۇلى: «ەكسپو» كورمەسى – جاھاندىق اۋقىم­داعى وقيعا. ول ماڭىزدىلىعى جاعىنان ىرى ەكونوميكالىق فورۋمدارمەن, تۋريستىك تارتىمدىلىعى بويىنشا الەمدەگى ەڭ تانىمال سپورتتىق ويىندارمەن سالىس­تىرۋعا بولادى. كورمە بىزدىڭ ەلىمىزگە ىرى ينۆەستيتسييا تارتۋعا مۇمكىندىك تۋعىزادى. سونداي-اق «ەكسپو» كورمەسىن وتكىزۋ ارقىلى قازاقستان «جاسىل» ەكونوميكانى دامىتۋعا تىكەلەي سەپتىگىن تيگىزەتىن جاڭا تەحنولوگييا مەن يننوۆاتسييا الادى» دەگەن بولاتىن. وسى ورايدا ەلباسى تاپسىر­ما­سىنا سايكەس «ەكسپو – 2017» كورمەسىنىڭ بارلىق نىساندارى بالاما قۋات كوزدەرىن تۇتىناتىن بولادى.
«ەكسپو» ارقىلى قازاقستاننىڭ حالىقارالىق تۋريستىك نارىققا وز ۇلتتىق برەندىمەن تانىلۋىنا ۇلكەن مۇمكىندىك بەرىلىپ وتىر. سول مۇمكىندىكتى تيىمدى پاي­دالانا الۋعا تيىسپىز.
ەڭ الدىمەن, ەلىمىزدىڭ سالت-داستۇرىن, مادەنيەتىن, تۇرمىس-تىرشىلىگىن بۇكىل الەم­گە پاش ەتەتىندەي جوبالاردى بارىن­شا جانداندىرايىق!
جوسپارلانعان كەلۋشىلەردىڭ بارى شەتەلدىك تۋريست بولۋى شارت ەمەس.
وزگە ەلدەردە دە كورمەگە كەلۋشىلەردىڭ دەنىن ىشكى تۋريزم قۇرايتىنىن ەسكەرسەك, استانا كورمەسىن دە قازاقستاندىقتار بارىنشا مول قىزىقتايدى دەپ سەنەمىز.
نە دەسەك تە, «ەكسپو»-نىڭ ەلىمىزدىڭ اس­تا­ناسىندا تۋىن جەلبىرەتكەنى ار قازاق­ستاندىق ۇشىن زور ماقتانىش.
العاش رەت قازاقستان دەلەگاتسيياسى قاتىسقان دۇنيەجۇزىلىك كورمە – 1967 جىلى كانادانىڭ مونرەال قالاسىندا وتكەن «ەكسپو – 67» مەن بۇل «ەكسپو»-نىڭ اراسىن تۇتاس جارتى عاسىر بولىپ جا­تىر ەكەن.
«ەلۋ جىلدا – ەل جاڭا» دەگەندەي, قازىر ەلىمىز جاڭارعان, ەكونوميكامىز وسكەن, مول تاجىريبە جيناقتالعان. الەم كەڭىس­تىگىندە بىز قازىر بۇرىنعىداي بىر نارسەنى سۇراۋشى نەمەسە ۇيرەنۋشى رەتىندە ەمەس, وز ورنىن بىلەتىن, وز ىسىنە مىقتى, وز كەلە­شەگىن بولجاي بىلەتىن ەلمىز, حالىقپىز.
تاۋەلسىز قازاق مەملەكەتى بولىپ قا­لىپتاستىق.
قورىمىز بۇتىن, قورجىنىمىز تولى.
ەندەشە, «ەكسپو – 2017» – ەلىمىزدى الەمگە تاعى بىر رەت بارىنشا ايعاقتار زور مۇمكىندىك.
ماقتان, قازاق, شاتتان, قازاق!!!

تورە عالي

بولىسۋ:

پىكىر جازۋ


*