ارنايى ايماقتار تيىمدىلىگى باعامدالادى

1830
0
بولىسۋ:

ارنايى ەكونوميكالىق ايماقتاردا تىركەلگەن, بەرىلەتىن جەڭىلدىكتەردى پايدالاناتىن, بىراق ول جەردە جۇمىس جاسامايتىن كومپانييالارمەن كەلىسىمدەر بۇزىلۋدا. بۇل تۋرالى پرەمەر-مينيستر باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسىندا مالىم بولدى. جيىندا جاڭا فورماتتاعى اتاۋلى الەۋمەتتىك كومەكتى ەنگىزۋ ماسەلەلەرى جانە ارنايى ەكونوميكالىق ايماقتار مەن يندۋسترييالىق ايماقتاردى دامىتۋدىڭ جاڭا تاسىلدەرى قارالدى.

سونى تۇرپاتتى اتاۋلى الەۋمەتتىك كومەك (ااك) قازاقستاندا 2018 جىلعى 1 قاڭتاردان باستاپ ومىرگە جولداما الاتىنى مالىم. ەڭبەك جانە حالىقتى الەۋمەتتىك قورعاۋ مينيسترى تامارا دۇيسەنوۆانىڭ ايتۋىنشا, جاڭا فورماتتاعى ااك قولدانىستاعى جاردە­ماقىلاردىڭ ۇش تۇرىن الماستىرادى. ناتي­جەسىندە, جاردەماقىنى الۋعا قاجەتتى قۇجات­تاردىڭ سانى دا ايتارلىقتاي قىسقارادى.
ااك ەندى «شارتسىز» جانە «شارتتى» اقشالاي كومەككە بولىنەدى. «شارتسىز» كومەك «ەڭبەككە جارامدى مۇشەلەرى جوق بارلىق وتباسىلارعا», مىسالعا, مۇگەدەكتەر نەمەسە زەينەتكەرلەر وتباسىلارىنا, سونداي-اق «ەڭبەككە جارامدى مۇشەلەرى دالەلدى سەبەپتەر بويىنشا جۇمىسقا ارالاسا المايتىن وتبا­سىلارعا» – مىسالعا, مەكتەپكە دەيىنگى جاستاعى بالالارى بار جالعىزباستى انالارعا بەرىلەدى. وسىنداي وتباسىلاردان جاردەم­اقىنى الۋ ۇشىن جۇمىسپەن قامتۋ شارالارىنا قاتىسۋ تالاپ ەتىلمەيدى.
– «شارتتى» اقشالاي كومەك وتباسىندا كەم دەگەندە بىر ەڭبەككە جارامدى مۇشەسى بار وتباسىلارعا الەۋمەتتىك كەلىسىمشارتقا قول قويىپ, وتباسىنىڭ ەڭبەككە جارامدى بارلىق مۇشەسى جۇمىسپەن قامتۋ شارا­لارىنا مىندەتتى تۇردە قاتىسقان كەزدە عانا بەرىلەدى, – دەدى ت.دۇيسەنوۆا.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتى بويىنشا, الەۋمەتتىك كومەك جۇيە­سىندەگى رەفورما ناتيجەسىندە جاڭا فورماتتاعى ااك-تىڭ اربىر الۋشىسى ۇشىن جاردەماقى سوماسى 2018 جىلى ورتاشا ەسەپپەن 25%-عا ۇلعايتىلادى.
الەۋمەتتىك كومەك الۋ ەرەجەلەرىنە ەنگىزىلگەن وزگەرىستەرگە حالىقتى دايىنداۋ ۇشىن ەلىمىزدىڭ ۇش وڭىرىندە 2014 جىلدان باستاپ پيلوتتىق رەجيمدە «ورلەۋ» جوباسى ىسكە اسىرىلعان-تىن. باعدارلاماعا شامامەن 79 مىڭ ازامات قاتىسىپ, ولاردىڭ 19 مىڭعا جۋىعى ەڭبەكپەن قامتىلعان ەكەن.
وڭىرلەردە وسى پيلوتتىق جوبانى جۇزەگە اسىرۋ مەن جۇمىسپەن قامتۋ شارالارى تۋرالى اقمولا وبلىسىنىڭ اكىمى مالىك مىرزالين مەن جامبىل وبلىسىنىڭ اكىمى كارىم كوكىرەكباەۆ باياندادى.
