قازاق ويىنشىعى برەندكە اينالا ما?

2917
0
بولىسۋ:

«قازاقتا قۋىرشاق بولعان با, جوق پا?» دەگەن ساۋال كوپتىڭ كوكەيىندە جۇرەتىنى انىق. بولمادى دەپ بىرجاقتى پىكىر ايتا الماسپىز. ويتكەنى, عالىم الكەي مارعۇلان وزىنىڭ بىر پىكىرىندە: «اعاشتان بۇيىم جاساۋ قازاقستاننىڭ ورمان ماسسيۆتەرى بار ورتالىق قازاقستان, الاتاۋ, سولتۇستىك-باتىس جانە سولتۇستىك-شىعىس ايماقتارىندا كەڭىنەن تارالعان. اسىرەسە, سولتۇستىك ايماقتاردا قىزىل قايىڭ, قىزىل قاندىاعاش, ۇيەڭكى, جاڭعاق اعاشى, شاعان, ەمەن سيياقتى اعاشتاردى پايدالانعان. بۇلار وڭاي كەسىلىپ, بويالادى. شەبەرگە قيىنشىلىق تۋدىرمايدى» دەپ جازعان. عالىمنىڭ بۇل پىكىرى «قۋىرشاق ورتەكەگە» بايلانىستى ايتىلىپ وتىرعانى بەلگىلى. اعاشتان تۇيىن تۇيگەن شەبەرلەر اۋ باستا «ورتەكە» قۋىرشاعىن قۇراستىرعانى بەلگىلى. ول قۋىرشاق ويىن-ساۋىقتاردا, جيىنداردا دومبىرا اۋەنىنە, ساۋساقتاردىڭ پەرنە باسۋ قوزعالىسى مەن ىرعاعىنا قاراي بيلەگەندىكتەن, مۇنى ويىنشىق ەمەس دەپ قارسى پىكىر ايتاتىندار دا تابىلار. دەگەنمەن قازاق ويىنشىعىنىڭ تول باسىندا «ورتەكەنىڭ» تۇرعانى انىق.

