دارى-دارمەك وندىرىسى ەكى ەسە ۇلعايادى

1592
0
بولىسۋ:

پرەمەر-مينيستردىڭ بىرىنشى ورىنباسارى ا.مامين تەگىن مەديتسينالىق كومەكتىڭ كەپىلدىك بەرىلگەن كولەمى اياسىندا حالىقتى دارىلىك زاتتارمەن قامتاماسىز ەتۋ ماسەلەلەرى بويىنشا جانە قازاقستاندا فارماتسەۆتيكالىق سالانىڭ جاعدايى مەن ونى دامىتۋ تۋرالى ماجىلىستەگى پارلامەنتتىك تىڭداۋلارعا قاتىسىپ, سوز سوي­لەدى.

«حالىقتىڭ دەنساۋلىعىن جاقسارتۋ, مەديتسينالىق كومەكتىڭ قولجەتىمدىلىگى مەن ساپاسىن ارتتىرۋ – ۇكىمەتتىڭ ماڭىزدى مىندەتى» دەدى ا.مامين.
ونىڭ ايتۋىنشا, قازىرگى ۋاقىتتا جۇرگىزى­لىپ جاتقان دەن­ساۋلىق ساقتاۋ جۇيەسىن رەفورمالاۋ جانە 2017 جىلدىڭ 1 شىلدەسىنەن باستاپ مىندەتتى مەديتسينالىق ساقتاندىرۋ جۇيەسىن ەنگىزۋ قارجىلاندىرۋ كولەمىن ۇلعايتۋعا جانە مەديتسينالىق قىزمەت كورسەتۋلەردىڭ قولجەتىمدىلىگىن كەڭەيتۋگە مۇمكىندىك بەرەدى.
جولداۋدا ايتىلعان مەملەكەت باس­شىسىنىڭ مىندەتتەرىن ورىنداۋ ماقساتىندا قازىرگى تاڭدا دارىلىك زاتتاردىڭ باعالارىن, ونىڭ ىشىندە پارلامەنت تالقىلاۋىنا ەنگىزىلەتىن نارىقتاعى باعالاردى زاڭنامالىق رەتتەۋ بويىنشا شارالار پىسىقتالۋدا.
پرەمەر-مينيستردىڭ بىرىنشى ورىن­باسارىنىڭ ايتۋىنشا, ۇكىمەت وتاندىق دارى-دارمەك وندىرۋشىلەرىنە قولداۋ كورسەتۋ جۇمىستارىن جالعاستىرۋدا. 2016 جىلى قا­زاقستاندىق فار­ماتسەۆتيكالىق ونىم كولە­مى – 42,4 ملرد تەڭگە. بۇل فارما­تسەۆ­تيكالىق نارىقتىڭ جالپى كولەمىنىڭ 8-12% قۇرايدى. سونىمەن قاتار مەملەكەتتىڭ ساتىپ الۋ­لارىنىڭ كولەمى 25,6 ملرد تەڭگەنى نەمەسە جالپى كولەمنىڭ 60% قۇرايدى.
ا.مامين «5 جىل ىشىندە وتاندىق دارى-دارمەك وندىرىسى كولەمىن 2 ەسەگە ۇلعايتۋ جوس­پارلانعانىن, بۇل يمپورتقا تاۋەلدىلىكتى تومەندەتۋگە مۇمكىندىك بەرەتىنىن» اتاپ وتتى. سونداي-اق ول «ەۋرازييالىق ەكونوميكالىق وداق اياسىندا تۇراقتى نەگىزدە دارى-دارمەكتەر مەن مەديتسينا ونىمدەرىنىڭ بىرىڭعاي نارىعىن قالىپتاستىرۋ جۇمىستارى جۇرگىزىلىپ جاتقانىن» مالىمدەدى.
بۇدان بولەك بۇگىندە قاۋىپسىز, تيىمدى جا­نە ساپالى دارىلەر مەن بۇيىمدارعا قولجەتىم­دىلىكتى ارتتىرۋعا, فارماتسەۆتيكالىق بيزنەستى دامىتۋ جاعدايلارىن جاقسارتۋعا باعىتتالعان 70 قۇجات ازىرلەنىپ جاتقانىن حابارلادى.

بولىسۋ:

پىكىر جازۋ


*