شاحمات شەبەرلەرى «ايقىننىڭ» جۇلدەسىنە تالاستى

1702
0
بولىسۋ:

الماتىداعى وقۋشىلار سارايىندا جۋرناليستەر مەن بلوگەرلەر اراسىندا شاحماتتان تۋرنير وتتى. Aikyn media open سايىسىنا جالپى سانى 30 ادام قاتىستى. دەمالىس كۇنىن تيىمدى پايدالانعان باق وكىلدەرى وي سەرگىتىپ قانا قويماي, ۇيىمداستىرۋشىلار تاراپىنان بەرىلگەن سىيلىقتارعا يە بولدى. بۇل شارا گازەتىمىزدىڭ 13 جىلدىق مەرەيتويىنا وراي وتكىزىلدى. 

العاش رەت ۇيىمداستىرىلىپ وتىرعان سايىستىڭ تۇساۋى ساتتى كەسىلدى. تۋرنيردىڭ اشىلۋىندا گازەتىمىزدىڭ باس رەداكتورى نۇرتورە جۇسىپ, الماتى قالاسى تىلدەردى دامىتۋ باسقارماسىنىڭ باسشىسى ماماي احەتوۆ, ايەلدەر اراسىندا ەڭ جاس گروس­س­مەيستەر جانسايا ابدىمالىكتىڭ اناسى الما اشىروۆا, Air Astana اۋەكومپانيياسىنىڭ وكىلى تىلەك ابدىراحيموۆ, جانسايا ابدىمالىك اتىنداعى شاحمات اكادەميياسىنىڭ PR جانە ماركەتينگ مەنەدجەرى انۋار نۇرپەيىسوۆ پەن «ايقىن» گازەتىنىڭ جاۋاپتى حاتشىسى اسقار بەكوۆ سوز سويلەدى.

نۇرتورە جۇسىپ,
«ايقىن» گازەتىنىڭ باس رەداكتورى:
– گازەتىمىز بيىل بىر مۇشەلگە كەلىپ وتىر. وسى ايتۋلى مەرەكەنى قالاي وتكىزسەك دەپ كوپ ويلاندىق. ناتيجەسىندە, شاحماتتان تۋرنير وتكىزۋگە بەل بايلادىق. بۇل ارقىلى جۋرناليستەردىڭ قولىنان شاحمات ويناۋ كەلەتىندىگىن كورسەتىپ, مىقتىلار ويىنىن كەڭىرەك ناسي­حاتتاعىمىز كەلدى. اگرانوۆس­كييدىڭ «ەڭ مىقتى جۋرناليست – ويلى جۋرناليست» دەگەن سوزى بار. وسى وي باسە­كەسىندە قازاقتىڭ الاتىن اسۋى الى الدا دەپ ويلايمىز. ارىپتەستەرىمىز قاتىسىپ, ولجالى ورىندار, باعالى سىيلىقتار الىپ, ۇپايلارىن تۇگەندەپ جاتىر. بۇل جەردە ماسەلە تىپتى جۇلدە دە ەمەس. شىن مانىندە, ميدى قوزعاۋ, سول ارقىلى قازاقتىڭ سوزىن ۇستاپ وتىرعان ازامات­تارىنىڭ ويىن ۇشتاۋ ماقسات بولدى. ەلىمىزگە بەلگىلى جاس شاحماتشى جانسايا ابدىمالىكتىڭ شاحمات اكادەميياسى اشىلدى. ۇسىنىسىمىزدى جەرگە تاستاماي, وسى جەردە وتكىزۋىمىزگە كەلىسىم بەردى. وسى شارانىڭ وتۋىنە ات سالىسقان بارشا جاندارعا العىس بىلدىرگىمىز كەلەدى. تۋرنيردى الداعى ۋاقىتتا داستۇرلى تۇردە ۇيىمداستىرىپ تۇرامىز دەگەن جوسپارمىز بار.
تورتىنشى بيلىك يەلەرىنىڭ باسىن قوسقان تۋرنيرگە جاس جۋرناليستەردەن باستاپ ارداگەرلەرگە دەيىن قاتىستى. ەڭ جاس قاتىسۋشىلارىمىز – 19-20 جاستاعى جاس تىلشىلەر. سونىمەن بىرگە, ايان نىسانالين, تاجىباي جاناەۆ, اعىباي مۇقاتايۇلى, جۇمات انەس سەكىلدى بەلگىلى ارداگەر جۋرناليستەر تۋرنيرگە ات سالىسىپ, كوركىن قىزدىردى. جىل سايىن وتكىزەمىز دەگەن جوسپاردى ەستىگەن ارداگەرلەر ۇيىمداس­تىرۋشىلارعا جاقسى ۇسىنىستار بىلدىردى.