بۇل رەتتە اقمولا وڭىرىنىڭ باسشىسى «ورلەۋ» قاتىسۋشىسى بولعان جانە جاڭا فورماتتاعى اتاۋلى الەۋمەتتىك كومەكتى الۋشى انتون ۆارۆاريۋككە سوز بەردى.
– بىز ايەلىمىزبەن بىرگە ەكى با­لامىزدى اسىراپ وتىرمىز. 2016 جىلعا دەيىن جۇ­مىسسىز بولدىم. زايىبىم بالالاردى باعۋمەن اي­نالىستى. وتكەن جىلى ماعان «ورلەۋ» جوبا­سىنا قاتىسۋ ۇسىنىلدى. ەگەر مەن وز ىسىمدى اشسام, بىرجولعى جاردەم­اقى الۋ مۇمكىن ەكەندىگى ايتىلدى. بىزدىڭ وتباسىمىز بۇل شارتتارعا كەلىستى. ناتي­جەسىندە, قولىمىزعا 100 مىڭنان استام تەڭگە تۇستى, مەن مەتالل ونىم­دەرىن – تەمىر قابىرعا, ەسىكتەر, باسپالداق جاق­تاۋ­لارىن جا­ساۋ­مەن شۇعىلدانا باس­تادىم. تابىس ۇل­عاي­دى, وز بيز­نە­سىمىزدى كەڭەيت­تىك. 6 ادام­­­دى – 4 دانەكەرلەۋشى مەن 2 ور­نا­تۋ­­شى­نى جۇمىسقا الدىم. نە­گى­زىنەن, ولار بالا­لار ۇيلە­رىنىڭ تاربيە­لەنۋشىلەرى جانە از قامتىل­عان وتباسى مۇشەلەرى, – دەدى ا.ۆارۆاريۋك.
ول سونداي-اق وز باسىنداعى ما­سەلەلەرىن دە ۇكىمەت باسشىسىنا جەتكىزە كەتتى. بىرىنشىدەن, ولارعا نارىقتا بۇ­رىن­نان جۇمىس جاسايتىن كاسىپورىندارمەن باسەكەلەسۋ قيىنعا تۇسىپ جاتقان كورىنەدى. ەكىنشىدەن, ول «ورلەۋ» باعدارلاماسى جالعاسىن تاپسا دەيدى. «باعدارلاما قاتىسۋشى­لارىنىڭ وقۋى كە­زەڭىندە ولاردى اتاۋلى الەۋمەتتىك كومەكپەن قولداۋ قاجەت. وقۋدان كەيىن ولاردىڭ ورنالاسۋىنا ارنالعان الەۋمەتتىك جۇمىس ورىندارى تىزبەسىن كەڭەيتكەن جون. سوندا بىز تەك وز ىسىمىزدى اشىپ قانا قويماي, باسقا ادامداردى دا جۇمىسقا الا الامىز» دەدى جاس كا­سىپكەر.
پرەمەر بۇل ۇسىنىستارعا قارسى ەمەستىگىن ايتتى. باقىتجان ساعىنتاەۆ جاۋاپتى ۆەدومستۆوعا ونىمدى جۇمىس­پەن قامتۋ جانە جاپپاي كاسىپكەرلىكتى دامىتۋ باعدارلاماسىنا ەڭبەككە قابىلەتتى حالىقتى بەلسەندى تۇردە تارتۋدى تاپسىردى.
ول سونىمەن قاتار حالىق اراسىندا تۇسىندىرۋ جۇمىسىن كەڭىنەن جۇرگىزۋدى جۇكتەدى. بارلىق دەڭگەيدەگى اكىمدەر جاڭا فورماتتاعى اتاۋلى الەۋمەتتىك كومەك كورسەتۋ شارتتارىنا جاتاتىن وتباسىلار ساناتىن انىقتاۋعا مىن­دەتتەلدى.
2017 جىلدىڭ سوڭىنا دەيىن از قامتىلعان اربىر وتباسىمەن «ولاردىڭ ەڭبەككە قابىلەتتى مۇشەلەرىن وقىتۋ, ەڭبەكپەن قامتۋ, جەكە كاسىبىن اشۋ بويىنشا جەكە جوسپارلار جاساۋ» سيياقتى جۇمىسپەن قامتۋ ماسەلەلەرىن پى­سىقتاۋ قاجەت. بۇل جۇمىستى ساپالى جۇرگىزۋ ۇشىن باقىتجان ساعىنتاەۆ ەڭبەك جانە حالىقتى الەۋمەتتىك قورعاۋ مينيستر­لىگىنە جەرگىلىكتى اتقارۋشى ورگاندار جانە جۇمىس­پەن قامتۋ ورتالىقتارىنىڭ قىزمەتكەرلەرىن دايارلاۋدى قامتاماسىز ەتۋ تۋرالى تاپسىرما بەردى.
