Астана ауқымды шаралармен айшықталады

Енді бірнеше күннен кейін Астанада әлем мән беріп отырған «ЭКСПО – 2017» халықаралық көрмесі басталады. Мұның Қазақстан үшін де маңызы үлкен. Өйткені әлем өркениетінің жетістіктері көрмеде көрсетіледі. Сонымен қатар көрмеге келген қонақтар қазақтың ұлттық салт-дәстүрі мен өнерін тамашалап, халықтың бай мұрасына қанығып қайтпақ.
Осыған орай Астана қаласының әкімдігі «ЭКСПО – 2017» халықаралық ма­мандандырылған көрмесін өткізу ая­сын­да ауқымды мәдени-бұқаралық бағ­дарлама дайындап отыр.
Атап айтар болсақ, ауқымды шаралар қатарында халықаралық фестивальдер мен көрмелер, отандық және әлемдік эстрада жұлдыздарының, классикалық және халық музыкасының концерттері, премьералар, цирктік қойылымдар, «Бәй­терек» мону­ментінің алдында және қалалық алаңда, барлық саябақта халық­т­ық серуен сипа­тындағы шаралар бар.

– Жаз айларында елорда тұрғындары мен қонақтары қызықты мәдени бағдар­ла­маларды тамашалай алады, өйткені биыл Елорда күнін мерекелеу «Астана ЭКСПО – 2017» халықаралық көрмесін өткізумен тұспа-тұс келеді, – дейді Мәде­ниет, мұрағаттар және құжаттама бас­қармасының мамандары.
Media-Center EXPO – 2017 таратқан ақпаратқа қарағанда, алдағы «ЭКСПО» көрмесі – Қазақстан үшін маңызды оқиға. Өйткені көрме барысында ха­лықаралық қоғамдастық өкілдеріне елі­міздің басты жетістіктері мен даму келе­шегі кеңінен көрсетіледі. Қазақ хал­­­­­қы­­ның басты жетістіктерінің бірі – бай мәдени мұра, тарих пен ұрпақтан ұрпаққа жалғасын тауып келе жатқан салт-дәстүр. Дамыған өркениетті қоғам жергілікті мәдениетке және қазақ фоль­к­ло­рына асқан қызығушылық танытуда. Сон­дықтан көрме өтетін кезеңде елорда ау­мағында ұйымдастырылатын мәдени-бұ­қа­ралық шаралар бағдарламасын жасауға бас­ты негіз болған да осы.
Бірінші кезекте ұйымдастырушылар қазақ халқының жарқын туристік көрінісін жет­кізетін шараларды, оның ішінде «Аста­на­ға тарту» дәстүрлі қазақ музыка­сы­ның концерті, «Мүшәйра» республикалық ақын­дар конкурсы, «Шашу» халық биінің ха­лық­аралық фестивалі, «Серпер» халық аспап­та­ры оркестрлерінің фестивалі және «Астана са­малы» үрмелі аспаптар оркестрі, қазақ хал­қының дәстүрлі сусыны – қымызға ар­нал­ған «Қымызмұрындық» мерекесі, «Ас­тана Арқау» түркі музыка фестивалі, биыл Әзер­байжан Мәмбетовке арналған V «Сахна­дан сәлем» халықаралық театр фестивалі және тағы басқа мәдени іс-шаралар бар.
Ойын-сауық шараларының басым бөлгіне шетелдік өнер шеберлері емес, отан­дық, астаналық шығармашылық ұжым­дар тартылып отыр. Елордалық театрлардың, филар­монияның, цирк пен қаланың басқа да мәдени мекеме­лерінің артистерінің есімі бүгінде әлемге танымал, олар жетекші ха­лық­аралық ареналарда еліміздің имиджін көтеріп жүрген белгілі тұлғалар. Олар «ЭКСПО – 2017» көрмесі барысында қала тұрғындары мен шетелден келетін меймандарға өнер көрсетуге дайын. Мұнымен қоса, көрме аясындағы аталған мәдени іс-шараға, басқа да концерттерге этномәдени бірлестіктердің ұжымдары мен Қазақстанның түрлі өңір­ле­рінен келген ұлттық бағыттағы шығарма­шы­лық ансамбльдері қатысады.
Қала әкімшілігі осыған орай тұрғындар мен қонақтардың әртүрлі шараларға баруға мүмкіндігін толыққанды ескеріп отыр. Бұл жолы мәдени-бұқаралық бағдарламалардың басым бөлігі елорда тұрғындары мен қонақ­та­рына ыңғайлы болуы үшін ашық алаңдарда өткізілмек.
Мысалға айтар болсақ, сулы-жасыл желекжолда креативті идеялардың заманауи алаңы Astana Art Fest фестивалі, қалалық саябақтарда демалыс сайын отбасылық де­малысқа арналған Astana Park Land ша­расы өткізіледі. Есіл өзенінің жағасында ла­зерлік шоу мен субұрқақтар шоуын, сон­дай-ақ «Есіл кештері» концертін тама­ша­лауға болады.
Астана қаласының маңындағы тоғыз тұрғын алабы да назардан тыс қалмайды. Барлық тұрғын алаптарында қазақстандық танымал артистердің қатысуымен «Думанды Сарыарқа» бағдарламасы ұйымдастырылады.
Сонымен қатар елордада белгілі эстрада­лық, электронды музыка, рок және джаз кон­церт­тері, сонымен қатар International Street Dance Session көше биі фестивалі өтеді. Шараның барлығына кіру – тегін.
Қала әкімшілігі сонымен қатар, көрер­мен­дер назарына халықаралық көрме ая­сын­да алғаш рет өткізілетін бірқатар жаңа жоба­ларды ұсынбақ. Атап айтқанда, музыка өне­­ріне қосқан елеулі үлесі үшін наградалар табысталатын «Астана дауысы» халықаралық музыка фестивалі, алғаш рет қытайлық кунг-фу шоуы өтеді. Бұдан басқа, КВН ойы­нының тарихында алғаш рет ресейлік жүр­гізуші Александр Масляков Қазақстан­ның елордасында Жоғары лиганың соңғы жыл­дардағы чемпиондарының арасында Жаз­ғы кубокты сарапқа салады. Ойын Аста­на­да 1 шілдеде өтпек, чемпионат Бірінші арнадан тікелей эфирде көрсетіледі. Ұйымдас­ты­ру­шы­­лардың айтуына қарағанда, Қазақстанда туып, шетелге кетіп, көпшілікке танымал бол­­ған артистер де назардан тыс қалмайды.
Сөйтіп, «ЭКСПО – 2017» көрмесі ая­сын­дағы биылғы жазғы маусым келушілердің қы­зығу­шылығын күрт арттырмақ. Халық­ара­­­лық көрмедегі мәдени оқиғалар тізбегін Ас­та­нада өтетін отандық эстраданың еңбек сі­ңірген қайраткерлерінің концерті қоры­тын­­дылайды. Атап айтар болсақ, Әлібек Діні­шев, Секен Тұрысбек, Алтынбек Қораз­баев, сондай-ақ биыл құрылғанына 15 жыл бо­ла­т­ын «Музарт» ансамблі, Тұрсынбек Қа­ба­­товтың әзіл-сықақ кеші және тағы басқа шара­лар келушілердің көңілін көтереді. Қыс­қасы, Астанадағы биылғы жаз берекелі болайын деп тұр. Сондықтан «ЭКСПО»-ға арнайы барып, мәдени шараларға да қа­ты­сып қайтсаңыз, артықтық етпейді.

Берік БЕЙСЕНҰЛЫ