ايان نىسانالين,
ارداگەر-جۋرناليست:
– «ايقىن» گازەتى – «مەملەكەتتىك باسىلىم قانداي بولۋى قاجەت?» دەگەن ساۋالعا تولىقتاي جاۋاپ بەرەتىن بىردەن-بىر باسىلىم. سەبەبى, وسى ون ۇش جىل ىشىندە وزىن مويىنداتىپ, ماندى ماقالالار جارييالاپ كەلەدى. جۋرناليستەر اراسىندا شاحماتتان جارىس جاساۋىنىڭ وزى ۇجىمنىڭ جان-جاقتىلىعىن كورسەتتى. مۇنداي شارالار جيى ۇيىمداستىرىلىپ تۇرۋى قاجەت. سەبەبى, كۇنى بويى جۇمىستان باس المايتىن جۋرناليستەردىڭ بىر سات سەرگىپ قالعاندارى جاقسى. شاحمات – ويىنداردىڭ تورەسى. وز تاراپىمنان ايتار ۇسىنىسىم بار. «ايقىن» گازەتىنىڭ ۇجىمى كەلەر جىلى تاعى وتكىزەتىن بولسا, تۋرنيردى تاكەن الىمقۇلوۆتىڭ قۇرمەتىنە قويسا ەكەن. ويتكەنى قالامگەر-جۋرناليستەر اراسىندا دال تاكەن اعاعا تەڭ كەلەر قارسىلاستار بولماعان. وز ارامىزدا كىشىگىرىم سايىستار جيى وتىپ تۇرادى. ارداگەر بولساق تا, مۇم­كىندىگىنشە قاتىسامىز. تۋرنير بارىسىندا بىرنەشە مىقتى شاحماتشى-جۋرناليس­تەرمەن ويناپ, باق سىنادىق. ۇيىمداس­تىرۋشىلارعا راقمەت ايتقىم كەلەدى.
وقۋشىلار سارايىندا جانسايا ابدىمالىكتىڭ شاحمات اكادەميياسى اشىلدى. اتالعان جەردە وتكىزىلگەن العاشقى تۋرنير – Aikyn media open. جوندەۋ جۇمىستارى جاڭا بىتكەن ويىن بولمەلەرى زامانعا ساي جابدىقتالعان. جاس شاحماتشىنىڭ اناسى الما اشىروۆا – تۋرنيردى ۇيىمداستىرۋعا ات سالىس­قانداردىڭ بىرى.