«ورتەكەنىڭ» ناقتى قاي ۋا­قىتتا, قاي زاماندا پايدا بولعانى تۋرالى دەرەكتەر مۇلدەم از. بىرلى-جارىم زەرتتەۋشىلەر جازعانىمەن, ناقتى «بىلاي ەدى» دەيتىندەر جوق­تىڭ قاسى. كەيبىر دەرەكتەرگە سۇيەن­سەك, «ورتەكە» قۋىرشاعىن بي­لەتۋ ارى ونى جاساۋ ونەرى حىح عا­سىردىڭ باسىندا پايدا بولعان دەسەدى. «ورتەكە – قازاق قۋىرشاق ونە­رىنىڭ باستاۋى» دەگەن ەكەن بەل­گىلى عالىم احمەت جۇبانوۆ. ەرتە كەزدەن قالىپتاسقان مادەنيە­تى­مىزدىڭ بۇگىنگى كۇنگە دەيىن جال­عاسىن تاۋىپ كەلە جاتقانى قۋان­تادى.
الايدا «ورتەكەدەن» كەيىن شە­بەرلەر قۋىرشاق قۇراستىر­ما­عان با?» دەگەن ويعا كەلەسىڭ. «اعاش­تان تۇيىن تۇيگەن شەبەرلەر با­لانىڭ ويىنشىعىن جاساۋعا كەلگەندە نەگە توسىلىپ قالدى ەكەن?» دەپ ويلايسىڭ. مۇمكىن, بىزدىڭ بۇل ويىمىز قاتەلىك تە شىعار. بالا شوقاننىڭ تالاي مۇسىندەردى بالشىقتان جاساعانى تۋرالى دەرەكتەردى كەزىندە كوركەم شىعارمالاردان وقىعانىمىز بار ەدى. ولار دا قازاقتىڭ قۋىرشاق ونەرىنىڭ باستاۋى سەكىلدى.
قازىرگى قازاق بالاسىنىڭ ويىن­­شىعى دا, ويىنى دا – باسقا. بالالاردىڭ دەنى قانداي ويىندى جاقسى كورەدى, قانداي ويىنشىق­پەن وينايدى? تازشا بالا مەن قو­جاناسىر, جەلاياق پەن تاۋ­سو­عاردى بىلۋى تيىس دەگەن ماقساتپەن بەلگىلى پروديۋسەر قىدىرالى بول­مانوۆ بىر كەزدەرى «قۋىرشاق» جوباسىن قول­عا العان ەدى. «اس­سا­لاۋما­عا­لەي­كۋم! مەن – تازشا بالامىن. مەن بەت­ماننان بۇرىن بارمىن. ول – مەنىڭ جانىمدا كىم?» دەيتىن تاز­شا بالا مەن «قا­را­قات» قۋىرشاق ا دە­گەننەن-اق ەل­دى ەلەڭ ەتكىزگەن. Bal Bala كوم­پا­نيياسى ۇسىنعان ونىم­دەر كوپتىڭ كوڭىلىنەن شىقتى. قازاق فولك­لورىنىڭ ال­دار كوسە, تازشا بالا مەن ەر­توس­تىك سيياقتى كەيىپ­كەر­لەرىنەن تۇرا­تىن اۆتورلىق جە­­لىدەگى ويىن­شىقتاردى بولا­شاق­تا انىمەن, ونەرىمەن ەڭبەك سىڭى­رىپ جۇرگەن تانىمال ونەر­پاز­داردىڭ بەينە­سىمەن تولىقتىرىپ, ماقال-ماتەل ايتاتىن, جۇمباق جا­سىرا­تىن, كەرەك دەسەڭىز, بەس مەز­گىل ناماز وقي­تىن دا قۋىرشاق شى­عارۋدى قول­عا العان ەدى. الايدا بۇل قۋىر­شاقتىڭ ساپاسى جوعارى بولعا­نى­مەن, باعاسى كوپشىلىكتىڭ قالتاسىن كوتەرە قويماعانى راس.
بەلگىلى پۋبليتسيست قالي سار­سەن­بايدىڭ: «نەمەرەمە قازاق قۋىر­شاعىن تاپپادىم» دەپ شى­رىل­داعانى ەستە. قازاق قۋىرشاعى بار, بىراق قولجەتىمسىز. ارى ونى كەز كەلگەن دۇكەننىڭ سورەسىنەن تاپ­پاسىڭىز انىق. سوندا قازاق قۋىر­شاعى قاي كەزدە, قاي ۋاقىتتا الەمدىك برەندكە اينالادى? الدە ساپاسى تومەن, ارزانقول ويىن­شىقپەن الدانا بەرەمىز بە?

قىدىرالى بولمانوۆ,
پروديۋسەر:

برەند بولۋ ۇشىن حالىقتىڭ قولداۋى قاجەت
بۇگىنگى تاڭدا قازاقستان نارى­عىنا شامامەن 50-گە جۋىق مەم­لە­كەتتەن ويىنشىق كەلەدى. ونىڭ بار­لىعى – يمپورت, كوپ بولىگى قى­تاي ەلىنىڭ تاۋارلارى. تىپتى امە­ريكالىق برەندتەردىڭ وزى قى­تايدا جاسالادى. ويتكەنى زاۋىت­تاردىڭ بارلىعى سول جەردە شو­عىرلانعان. وزىمىزدىڭ وي­ىن­شىق شىعاراتىن تول برەندىمىز ازىرگە بىرەۋ-اق, ول – Bal Bala. وندىرىسكە شى­عىپ جۇرگەن وزگە كومپانييا جوق. كورمەلەرگە قويىلاتىن, سا­ناۋلى اۆتورلىق جۇمىس جاسايتىن قولونەر شەبەرلەرى – باسقا اڭگىمە. ول – نارىق ەمەس. تاۋەل­سىز­دىك العالى بەرى وندىرىستە اتىن قالىپتاستىرعان, بالالارعا ار­نالعان ونىمدەر شىعاراتىن برەند جوق. البەتتە, كاسىپتىڭ وڭايى جوق. برەند دەگەن دۇنيەنىڭ وزى بىر جىل­دا نە بەس جىلدا جاسالا قوي­مايدى. الەمدىك بەلگىلى برەندتەردى الىپ قاراساق, بارى ۇزاق ۋاقىت پەن قاجىرلى ەڭبەكتىڭ ناتيجەسىندە تانىلعان. بۇگىنگىنىڭ بالاسىن ەلىك­تىرىپ, قىزىقتىرۋ كەرەك. ايت­پەسە, سال نارسەگە الدانا قويماي­دى. سونى ەسكەرىپ, بىز ۇل­كەن جوسپارلار جاساپ وتىرمىز. كەز كەلگەن مەملەكەت ۇشىن بالا – ەرتەڭگى بولاشاق. ونىڭ وسۋىنە, دا­مۋىنا بەي-جاي قاراۋعا استە بولمايدى. ەتنوپەداگوگيكا, پسي­حو­لوگييا سالالارىن بىرىكتىرە وتى­رىپ جاسالۋى تيىس. بىزدىڭ اينا­لى­سىپ وتىرعان جۇمىسىمىز تىپتى ساۋ­دا دا ەمەس – برەند. ول دەگە­نى­مىز – ساپا. ياعني, وزىندىك كونتسەپ­تسييا­سى جاسالعان, ماقساتى, مەجە­لەن­گەن دۇنيەلەرى بار. ويىن­شىق­تارىمىزبەن وينايتىن بالالار مەن وينامايتىندارىن سالىستى­رىپ, تاجىريبە جاساپ جاتىرمىز. باس­تاعانىمىزعا بىر جارىم جىل­داي ۋاقىت بولدى. ناتيجەلەرى كوڭىل قۋانتىپ وتىر. بىزدىڭ برەند­تى تۇتىناتىن كىشكەنتايلارىمىز تىلدى, قازاقشا ولەڭدەردى جاق­سى­راق بىلەدى ەكەن. ەلىمىزدە بۇگىندە 20 مىڭعا جۋىق بالاباقشا بار. سو­لارعا كەرەكتى, بالالاردى دا­مى­تا الاتىن قۇرالدارمەن جاب­دىقتاندىرۋدى ماقسات ەتەمىز. با­لانى دامىتۋدى ويلاساق, ال­دىمەن تىلدى دامىتۋدى قولعا العان جون. ول ۇشىن ونىڭ ويىنشىقتارى قازاقشا بولۋى تيىس. ودان كەيىنگى دامۋ ساتىسى – مۋلتفيلم جانە ت.