قازاقستان مەن گرۋزييا قاتىناستارى نىعايادى

1749
0
بولىسۋ:

ماجىلىس توراعاسى نۇرلان نىعماتۋلين گرۋزييانىڭ قازاقستانداعى ەلشىسى زۋراب اباشيدزەنى قابىلدادى. كەزدەسۋ بارىسىندا قازاق-گرۋزين قاتىناستارىن ودان ارى نىعايتۋدىڭ, سونىڭ ىشىندە پارلامەنتارالىق ديالوگتى دامىتۋدىڭ پەرسپەكتيۆالىق باعىتتارى تالقىلاندى. 

پالاتا باسشىسى ەلشى مىرزانى ەكى مەم­لەكەت اراسىندا ديپلوماتييالىق قارىم-قاتى­ناستاردىڭ ورناعانىنا 25 جىل تولۋى­مەن, سونداي-اق الداعى 26 مامىردا اتالىپ وتەتىن گرۋزييانىڭ ۇلتتىق مەرەكەسى – «تاۋەل­سىز­دىكتى قالپىنا كەلتىرۋ كۇنىمەن» قۇتتىق­تادى.
نۇرلان زايروللاۇلىنىڭ ايتۋىنشا, گرۋزييا – قازاقستاننىڭ ماڭىزدى سىرتقى ساياسي سەرىكتەسى. ەكى ەل اراسىندا كونسترۋكتيۆتى ديالوگ جولعا قويىلعان ارى ول بىرىزدى تۇردە كەڭەيتىلۋدە.
حالىقارالىق كۇن تارتىبىنە توقتالعان سپيكەر وڭىرلىك قاۋىپسىزدىك پەن تۇراقتىلىقتى نىعايتۋ ماسەلەلەرىندە ەلدەرىمىزدى ۇقساس ۇستانىمدار بىرىكتىرەتىنىن اتاپ كورسەتتى. ن.نىعماتۋلين قازاقستان پرەزيدەنتىنىڭ قولداۋىمەن استانادا وتكەن سيرييالىق قاقتىعىستى رەتتەۋ بويىنشا كەلىسسوزدەردىڭ ماڭىزدىلىعىنا نازار اۋدارتتى. ماجىلىس توراعاسىنىڭ ايتۋىنشا, مەملەكەت باس­شىسىنىڭ تاياۋدا بەيجىڭدە سيرييالىق قاقتىعىس بويىنشا كەپىلدىك بەرۋشى ەلدەر – رەسەي جانە تۇركييا باسشىلارىمەن, سونداي-اق ساۋد ارابيياسىنىڭ استاناسى ەر-رييادتا «اقش – يسلام الەمى» سامميتى اياسىندا تۇتاستاي العاندا, قاۋىپسىزدىك ماسەلەلەرى بويىنشا وتكىزگەن كەلىسسوزدەرى دە ۇلكەن مان-ماڭىزعا يە.
وز كەزەگىندە زۋراب اباشيدزە قازاقستان­نىڭ بۇۇ قاۋىپسىزدىك كەڭەسىنە مۇشەلىگىنە توقتالا كەلە, رەسمي استانانىڭ وڭىرلىك جانە جاھاندىق قاۋىپسىزدىك ماسەلەلەرىن شەشۋگە ۇلكەن ۇلەس قوساتىنىنا سەنىم بىلدىردى.
كەزدەسۋدە ەكى ەلدىڭ ەكونوميكالىق سالادا دا ۇلكەن الەۋەتىنىڭ بارلىعى اتاپ وتىلدى. نۇرلان نىعماتۋليننىڭ مالىمەتىنشە, ەكى ەلدىڭ وزارا ساۋدا اينالىمى 2016 جىلى نەبارى 41 ملن دوللاردى قۇرادى. سپيكەر ادجارييا مەن ماڭعىستاۋ وبلىسى, سونداي-اق باۋىرلاس قالا-پورتتار – باتۋمي مەن اقتاۋ اراسىنداعى تىكەلەي ەكونوميكالىق بايلا­نىستاردى قايتا جاڭعىرتۋ بويىنشا گرۋزييا باستاماسىن قازاقستاننىڭ قۋاتتايتىنىن مالىمدەدى. ول سونىمەن بىرگە, ترانسكاسپيي حالىقارالىق كولىك باعىتىنىڭ دامۋىمەن بىرگە, مۇنداي ىنتىماقتاستىق ەلەۋلى تۇردە جەدەلدەيدى جانە ەكى ەل اراسىنداعى ەكسپورت پەن يمپورت اۋقىمى ارتادى دەپ ۇمىتتەنەتىنىن بىلدىردى.
ن.نىعماتۋلين ىنتىماقتاستىق بويىنشا پارلامەنتتىك توپتاردىڭ جانە ەكى ەلدىڭ زاڭ شىعارۋ ورگاندارىنىڭ بەيىندى كوميتەتتەرىنىڭ الەۋەتتەرىن بەلسەندى پايدالانۋ قاجەتتىگىن نىقتادى. سپيكەر سونداي-اق گرۋزييالىق ديپلوماتتى ەلىمىزدەگى ساياسي رەفورمالار تۋراسىندا اقپاراتتاندىردى. بۇل رەتتە قازاقستاندا پرەزيدەنتتىك باسقارۋ فورماسى ساقتالاتىنى باسا ايتىلدى.

بولىسۋ:

پىكىر جازۋ


*