الما اشىروۆا,
ج.ابدىمالىكتىڭ اناسى:
– شاحمات تۋرنيرىنىڭ اشىلۋىمەن قۇتتىقتاي وتىرىپ, قاتىسۋشىلارعا ساتتىلىك تىلەيمىن. جۋرناليستەر اراسىندا مۇنداي شاحمات بايقاۋلارىن بۇرىن-سوڭدى ۇيىمداستىرعان تاجىريبەمىز بار. جاڭادان اشىلعان اكادەمييامىزدا وتكىزۋگە ۇسىنىس تاستاعاندارىڭىزعا قۋانىشتىمىز. شاحماتپەن كاسىبي اينالىسپاسا دا, قى­زىعۋشىلىق تانىتاتىن باق وكىلدەرىنە قولداۋ بىلدىرۋگە دايىنبىز. ار جەكسەنبىدە تۋرنير وتكىزىپ تۇرامىز. قولدارىڭىز قالت ەتىپ, ۋاقىتتارىڭىز بولا قالسا, كەلىپ, قاتىس­ساڭىزدار بولادى.
ويىن شۆەيتسار ۇلگىسىندە وتكەندىكتەن, جەڭىسكە جەتۋ مۇمكىندىگى جوعارى ەدى. ياعني جالپى سانى 7 تۋردا جيناعان ۇپاي ساندارى ەسەپتەلىپ, قورىتىندى شىعارىلادى. سۋىرىلىپ ۇزدىك شىققان تىلشىگە Air Astana اۋەكومپانيياسى تەگەرانعا بيزنەس-كلاسقا ەكى بيلەت تابىستادى. جەڭىمپاز اتالعان جولدامامەن يراننىڭ استاناسىنا وسى جىلدىڭ اياعىنا دەيىن قالاعان كۇنىندە بارا الادى.
وسىعان دەيىن باق وكىلدەرى اراسىندا وتكىزىلگەن تالاي تۋرنيردە توپ جارعان ارسيلان الاحۋنوۆقا باس جۇلدە بۇيىردى. «ۇيعىر اۆازي» رەسپۋبليكالىق قوعامدىق-ساياسي گازەتىنىڭ تىلشىسىنە عانا ەسە جىبەرگەن جاس بلوگەر, شاحماتتان ى رازريادقا يە قۋانىش سۇلەيمەنگە ەكىنشى ورىن بۇيىرىپ, «كەرنەۋ Limited» اتىنان پلانشەت تابىستالدى. قولا جۇلدەگە تالاس قىزۋ بولدى. جارىس قورىتىندىسىندا ۇپاي ساندارى تەڭ تۇسكەن تورت ويىنشىعا دا ۇشىنشى ورىن بەرىلدى. دەگەنمەن كوەففيتسيەنت بويىنشا قۇمار باقداۋلەت باسىم تۇسىپ, پلانشەت يەگەرى اتاندى. قولا جۇلدەگە قول سالعاندار قاتارىندا اسقات بايپەيىسوۆ بار. وعان №159 مەكتەپ-گيم­نازيياسىنىڭ باسشىسى اياگۇل ميرازوۆانىڭ ارنايى سىيلىعى تابىستالدى. ۇپايى بىردەي بولعان قانات قاماتاەۆ پەن نۇربەك تۇسىپحانعا دا دەمەۋشىلەر تاراپىنان سىيلىقتار تابىس ەتىلدى. جارىسقا قا­تىسقانداردىڭ دەنى ەر-ازاماتتار بولعانىمەن, ورتاسىندا قوس قىزعالداق بولعانىن اتاپ وتۋ كەرەك. ۇپاي سانى بويىنشا جوعارى تۇرعان جاس جۋرناليست دانا ماراتوۆا رەداكتسييانىڭ ارنايى سىيلىعىن يەلەندى. تۋرنيردىڭ ويداعىداي وتۋىنە ۇلەس قوسقان «تامشى» جانە «مەديا وردا» قوعامدىق قورلارى مەن قارجىلاي دەمەۋشىلىك بىلدىرگەن گازەت جاناشىرلارى يتەن قارىمساقوۆ پەن بەيسەنباي تاجىبايعا العىس بىلدىرەمىز. جارىس اياقتالعان تۇستا كەلۋشىلەردىڭ بارلىعىنا نۇرتورە جۇسىپتىڭ «مىڭ قۇمىرسقا جانە بىز» كىتابى مەن ەرماحان شايحىنىڭ «قوڭىر قاجىنىڭ كۇندەلىگى» كىتابى سىيعا تارتىلدى.

جادىرا اققايىر

فوتو: ايتجان مۇرزانوۆ

بولىسۋ:

پىكىر جازۋ


*