ب. بولىپ كەتە بەرەدى. بۇگىندە استانانىڭ بىرنەشە ساياباقتارىنا ارناپ «بال بالا الەمى» دەپ اتا­لاتىن جاڭا جوبا جاساپ جاتىر­مىز. بۇل جەردە باتۋت-كيىز ۇيلەر, ەتنوتيرلار سەكىلدى ەكسكليۋزيۆ دۇ­نيەلەر بولادى. قاراپ وتىرساق, قازىرگىنىڭ بالاسى باتۋتقا سەكىر­گىش. ەندى سونىڭ وزىن وزىمىزشە نەگە جاساماسقا? ودان كەيىنگى ماق­ساتىمىز ولاردى فرانشيزاعا دايىنداپ, ەلىمىزدىڭ وزگە دە اي­ماقتارىنا جىبەرۋ. بالانى وز تى­لى­مەن, داستۇرىمەن, ادەبىمەن تار­بيەلەپ, وسىرۋ قاجەت. سول سەكىلدى حالىق ەرتەگىسىن, بەسىك جىرىن تىڭ­داتۋ كەرەك. ونى نە اتا-انا جاسامايدى, نە بالاباقشاداعى تاربيەشىلەر جاسامايدى. ەندى نە ىستەيمىز? جۇرەتىن ويىن­شىقتار جاساپ جۇرگەنىمىز دە سودان. با­لا­مەن بىرگە وينايدى, تاقپاق ايتىپ بەرەدى. ويناۋ پروتسەسى ۇستىندە بالاقان ويىن­شىقتىڭ ايتقانىن قالاي جاتتاپ العانىن وزى دە باي­قاماي قالادى. كوردىڭىز بە, قي­ناماي, زورلىقسىز قالاي ۇيرەتۋگە بولادى? قاراپ تۇرساق, كوپ مەم­لەكەتتەردە وز تى­لىندە سوي­لەيتىن ويىنشىق جوق. وسىنى ەسەپكە الا وتىرىپ, الدا كەلە جاتىرمىز دەپ سەنىممەن اي­تۋعا بولادى. تىپتى بىر-ەكى ەل مە­نەن مەتوديكاسىن سۇراپ, وز تىلىنە اۋدارساق دەگەن ۇسىنىس بىلدىرىپ جاتىر. ازىرگە وڭتايلى ساتىن كۇتىپ جۇرمىز. حا­لىق نەگىزى تەك ويىن­شىق رەتىندە قاراماي, بالانىڭ ەر­تەڭىنە كەرەك دۇنيە دەپ قارا­عانى جون. ويتكەنى قازىرگى تاڭدا كەرەگى – باسەكە­لەس­تىكتەن بۇرىن, حالىقتىڭ قولداۋى. «Bal Bala ويىنشىقتارىنىڭ باعاسى تىم قىم­بات» دەگەن پىكىردى جيى ەستي­مىن. بىراق ەڭ قىمبات ويىنشىق – 8800 تەڭگە تۇراتىن روبوت. ونىڭ جاسالۋىنا ەكى جىل ۋاقىت كەتتى. روبوت بالامەن تىل­دەسە الادى. سىز­دىڭشە قىمبات پا? ودان قالا بەردى, بىزدىڭ ويىن­شىقتاردىڭ بار­لىعى زەرتحانالىق تەكسەرۋدەن وتكەن, تازا. يم­پورت­تىق تاۋارلار­دىڭ كوپشى­لى­گىندە ول جوق. بىراق شەتەلدىڭ سپانچ بو­بىن, مونستر حايىن ەل قىرىلىپ الادى. ولار­دىڭ باعاسى – كەمى 15 مىڭ تەڭگە. قايسىسى قىمبات بولىپ تۇر? بالانىڭ دەنساۋلىعى, پات­ريوت بو­لىپ وسۋى ماڭىزدى بولۋى كەرەك. قا­زاق ويىنشىعى برەند بولۋ ۇشىن قولداۋ كەرەك. بار بولعانى – وسى.