ۇكىمەتتىڭ الەۋمەتتىك كومەك فور­ماتىن وزگەرتۋ بويىنشا جۇمىسى مەملەكەت باسشىسىنىڭ بەس ينستي­تۋتتىق رەفورمانى جۇزەگە اسىرۋ بويىنشا «100 ناقتى قادام» ۇلت جوسپارىنىڭ مىندەتتەرىنە سايكەس جۇرگىزىلىپ جاتىر. 84-قادامدا الەۋمەت­تىك كومەكتى وعان شىن مانىندە, مۇقتاج ازامات­تارعا باعدارلاپ, ونىڭ اتاۋلى سيپاتىن كۇشەيتۋ جانە وڭتاي­لاندىرۋ تۋرالى ايتىلعان.
وسىدان كەيىن ۇكىمەت وتىرىسىنىڭ كۇن تارتىبىنە شىعارىلعان ەكىنشى ماسەلە بويىنشا ينۆەستيتسييالار جانە دامۋ مينيسترى جەڭىس قاسىمبەك باياندادى. ونىڭ مالىمەتىنشە, ين­دۋسترييا­لىق ايماقتاردى (يا) دا­مىتۋدىڭ جاڭا تاسىلدەرى ازىرلەنىپتى. يا-لاردىڭ قىزمەتى ەندى زاڭ جۇزىندە بەكىتىلەتىن بولادى.
مينيستردىڭ اقپارىنشا, قازىر قازاقستان­دا دايىن ينفراقۇرىلىمى بار 22 يندۋسترييا­لىق ايماق (يا) قىزمەت ەتەدى. ولاردىڭ قۇرىلىسىنا مەملەكەت شامامەن 53,1 ميل­ليارد تەڭگە شىعىنداعان. يا اۋماقتارىندا شامامەن 100 ملرد تەڭگە ينۆەستيتسييا قۇيىلعان 107 وندىرىس ىسكە قوسىلدى. 7 700 جۇمىس ورنى قۇرىلىپتى. تاعى 150-دەي جوبا جۇزەگە اسىرىلىپ جاتىر.
سونىمەن بىرگە, مينيستر تالداۋ بارى­سىندا يندۋسترييالىق ايماق­تاردىڭ تيىمدى قىزمەت ەتۋىنە كەدەرگى بولىپ وتىرعان بىرقاتار پروبلەمالار انىقتالعانىن جەتكىزدى.
– بۇل – يندۋسترييالىق ايماقتار قىزمەتىنىڭ زاڭمەن رەتتەلمەگەنىنە قاتىستى. يا قىزمەتى كاسىپكەرلىك كودەكسىندە بەكىتىلگەن, وندا دا تەك تۇسىنىك قانا بەرىلگەن. سونداي-اق «بيزنەستىڭ جول كارتاسى – 2020» باع­دار­لاماسىندا يا-لاردى قارجى­لاندىرۋ تەتىگى انىقتالعان, بىراق بۇل باعدارلاما 2020 جىلى كۇشىن جويادى. سوندىقتان يندۋسترييا­لىق ايماقتاردى دامىتۋ جانە قۇرۋ بويىنشا جۇيەلى ماسەلەلەردى شەشۋ ۇشىن زاڭنامالىق دەڭگەيدە بەكىتۋ قاجەت, – دەدى مينيستر.
تاعى بىر ماسەلە – ساياساتقا جانە ينفراقۇرىلىم قۇرىلىسىن قارجىلان­دىرۋعا جاۋاپتى بىرىڭعاي مەملەكەتتىك ورگاننىڭ جوقتىعىمەن بايلانىستى بولىپ وتىر. وسىعان بايلانىستى ينۆەستيتسييالار جانە دامۋ مينيسترلىگى قولدانىستاعى زاڭناماعا وزگەرىستەر ەنگىزۋدى, اتاپ ايتقان­دا, يندۋس­ترييالىق ايماقتاردى دامىتۋ ماسەلەلەرىنىڭ مەملەكەتتىك ساياساتىن قالىپتاستىرۋ بويىنشا فۋنكتسييالاردى ۇلتتىق ەكونوميكا مينيستر­لىگىنەن الىپ, وزىنە بەرۋدى ۇسىنىپ وتىر. «ايماقتاردىڭ وزدەرىن دامىتۋ ماسەلەلەرىن جەر-جەرلەردە اكىمدىكتەردىڭ باسقارۋىنا قالدىرعان جون» دەدى مينيستر.
