جاڭا كونستيتۋتسييالىق زاڭ جوبالارى ەنگىزىلەدى

1588
0
بولىسۋ:

ەلىمىزدە ساياسي رەفورما جالعاسۋدا. ەل پارلامەنتىنە اتا زاڭعا وزگەرىستەر ەنگىزبەي-اق, بيلىك تارماقتارىنىڭ وكىلەتتىگى مەن جاۋاپكەرشىلىگىن كۇشەيتەتىن قۇجاتتار جوباسى ەنگىزىلۋدە. 

كەشە پالاتا توراعاسى نۇرلان نىعما­تۋلين­نىڭ توراعالىعىمەن ماجىلىس بيۋروسى الداعى جالپى وتىرىستىڭ كۇن تارتىبىن انىقتادى.
سونىمەن, بيۋرودا قابىلدانعان شەشىم بويىنشا ماجىلىس دەپۋتاتتارى الداعى اپتانىڭ سارسەنبىسىندە وتەدى دەپ جوسپار­لانىپ وتىرعان جالپى وتىرىس­تارىندا دەنە شىنىقتىرۋ جانە سپورت ماسەلەلەرى بويىنشا تۇزەتۋلەرگە ارنالعان زاڭ جوباسىن ەكىنشى وقىلىمدا تالقىلايتىن بولادى.
سونداي-اق جيىندا حالىق قالاۋ­لىلارىنا حالىقارالىق جەكە قۇقىق جونىن­دەگى گااگا كونفەرەنتسيياسىنىڭ جارعىسىن راتيفيكاتسييالاۋ تۋرالى زاڭ جوباسىن قاراۋ ۇسىنىلادى. بۇل جارعىنى راتيفيكاتسييالاۋ قازاقستانعا گااگا كونفەرەنتسيياسىنا مۇشە بولۋعا مۇم­كىندىك بەرەدى, ال بۇل ەلىمىزدىڭ قۇقىق­تىق جۇيەسىن جالپى تانىعان الەمدىك ستان­دارتتار نەگىزىندە ارى قاراي دامىتۋعا, قازاقستاندىق ازاماتتاردىڭ قۇقىقتارى مەن مۇددەلەرىن قورعاۋ تيىمدىلىگىن ارت­تىرۋعا سەپتەسەدى.
الداعى جالپى وتىرىستىڭ كۇن تارتى­بىنە سايكەس, ماجىلىس دەپۋتاتتارى پالا­تاعا كەلىپ تۇسكەن جاڭا زاڭ جوبالارىن جۇمىسقا قابىلداپ, ولار بويىنشا قورى­تىن­دى ازىرلەۋلەرى ۇشىن بەيىندى كومي­تەت­تەرگە مەرزىمدەر بەلگىلەيدى دەپ كۇتىلۋدە.
بۇل جاڭا زاڭ جوبالارى اراسىندا «قازاقستان رەسپۋبليكاسىنىڭ كەيبىر كونستي­تۋتسييالىق زاڭدارىنا مەملەكەتتىك بيلىكتىڭ تارماقتارى اراسىندا وكىلەت­تىكتەردى قايتا بولۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» كونستيتۋتسييالىق زاڭى جانە تۇزەتۋلەر بار. بۇعان دەيىن ەل پارلامەنتى تىكەلەي كونستيتۋتسيياعا تۇزەتۋلەر ەنگىزەتىن زاڭدى قابىلداپ, ول ەلباسى قول قويعاننان كەيىن جاقىندا كۇشىنە ەنگەن. ەندى دەپۋتاتتىق كورپۋس اتا زاڭدى وزگەرت­پەي, ۇكىمەتتىڭ جانە بيلىكتىڭ باسقا دا تارماقتارى مەن ورگاندارىنىڭ وكىلەتتىك-قۇزىرەتىن كۇشەيتەتىن كونس­تيتۋتسييالىق زاڭ جوباسىن قارايتىن بولادى. جاڭا زاڭ جوبالارى قاتارىندا جەر قاتىناستارىن رەتتەۋگە قاتىستى ماسەلەلەر بويىنشا زاڭنامالىق تۇزەتۋلەر دە بار.
ەرىك ەردەنوۆ

بولىسۋ:

پىكىر جازۋ


*