پرەزيدەنت: ەكسپو» قارساڭىندا ەلوردا تۇرعىندارىنا تاعى بىر سىيلىق جاسالدى

1404
0
بولىسۋ:

ەلباسى استانادا بەس جۇلدىزدى العاشقى حالىقارالىق پرەميۋم-كلاستى قوناق ۇيدىڭ اشىلۋ راسىمىنە قاتىستى. قوناق ۇي Talan Towers كوپفۋنكتسيونالدى كەشەنىنىڭ عيماراتىندا ورنالاسقان.

نۇرسۇلتان نازارباەۆ استانالىقتاردى, ينۆەستورلاردى جانە قۇرىلىسقا قاتىسقان بارلىق ازاماتتاردى قوناق ۇيدىڭ اشىلۋىمەن قۇتتىقتادى.

– «ەكسپو-2017» حالىقارالىق كورمەسى قارساڭىندا ەلوردا تۇرعىندارىنا تاعى بىر سىيلىق جاسالدى. بۇل  –  الەمدىك دەڭگەيدەگى «ريتتس-كارلتون» قوناق ۇيى. ونىڭ قۇرىلىسىنا ساپالى تەحنولوگييالار مەن ستاندارتتار قولدانىلىپ, قىسقا مەرزىم ىشىندە بوي كوتەردى. بۇل – قالا ينفراقۇرىلىمىنا سالىنعان زور ينۆەستيتسييا, – دەدى مەملەكەت باسشىسى.

قازاقستان پرەزيدەنتى استانانىڭ جوعارى دەڭگەيلى قوناق ۇي كەشەنىنە يە بولعانىن اتاپ وتتى.

– قوناق ۇي قۇرىلىسىنا قازاقستاننىڭ كومپانييالارى قاتىستى. جاڭا عيماراتتا ەڭ جوعارى دەيگەيدەگى ىس-شارالاردى وتكىزىپ, جوعارى مارتەبەلى مەيمانداردى قابىلداۋعا قاجەتتى بارلىق ينفراقۇرىلىم بار, – دەدى نۇرسۇلتان نازارباەۆ.

سونداي-اق, ەلباسى قۇرمەتتى قوناقتار كىتابىنا قولتاڭبا قالدىردى.

***

استانانىڭ سول جاعالاۋىنداعى Talan Towers كەشەنىنىڭ جالپى الاڭى – 120 مىڭ شارشى مەتر. وندا Talan Towers Offices, «ريتتس-كارلتون» قوناق ۇيى, SPA ورتالىعى, بيزنەس ورتالىعى جانە «Emporium» ساۋدا گالەرەياسى ورنالاسقان.

ەركىن قالدان

بولىسۋ:

پىكىر جازۋ


*