سونداي-اق «راسىمدەۋدىڭ جەڭىل­دەتىلگەن تارتىبىن; جوسىقسىز جانە تيىمسىز پايدالانعان جاعدايدا جەردى قايتارۋ بويىنشا قۇقىقتىق نەگىزدى; جوبانى ىسكە اسىرعان سوڭ جەر تەلىمىنىڭ ينۆەستورلاردىڭ مەنشىگىنە بەرىلۋى بويىنشا كەپىلدەردى قاراستىراتىن جەر ماسەلەلەرىن زاڭنامالىق رەگ­لامەنتتەۋ» قاجەت.
جەڭىس قاسىمبەك يا-لاردى دامىتۋ ۇشىن «دايىن ينفراقۇرىلىمى بار توقتاپ تۇرعان وندىرىستىك بازالاردى, ياعني بۇرىنعى ۇلكەن زاۋىتتاردى ساتىپ الۋ مەحانيزمىن قاراستىرۋ» تۋرالى ورتاعا ۇسىنىس تاستادى. «بۇل مەملە­كەتكە جاڭا يا-لاردى قۇرعاننان ەداۋىر ارزانعا تۇسۋى مۇمكىن» دەيدى ول.
ج.قاسىمبەك يا-نى باسقارۋ, قۇ­جاتتاردى راسىمدەۋ جانە بەرۋ, ينفرا­قۇرىلىمدار مەن جەلىلەردى باسقارۋ بويىن­شا باسقارۋشى كومپانييانىڭ وكىلەتتىلىگىن انىقتاۋدى, سونداي-اق جەكە يندۋستريالىق ايماقتار قىزمەتىن دە زاڭ جۇزىندە رەتتەۋدى ۇسىندى.
قازىر مينيسترلىك KPI (Key Performance Indicators تيىمدىلىگىنىڭ باستى كورسەت­كىشتەرىن) انىقتاۋ ۇشىن يندۋسترييالىق ايماقتارعا تولىق اۋديت جۇرگىزۋدە ەكەن. «وسى ايدىڭ سوڭىندا ينۆەستيتسييانىڭ, وندىرىس كولەمىنىڭ جانە جۇمىس ورىن­دارىنىڭ ناقتى KPI-ى انىقتالادى» دەدى مينيستر.
ول ارنايى ەكونوميكالىق ايماقتار (اەا) اۋماعىندا 157 جوبا ىسكە قوسىلعانىن (ونىڭ ىشىندە 32 شەتەلدىڭ قاتىسۋىمەن) مالىم ەتتى. بۇلارعا 651 ملرد تەڭگە ينۆەستيتسييا سالىنىپتى. 11 مىڭ 600-دەن استام جۇمىس ورنى قۇرىلدى. بيۋدجەتكە سالىق تۇرىندە 107 ملرد تەڭگەدەن استام قارجى قاي­تارىلدى. ينفراقۇرىلىم بيۋدجەتتىك شىعىننىڭ ار تەڭگەسىنە اەا قاتىسۋشىلارى 2,4 تەڭگە ينۆەستيتسييا سالدى.
مينيستردىڭ دەرەگىنشە, بيىل 100 ملرد تەڭگە تۇراتىن 24 جوبانى ىسكە قوسۋ جوس­پارلانۋدا. سونداي-اق تاعى 20 جوبانىڭ قۇرىلىس جۇمىستارى باستالادى. بۇل جو­بالاردا 3 مىڭ جاڭا جۇمىس ورنى قۇرىلادى دەپ كۇتىلۋدە. 10 اەا ينفراقۇرىلىمىنا شامامەن 275 ملرد تەڭگە سالىنعان. 5 اەا (وڭتۇستىك, بۋراباي, سارىارقا, يتپ, قورعاس) ينفراقۇرىلىمى تولىعىمەن اياق­تالعان, قالعان اەا-لاردا ينفراقۇ­رىلىم قۇرى­لىستارى جۇرگىزىلۋدە.
