ەندى كونستيتۋتسييالىق باقىلاۋ جۇيەسى نىعايا تۇسەدى

1755
0
بولىسۋ:

پارلامەنت دەپۋتاتتارى الدىندا سويلەگەن سوزىندە ەلباسى قازاقستان كونستيتۋتسيياسىنا وزگەرىستەر ەنگىزۋ ارقىلى جۇزەگە اسىرىلاتىن ساياسي رەفورمالاردىڭ باستى فاكتورلارى مەن اسپەكتىلەرىن اتاپ وتتى.
نۇرسۇلتان نازارباەۆ ەلىمىزدىڭ نەگىزگى زاڭىنا ەنگىزۋ ۇسىنىلعان وزگەرىستەر جوباسىن ازىرلەۋ ۇدەرىسىنە ارنايى توقتالىپ, ونى تالقىلاۋ بارىسىندا جارييالىلىق قامتاماسىز ەتىلگەنىن ايتتى.
مەنىڭ جارلىعىممەن ازىرلەنگەن كونستيتۋتسييالىق رەفورمالار جوباسى بىر اي بويى وتكەن بۇكىلحالىقتىق قىزۋ تالقىلاۋعا سالىندى. ار ادام ۇسىنىس بەرۋ قۇقىعىنا يە بولدى. بارىمىز زاڭ جوباسىن جاپپاي تالقىلاپ قانا قويماي, ونىڭ ساپالى بولعانىن كورىپ وتىردىق, دەدى قازاقستان پرەزيدەنتى.
سونداي-اق, مەملەكەت باسشىسى جۇمىس توبى اتقارعان جۇمىستىڭ قورىتىندىسىنا توقتالىپ, كونستيتۋتسييانىڭ 26-بابىنا قاتىستى وزگەرىستەردى حالىقتىڭ كەي بولىگىنىڭ ارقالاي تۇسىنگەنىن ايتتى.
جۇمىس توبىنا كونستيتۋتسييا باپتارىنىڭ ۇشتەن ەكىسىن جانە ونىڭ بارلىق بولىمىن قامتيتىن 6 مىڭ ۇسىنىس كەلىپ تۇستى. بۇكىل كونستيتۋتسييالىق رەفورما قوعامىمىزدى بىرىكتىرە تۇسۋگە باعىتتالادى. سوندىقتان مەن 26-باپتى بۇرىنعى رەداكتسييادا قالدىرۋدى ۇسىنامىن. جالپىۇلتتىق تالقىلاۋدان وتكەنىن ەسكەرىپ, زاڭ جوباسىن قازاقستان حالقىنىڭ ورتاق ۇستانىمى دەپ بايىپتاۋعا بولادى. جۇرت وز سوزىن ايتىپ, سول ارقىلى مەملەكەتتىك بيلىكتىڭ جاڭعىرۋىن قولدادى, دەدى نۇرسۇلتان نازارباەۆ.
ەلباسى قازىرگى رەفورمالاردىڭ ەرەكشەلىگىن اتاپ وتىپ, ەلدى ساياسي جاڭعىرتۋدىڭ جەكەلەگەن كەزەڭدەرىنە نازار اۋداردى.
بىرىنشىدەن, جاڭا زاڭ پارلامەنتتىڭ مەملەكەتتىك ىستەگى, سونىڭ ىشىندە ۇكىمەتتى جاساقتاۋداعى رولىن ايتارلىقتاي كۇشەيتەدى. ەكىنشىدەن, ەكونوميكانى تىكەلەي باسقارۋ جونىندەگى وكىلەتتىكتەر بەرىلەتىن ۇكىمەتتىڭ دەربەستىگى ارتادى. ۇشىنشىدەن, قۇقىق قورعاۋ جانە سوت جۇيەسىنىڭ كونستيتۋتسييالىق نەگىزى جاڭعىرتىلادى. زاڭداردىڭ ساقتالۋىن جوعارى دەڭگەيدە باقىلاۋ, سوتتا مەملەكەت مۇددەسىن قورعاۋ جايىن قاراستىراتىن پروكۋراتۋرا قىزمەتىنىڭ بازالىق نەگىزدەرى قالانادى. تورتىنشىدەن, كونستيتۋتسييالىق باقىلاۋ جۇيەسى نىعايا تۇسەدى. بەسىنشىدەن, تاۋەلسىزدىگىمىزدىڭ, بىرتۇتاستىعىمىزدىڭ, اۋماقتىق تۇتاستىق پەن باسقارۋ نىسانىنىڭ وزگەرمەيتىنىنە كونستيتۋتسييالىق دەڭگەيدە بەرىلەتىن كەپىلدىك بەكەمدەنە تۇسەدى, دەدى ەلباسى.
مەملەكەت باسشىسى بيلىكتىڭ بارلىق تارماعىنىڭ جوعارى كاسىبيلىگىن, ولاردىڭ وزىنە جاۋاپكەرشىلىك الىپ, شەشىم قابىلداي الاتىن قابىلەتىن اتاپ وتتى.
بۇدان بولەك, قازاقستان پرەزيدەنتى پرەزيدەنتتىك باسقارۋ نىسانىنىڭ ساقتالاتىنىن, مەملەكەت پەن قوعامدى ودان ارى جاڭعىرتۋ ۇشىن ساياسي جاعدايلار جاساۋ ماقساتىمەن جۇرگىزىلىپ جاتقان رەفورمالار باعىتىنىڭ وزگەرمەيتىنىن مالىمدەدى.
جولداۋدا ايتىلعان جاڭا مىندەتتەر زاڭ شىعارۋشى جانە اتقارۋشى ورگاندارعا ايرىقشا جاۋاپكەرشىلىك جۇكتەيدى. پارلامەنت پەن ۇكىمەتتىڭ وكىلەتتىكتەرىن كەڭەيتۋ ەل ەكونوميكاسىنىڭ ۇشىنشى جاڭعىرۋىنىڭ ماقساتتارىنا تيىمدىرەك قول جەتكىزۋگە سەپتىگىن تيگىزەتىن بولادى, دەدى نۇرسۇلتان نازارباەۆ.
سوڭىندا ەلباسى پارلامەنت دەپۋتاتتارى الدىندا زاڭ جوباسىن بەلگىلەنگەن بارلىق ۇدەرىستەردى ساقتاي وتىرىپ قاراستىرۋ جونىندە ۇسىنىس بىلدىردى.
مەملەكەت باسشىسىنان كەيىن سوز العان پرەزيدەنت اكىمشىلىگىنىڭ باسشىسى مەملەكەتتىك بيلىك تارماقتارى اراسىندا وكىلەتتىكتەردى قايتا بولۋ ماسەلەلەرى جونىندەگى جۇمىس توبىنىڭ جەتەكشىسى ادىلبەك جاقسىبەكوۆ ۇسىنىلىپ وتىرعان وزگەرىستەردىڭ ناقتى جوباسىن پارلامەنت دەپۋتاتتارىنا تانىستىردى.
بەرىك بەيسەنۇلى

بولىسۋ:

پىكىر جازۋ


*