پرەزيدەنت ناۋرىز مەيرامىمەن قۇتتىقتادى

1505
0
بولىسۋ:

ەلباسى ناۋرىز مەيرامىنا ارنالعان ىس-شاراعا قاتىستى.
مەملەكەت باسشىسى «سارىارقا» ۆەلوترەگىندە وتكەن ىس-شاراعا قاتىسۋشىلارعا ارناعان سوزىندە بارلىق قازاقستاندىقتاردى ناۋرىز مەيرامىمەن قۇتتىقتاپ, وتانداستارىمىز بۇل مەرەكەنى تۋىستارىمەن جانە دوستارىمەن بىرگە قارسى الۋدى داستۇرگە اينالدىرعانىن اتاپ وتتى.
قازاقستان پرەزيدەنتى مىڭجىلدىق تاريحى بار ناۋرىز ەلدىڭ ەڭ جاقسى كورەتىن جانە اسىعا كۇتەتىن مەيرامى ەكەنىن, ول ادامنىڭ ۇلتى مەن دىني ۇستانىمىنا قاراماي تويلانىپ كەلە جاتقانىن ايتتى.
سونىمەن قاتار, نۇرسۇلتان نازارباەۆ ناۋرىز سەنىمنىڭ, دوستىق پەن باۋىرلاستىقتىڭ, ەل تۇراقتىلىعىنىڭ نىشانى ەكەنىنە نازار اۋداردى.
– بيىل بىز ناۋرىزدى ەرەكشە كوڭىل-كۇيمەن قارسى الىپ وتىرمىز. قازاقستان ەلەۋلى جاڭارۋ باعىتىنا بەت بۇردى. مەن ۇشىنشى جاڭعىرۋ باعدارلاماسىن جارييالادىم. ونىڭ اياسىندا ساياسي جانە ەكونوميكالىق جۇيەنى رەفورمالاۋ كوزدەلگەن. بىز كونستيتۋتسيياعا مەملەكەتتىك باسقارۋدى جەتىلدىرە تۇسەتىن ماڭىزدى تۇزەتۋلەر ەنگىزدىك. تاۋەلسىزدىگىمىزدىڭ كەپىلدىكتەرى نىعايتىلىپ, بىرلىك پەن تاتۋلىق بەكەم بولا تۇسەدى. بۇل بولاشاققا سەنىممەن قاراۋعا, قازىرگى الەمنىڭ دامۋى جولىنداعى سىن-قاتەرلەردى ەڭسەرۋگە مۇمكىندىك بەرەدى. قازاقستانداعى بارلىق وزگەرىستەردىڭ بىر عانا ماقساتى بار. ول – ار ۇيدە, ار وتباسىندا, ار شاڭىراقتا مولشىلىق پەن تۇراقتىلىقتىڭ بولۋى. ار ازامات وز ەلى ۇشىن الاڭسىز ەڭبەك ەتىپ, بالالارىن وسىرىپ, جاڭا كۇندى قۋانىشپەن قارسى الاتىنداي بولۋعا تيىس. بۇعان ەڭبەك ەتۋ ارقىلى قول جەتكىزىلەدى, وعان مەملەكەت مۇمكىندىك بەرىپ وتىر, – دەدى مەملەكەت باسشىسى.
قازاقستان پرەزيدەنتى ىس-شاراعا قاتىسۋشىلارعا ارناعان سوزىندە بۇكىل الەم بويىنشا جاڭارۋ نىشانىن تانىتىپ, ادامداردىڭ وزارا ىنتىماعىن جانە تابيعاتپەن تۇتاستىعىن كورسەتەتىن كوكتەمگى كۇن مەن تۇننىڭ تەڭەلەر شاعىنىڭ ايرىقشا ماڭىزدىلىعىن اتاپ وتتى.
– بۇل كۇندەر حالىقتى قۋانىشقا بولەيدى. مەرەكە كۇندەرى جۇرت بىر-بىرىنە قوناققا بارىپ, بۇرىنعى وكپە-رەنىشتەرىن كەشىرىسەدى, بىر-بىرىنە يگىلىك پەن باق-بەرەكە تىلەيدى. ناۋرىز مەيىرىمدىلىك پەن وزارا كومەك سيياقتى ماڭگىلىك قۇندىلىقتاردى ەسكە سالىپ تۇرادى, – دەدى نۇرسۇلتان نازارباەۆ.
سوڭىندا مەملەكەت باسشىسى جۇرتشىلىقتى ناۋرىز مەيرامىمەن تاعى دا قۇتتىقتاپ, باقىت پەن جاقسىلىق تىلەپ, وسىپ-وركەندەۋىنە نيەتتەستىك بىلدىردى.
سونداي-اق, ەلباسى «حان شاتىر» ويىن-ساۋىق ورتالىعى ماڭىنداعى ەتنواۋىلعا باردى. وندا ۇلتتىق بۇيىمدار كورمەسى مەن سپورت سايىستارى ۇيىمداستىرىلدى.
ەركىن قالدان

بولىسۋ:

پىكىر جازۋ


*