اەا رەجيمى «قورعاستا» زاماناۋي لوگيستيكالىق كلاستەردىڭ نەگىزىن قالاۋعا, استانادا تەمىر جول ماشينا جاساۋ جۇيەسىن قۇرۋعا, «وڭتۇستىك» اەا توقىما ونەركاسىبىن جاڭارتۋعا جانە «تاراز حيمييالىق پاركى» مەن «ۇيمت» اەا حيمييا جانە مۇناي-حيمييا كلاستەرلەرىن قۇرۋعا مۇمكىندىك بەرىپتى.
وسى ورايدا ۇكىمەت جەتەكشىسى سالىقتىق جەڭىلدىكتەر جانە باسقا دا پرەفەرەنتسييا­لاردى پايدالاناتىن ەركىن ەكونوميكالىق اي­ماقتاردىڭ قاتىسۋشىلارىنىڭ قىزمەتىن تالداۋدى تاپسىردى. بۇل ايماقتاردى ال­دەبىرەۋلەر سالىقتان جالتارۋ ۇشىن پايدا­لانباۋى قاجەت.
– اەا-لاردا كومپانييالار قاپتاپ تىر­كەلىپ العان, بىراق سولاردا جۇمىس ىستەگىسى كەلىپ وتىرعاندارى شامالى. ولاردا كىمنىڭ تىر­كەلگەنىن قاراپ, تالداۋ كەرەك. اەا-لاردى الدەبىر امالدار ۇشىن پايدالانىپ جاتپاسىن, – دەپ نىقتادى ب.ساعىنتاەۆ.
– بىز «الاتاۋ» يننوۆاتسييالىق تەحنو­لوگييالار پاركى» اەا-سىنىڭ بارلىق قا­تىسۋشىلارىمەن اراداعى كەلىسىمشارتتارعا تولىق اۋديت جۇرگىزىپ شىقتىق. اۋديت قورىتىندىلارى بويىنشا وز مىندەت­تەمەلەرىن ورىن­داماعان 42 قاتىسۋشىمەن كەلىسىم­شارتتى بۇزۋ بويىنشا جۇمىستار جۇرگىزىلۋدە. باسقا اەا-لار يەلەرىمەن بىرلەسىپ, دال وسىنداي جۇمىستى ولاردا دا باستاپ كەتتىك, – دەپ حابارلادى ج.قاسىمبەك.
مينيستر ارنايى ەكونوميكالىق ايماقتاردىڭ قىزمەتىنە جۇرگىزىلگەن تالداۋ قورىتىندىسى بويىنشا انىقتالعان باسقا دا جۇيەلى پروبلە­مالارعا نازار اۋدارتتى. ولاردىڭ اۋماعىندا جۇزەگە اسىرىلىپ جاتقان ساپالى جوبالار از ارى باسقارۋ ورگان­دارىنىڭ جۇمىسى تيىمسىز. ينفرا­قۇرىلىم قۇرىلى­سىنىڭ قارقىنى تومەن. ماسەلەن, بۇكىل الەمدە مۇنداي ايماقتارعا كاسىپورىندار ۇشىن قاجەتتى ينجەنەرلىك-كوم­مۋنيكاتسييالىق جە­لىلەردى تارتۋ 2-3 جىل ىشىندە اياقتالسا, قا­زاقستاندىق وسى اي­ماقتاردا ول بەس جىلدان دا ۇزاپ كەتەدى ەكەن. مۇنىڭ سىرتىندا «جەڭىل­دىكتەردى پاي­دالانۋ­داعى پروبلەمالار», «جەر تەلىمدەرىن الۋدىڭ ۇزاق مەرزىمى», «اەا-لار­داعى سالالىق شەكتەۋلەر» جايى دا ايتىلدى.
وسى جانە باسقا دا تۇيتكىلدەر تۇيىنىن تارقاتۋ ۇشىن ەل ۇكىمەتى ارنايى ەكو­نوميكالىق ايماقتاردى دامىتۋدىڭ جۇيەلى ماسەلەلەرىن شەشۋ بويىنشا شارالار پاكەتىن دايىندادى.
جوبالارمەن تولتىرۋ جانە ولاردىڭ ساپاسىن ارتتىرۋ ماقساتىندا اربىر اەا-نى ودان ارى دامىتۋ جانە تولىق­تىرۋدىڭ سترا­تەگيياسى ازىرلەنىپ جاتىر. بۇدان وزگە, اكىم­دىكتەر جانىنداعى باسقارۋشى كوم­پانييالار ۇشىن جەكە «بيۋدجەتتىك باع­دارلاما» قاراستىرۋ جوسپارلانعان, ول بويىنشا اكىمدىكتەر اەا-نى باسقارۋشى كومپانييالاردىڭ قىزمەتىن دامۋدىڭ باستاپقى كەزەڭىندە, ياعني ينۆەس­تورلاردىڭ اەا-دا قاجەتتى جيىندى تولىق­تىرعانعا دەيىن شامامەن 3-5 جىل بويى بيۋدجەتتەن قارجى­لان­دىرادى.