انار لەپەسوۆا,
شەبەر:

ويىنشىق دۇكەنىن اشقىم كەلەدى
بۇل كاسىپتىڭ قىزىعى مەن قيىن­دىعى قاتار جۇرەدى. كەيدە كوز مايىن تاۋىسىپ, تۇنىمەن ۇي­قى كورمەستەن توقىعان ويىن­شى­عىڭ­دى اياقاستى الماي قالادى. سول ۇشىن كەيىنگى كەزدە «اقشاسىن ال­دىن-الا تولەۋ كەرەك» دەگەن شارت قويىپ جۇرمىن. ويىنشىق تو­قۋدى ينتەرنەتتەن تۇرلى ون­لاين ساباقتار قاراۋ ارقىلى ۇي­رەن­دىم. بۇل ستيل جاپوندىق­تارعا جاقسى تانىس, اميگۋرۋمي دەپ اتا­لادى. ياعني, ويىنشىقتاردى ىل­مەكپەن توقيمىن. وزىمە نەگى­زى­نەن ۋكراينالىق توقىماشى-قو­ل­ونەرشى قىز-كەلىنشەكتەردىڭ جۇ­مىسى وتە قاتتى ۇنايدى. سو­لاردىڭ ەڭبەكتەرىنە قىزىعا قا­راپ, تىڭ يدەيالار الۋعا تىرى­سا­مىن. مىسالى, قۋىرشاقتاردى فيمو پلاستيكتەن (پوليمەر ساز بالشىق – اۆت.) جاساۋعا بو­لادى. ول وتە ادەمى بو­لىپ شىعادى. بىراق جۇ­مىسى بىراز كۇردەلى ەكە­نىن ايتا كەتۋ كەرەك. ەگەر في­مو پلاستيكتەن ويىن­شىق جاساي­تىن ويىڭىز بولسا, تابىس تاباتىن باسقا دا كاسىبىڭىزدىڭ بولۋى شارت. ياعني, كوبىنە حوببي رە­تىندە اينالىسۋعا بولادى. ودان بولەك, بىزبەن دە بىراز دۇنيەلەر جاساۋعا بولادى. وعان بىرشاما ۋاقىت كەتەدى. مەندە قازىرگى تاڭ­دا تاپسىرىستار وتە كوپ, ۇل­گەر­مەي­مىن.
ويىنشىق جاساۋعا تاپسىرىس تەك ەلىمىزدەن عانا ەمەس, الىس-جا­قىن شەتەلدەردەن دە تۇسىپ وتى­را­دى. ونلاين اۋدارماشى ارقىلى تاپسىرىس قابىلداپ, سويلەسەمىن. تىل ۇيرەنۋ كۋرستارىنا بارعىم كە­لەدى. دەگەنمەن دەنساۋلىعىما باي­لانىستى گورمونالدى دا­رى­لەردى كوپ ىشەمىن. سونىڭ اسەرىنەن ەستە ساقتاۋ قابىلەتىم تومەندەپ كەتتى. كەيدە تاپسىرىستىڭ دا ەس­تەن شىعىپ كەتەتىن كەزدەرى بولىپ تۇرادى. ەڭ العاشقى ويىن­شى­عىمنىڭ تۇرى قورقىنىشتى بولىپ شىققانى ەسىمدە. بىراق قايتا-قاي­تا توقۋ ارقىلى قولىمدى ۇي­رەتتىم. سەنسەڭىز, بۇگىندە مەن كوز­دى جۇمىپ قويىپ تا جۇمى­سىمدى جاساي بەرەمىن. بىر شەتى ۇيرە­نىپ كەتكەنىم بولسا, ەكىنشى جا­عىنان توقىما كوزگە كوپ زييا­نىن تيگىزەتىندىكتەن, جانارىمدى ساق­تاۋ ماقساتىندا وسىلاي جا­سايمىن. ويىنشىقتىڭ باعا­سىن وعان كەتەتىن ما­تە­ريال­دىڭ شى­عى­نىنا بايلانىستى بەكىتە­مىن. ەسەپشى مامان­دار­مەن كەڭە­سىپ, با­عا قويۋ­دى ۇي­­رەنىپ ال­­عام. مە­­نىڭ ويىن­شىق­تارىم­نىڭ باعاسى – 5-15 مىڭ تەڭگە ارالى­عىندا. وسى كۇنگە دەيىن شاما­مەن 3 مىڭ­داي قۋىر­شاق جاسادىم. بولا­شاق­تا ويىنشىق دۇ­كە­­نىن اشۋدى ارمان­داي­مىن.