سونداي-اق سالىقتىق جانە وزگە دە جەڭىل­دىكتەر بەرۋ ۇشىن اەا قاتىسۋ­شىلارىن سالىقتىق اكىمشىلەندىرۋ تەتىكتەرىن وڭتاي­لاندىرۋ جوسپار­لانۋدا. جەر تەلىمدەرى مەن وزگە دە رۇقسات قۇجاتتارىن الۋدىڭ جەڭىل­دەتىل­گەن تارتىبى قاراستىرىلادى. قازىرگى كەزدە سونداي-اق قىزمەتتىڭ باسىمدىقتى تۇرلەرىنە جاتپايتىن جاڭا جوبالار بويىنشا شەشىمدەر قابىلداۋ ۇدەرىستەرىن جىلدامداتۋعا مۇمكىندىك بەرەتىن زاڭ جوباسى پارلامەنت قاراۋىندا ەكەن.
ۇكىمەت وتىرىسىندا وسى ماسەلە بويىن­شا بيزنەس قوعامداستىقتىڭ ۇستا­نىمىن «اتا­مەكەن» ۇكپ باسقارما توراعاسى ابىلاي مىرزاحمەتوۆ باياندادى. سونداي-اق ماڭ­عىستاۋ, وڭتۇستىك قازاقستان, قارا­عاندى, پاۆلودار, قىزىلوردا وبلىستارى مەن الماتى قالاسى اكىمدەرىنىڭ بايان­دامالارى تىڭدالدى. «سامۇرىق-قازىنا» قورىنىڭ باسقارما توراعاسى ومىرزاق شوكەەۆ اەا-داعى ينفرا­قۇرىلىم قۇرى­لىسىنىڭ بارىسى تۋرالى قۇلاعدار ەتتى.
تالقىلاۋدى قورىتىندىلاعان پرەمەر باقىتجان ساعىنتاەۆ ارنايى ەكونومي­كالىق جانە يندۋسترييالىق ايماقتاردىڭ قىزمەتىن جەتىلدىرۋ بويىنشا قاجەتتى شارالاردى قابىل­داۋدى جۇكتەدى.
ارنايى ەكونوميكالىق جانە ين­دۋسترييا­لىق ايماقتاردىڭ تيىمدىلىگى باس­قارۋشى كومپانييالاردىڭ قىز­مەتىنە تىكەلەي تاۋەلدى. وسىعان وراي ب.ساعىنتاەۆ جاۋاپتى مەملەكەت­تىك ورگاندارعا وسىنداي ۇيىمداردى تاڭداۋ كەزىندە مۇقييات قاراپ, ولاردىڭ جۇمىستارىن تيىمدى باقىلاۋدى تاپسىردى. ينۆەستيتسييالار جانە دامۋ مينيسترلىگى قارجى, ۇلتتىق ەكونوميكا جانە اۋىل شارۋاشىلىعى مينيسترلىك­تەرىمەن بىرلەسىپ, اەا قاتىسۋ­شىلارىن سالىقتىق اكىمشىلەندىرۋ تەتىگىن وڭتاي­لاندىرۋ, قىزمەتتىڭ باسىمدىقتى تۇرلەرىن ۇلعايتۋ تارتىبىن جەڭىلدەتۋ مەن اەا جەر تەلىمدەرىن بەرۋدىڭ جەكە, جەڭىل­دەتىلگەن تارتىبىن ازىرلەۋ ما­سەلەلەرىن پىسىقتاۋعا مىندەتتەلدى.
ۇكىمەت باسشىسى ازىرلەنىپ جاتقان «ارنايى ەكونوميكالىق جانە يندۋس­ترييا­لىق ايماقتار تۋرالى» زاڭ جوباسى اياسىندا بارلىق ۇسىنىستاردى قاراس­تىرۋدى جۇكتەدى. كوتەرىلگەن ماسە­لەلەردىڭ شەشىمىن تابۋىن باقىلاۋعا بىرىنشى ۆيتسە-پرەمەر اسقار مامين مىندەتتى بولىپ بەلگىلەندى.

 

ايحان شارىپ

 

بولىسۋ:

پىكىر جازۋ


*