مارينا نابيۋلينا,
شەبەر:

قازاقشا ماترەشكا يدەياسى كوپشىلىككە ۇنادى
قازاقشا ستيلدە ماترەشكا جاساۋ تۋرالى وي ويلاماعان جەر­دەن كەلدى. بىرىنشىدەن, ول – ين­تەرناتسيونال ويىنشىق تۇرى. اۋ باستا ماترەشكانى جاپونييا ويلاپ تاپقان. ول جەردەن رەسەيگە كەل­گەن كورىنەدى. الەمگە ايگىلى بولۋى دا ورىس حالقىنىڭ جاقسى ۇسى­نا بىلگەنىنىڭ ارقاسى. سودان ماعان «وسىنىڭ قازاقشا نۇس­­قاسىن جاساپ كورسە, قالاي بولار ەكەن?» دە­گەن وي كەلدى. وسى­لايشا, قازاق وتباسىن جاسا­دىم. ورىسشا ماترەش­كادان ايىرماشىلى-
عى – مەنىكىندە اكەسى, اناسى, بالالارى بار. بۇلاي ەتۋ سە­بەبىم – قازاق­تار­دا ۇيدىڭ باسشىسى – وتاعاسى. سون­دىق­تان ەڭ ۇلكەن مات­رەش­كا – اكەسى, ودان سوڭ رەت-رەتىمەن كەتە بەرەدى. ودان قالسا, ماترەشكا – بالا ۇشىن دا­مىتۋ قۇرالى ىسپەتتەس. «ۇلكەن, كىشى» دەگەن تۇسىنىكتى قالىپتاس­تىرا­دى, قۇراستىرۋدى, سايكەستەن­دىرۋدى ۇيرەنەدى. بۇل يدەيام كوپ­شىلىككە ۇنادى. بىرشاما مۋ­زەي­لەرگە قويىپ, ساتىلىمعا شى­عاردىم. نەگىزى, قولونەرمەن ومىر بويى اينالىسىپ كەلەمىن دەسەم بولادى. جوعارى وقۋ ورنىن بىتىرگەن جىلى, ياعني 1993 جىلدان بەرى كادە-سىيلار, ويىنشىقتار جاساۋمەن اينالىسۋدامىن. بىراق بۇگىندە ماترەشكا جاساۋدى ازايت­تىم. ويتكەنى بۇدان بولەك, ىدىس­تاردىڭ سىرتىنا تۇر­لى سۋرەتتەر سا­لامىن. وزىم بىرگە جۇ­مىس ىستەي­تىن فيرما تاپ­سى­رىستار جىبەرىپ وتىرادى. سوعان ساي­كەس جاساي­مىن. شەتەلگە كە­تەردە سىيلىق رەتىندە الىپ كە­تەتىندەر بار. ما­سەلەن, گەرما­نييا­عا قىدىرىپ بارا جاتقاندا تاپ­سىرىس بەر­گەندەردى بىلەمىن. كو­بىنە دايىن جۇمىستاردى دۇ­كەن­دەرگە وتكىزىپ تاستايتىندىق­تان, كىم جانە قايدا الىپ جات­قا­نىنان بەيحابارمىن. باعاسىنا كەلەر بولساق, جۇمىس­تىڭ كۇر­دەلىلىگىنە بايلانىستى. ەڭ تو­مەنگى باعا – 15 مىڭ تەڭگە شا­ما­سىندا. بىر ايدا ناقتى مىنان­شا ماترەشكا جاسالادى دەپ دوپ با­سىپ ايتۋ قيىن. كەي كەزدە تاپ­سى­رىس كوبەيىپ كەتەدى, كەيدە كەرى­سىنشە ازايادى.

روزا سارسەباەۆا,
شەبەر:

ساپانى جاقسى كورەتىندەر كوبەيىپ كەلەدى
جاساپ جۇرگەن قۋىرشاقتارىم كۇندەلىكتى تۇرمىسقا ارنالماعان. ياعني, كوللەكتسييا جيناۋعا قۇمار جان­دار ساتىپ الىپ جاتادى. قۋىر­شاقتىڭ جۇمىسى وتە كۇر­دەلى, سول سەبەپتى باعاسى دا سوعان ساي­كەس قىمباتتاۋ كەلەدى. اي­تا­لىق ەڭ ارزانى – 30 تەڭگەگە جۋىق. ماتەريالدارىن ايتار بولسام, قۋىر­شاقتىڭ بەتى كۇيدىرىلگەن قىش, دەنەسى – مەتالل كاركاس, اعاش پەن ماتادان جاسالادى. بى­رەۋىن جاساۋدىڭ وزى بىر ايداي ۋاقىت الادى. مەنىڭ جاسايتىنىم – تەك قانا اۆتورلىق جۇمىستار. قاراپايىم حالىققا قولجەتىمدى باربي سەكىلدى قۋىرشاقتار جاساۋ جوسپاردا جوق. بۇگىندە «ەكسپو – 2017» كورمەسىنە دايىندىق ۇس­تىندەمىن. بۇل كاسىپپەن اينا­لى­سىپ جۇرگەنىمە 30 جىلداي ۋاقىت بول­دى. تاپسىرىستار دا جيى تۇسە­دى. ويتكەنى, ەلىمىزدە ادەمىلىكتى, سا­پانى جاقسى كورەتىن جانداردىڭ قا­راسى كوبەيىپ كەلەدى. تىپتى شەت­ەلدىكتەردىڭ تاراپىنان دا تاپ­سى­رىستار تۇسەدى. تۇتىنۋشىلار توي­عا كادەسىي رەتىندە, ۇيدىڭ ين­تەرەرىنە قوسىمشا قىلىپ, نە بولماسا سىيلىققا بەرگەن جاقسى دەپ لەبىزدەرىن بىلدىرىپ جاتادى.
قازاق قۋىرشاعى ۇلتتىق برەندكە اينالۋى تيىس. ول ۇشىن ساپا عانا ەمەس, ساننىڭ دا ارتقانى ابزال. «باربي» قۋىرشاعى نەگە الەمگە ايگىلى? ويتكەنى, ول – قولجەتىمدى. «قاراقات» قۋىرشاعىن ساتىپ الۋعا كەز كەلگەننىڭ قالتاسى كوتەرە بەرمەيدى. قالتاسى قالىڭ اتا-انانىڭ قىمبات ويىنشىقتى بالاسىنا الىپ بەرۋگە مۇمكىندىگى بار. قارجىسى تومەن وتباسى نە ىستەيدى? امالسىز قارا بازارداعى ساپاسى تومەن, دەنساۋلىققا زييان, ارزانقول ويىنشىقپەن الدانۋعا ماجبۇر. بۇل – بىر. ەكىنشىدەن, باعا قولجەتىمدى بولماي, ويىنشىقتار ۇلتتىق برەندكە اينالا المايدى. «بال بالانىڭ» فولكلور كەيىپكەرلەرىن (تازشا بالا, الداركوسە, ەرتوستىك) قۋىرشاققا اينالدىرۋ يدەياسى جاقسى. بىراق سىز ونى كەز كەلگەن بالانىڭ قولىنان كەزدەستىرمەيسىز عوي. بىرىنشىدەن, باعاسى قىمبات. ەكىنشىدەن, قارا بازاردا جوق. قۋىرشاق وندىرىسىن جەتىلدىرەمىز دەسەك, وتاندىق ويىنشىقتاردىڭ ساپاسىن دا, سانىن دا ارتتىرعانىمىز ابزال. بىر نارسە اقيقات: ويىنشىقتىڭ دا فيلوسوفييالىق مانى بار. بۇلدىرشىندەردىڭ جۇرەگىنە تازالىق پەن ادالدىقتىڭ, باتىلدىق پەن مەيىرىمدىلىكتىڭ دانىن ەگەدى. جاقسى مەن جاماندى اجىراتۋىنا سەپتىگىن تيگىزەدى. ويىنشىق ويناپ وسكەن بالانىڭ كوڭىل كوكجيەگى دە كەڭ بولادى.

گۇلزينا بەكتاس, جادىرا اققايىر

بولىسۋ:

پىكىر جازۋ


*