كوپبالالى اناعا قۇرمەت ارتادى

1589
0
بولىسۋ:

بيىلعى جىلى قازاقستاندا زەينەتاقى, جاردەماقى جانە باسقا دا تولەماقىلار كوتەرىلىپ, حالىقتىڭ از قامتىلعان بولىگىن قورعاۋ كۇشەيتىلەدى. بۇل تۋرالى كەشە ازاماتتاردى الەۋمەتتىك قامسىزداندىرۋ ماسەلەسىنە ارنالعان قوعامدىق تىڭداۋدا جارييا ەتىلدى. وندا ەلباسىنىڭ «قازاقستاننىڭ ۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىن ىسكە اسىرۋ ماقساتىندا ازىرلەنگەن جاڭا جوبا تالقىعا تارتىلدى. 

ىس-شاراعا پارلامەنت دەپۋتاتتارى, سونداي-اق مەم­لەكەتتىك ورگانداردىڭ, ۇلتتىق بانكتىڭ, «اتا­مە­كەن» كاسىپكەرلەر پالاتاسىنىڭ, كاسىپوداقتار فە­دەرا­تسيياسىنىڭ, قوعامدىق كەڭەستىڭ, ۇكىمەتتىك ەمەس ۇيىمداردىڭ, بجزق-نىڭ جانە باسقا دا ۇيىم­داردىڭ وكىلدەرى قاتىستى.
ەڭبەك جانە حالىقتى الەۋمەتتىك قورعاۋ مي­نيستر­لىگىنىڭ تۇسىندىرۋىنشە, «كەيبىر زاڭنامالىق اك­تىلەرگە الەۋمەتتىك قامسىزداندىرۋ ماسەلەلەرى بويىن­شا وزگەرىستەر مەن تولىقتىرۋلار ەنگىزۋ تۋ­رالى» جاڭا زاڭنىڭ جوباسى قابىل­دانعان جاع­داي­دا قۇقىقتىق جانە الەۋمەتتىك-ەكونوميكالىق تەرىس سال­دارعا اكەلمەيدى. قايتا ەلگە اكەلەر يگىلىگى كوپ: ول بويىنشا قازىرگى قيىن شاقتا قوعامنىڭ وسال بو­لى­گى كۇيزەلىسپەن جالعىز قال­دىرىلماي, بيۋد­جەت­تەن قوسىمشا قولداۋ كورەدى.
ەڭبەك جانە حالىقتى الەۋمەتتىك قورعاۋ ۆيتسە-مي­نيسترى س.جاقىپوۆا «وسى زاڭ جوباسى بويىنشا 2017 جىلعى 1 شىلدەدەن باستاپ زەينەتاقىلاردىڭ مول­شەرىن 2016 جىلعىمەن سالىستىرعاندا 20%-عا دەيىن ارتتىرۋ كوزدەلىپ وتىرعانىن» حابارلادى.
– سونىمەن بىرگە, بيىل 1 شىلدەدەن باستاپ بالا تۋ­عان­دا بەرىلەتىن بىر رەتتىك جاردەماقىنىڭ كو­لە­مىن 20%-عا وسىرۋ قاراستىرىلعان. سونداي-اق جوبا بويىنشا كۇردەلى كەزەڭدە اۋىرتپالىق تۇسىرمەۋ ۇشىن جۇمىس بەرۋشىنىڭ وز قىزمەتكەرلەرىنە 5%-دىق مىن­دەتتى زەينەتاقى جارنالارىن ەنگىزۋدىڭ بۇرىن بەل­گىلەنگەن مەرزىمى 2018 جىلدان 2020 جىلعا اۋىس­تىرىلادى, – دەدى مينيستردىڭ ورىنباسارى.
ول مەملەكەت باسشىسىنىڭ تاپ­سىرماسى بويىن­شا 2017-2018 جىلدارى رەس­پۋبليكالىق بيۋدجەتتەن تو­لەنەتىن زەينەت­اقىلاردىڭ مولشەرى كەزەڭ-كەزەڭى­مەن ارتتىرىلاتىنىن ايتا كەلە, ەگجەي-تەگ­جەيىنە توق­تالدى.

– ىنتىماقتى زەينەتاقىنىڭ مول­شەرى جىل باسىنان 9%-عا ارتتىرىلعانىن ەسكەرە وتىرىپ, تاعى 11%-عا ارت­تى­رىلاتىن بولادى. بازالىق زەينەتاقىنىڭ مولشەرى, جىل باسىنان 7%-عا ارت­تىرىلعانىن ەسكەرە وتىرىپ, تاعى 13%-عا ارتتىرىلادى. ناتيجەسىندە, ەل­باسىنىڭ 2017 جىلعى 1 قاڭتاردان باستاپ زەينەتاقىنىڭ مولشەرىن 2016 جىلعى مولشەرىمەن سالىستىرعاندا, 20 پايىزعا دەيىن ارتتىرۋ تاپسىرماسىنىڭ ورىن­دالۋىن قامتاماسىز ەتەمىز. زەي­نەتاقىنىڭ وسۋى بارلىق زەينەتكەرلەردى نەمەسە 2 ميلليوننان استام ادامدى قامتيدى, – دەدى سۆەتلانا جاقىپوۆا.
ونىڭ مالىمەتىنشە, وسى وسۋلەردى ەسەپكە الساق, قازاقستاندا ەڭ تومەنگى زەينەتاقى مولشەرى (بازالىق زەينەتاقىنى قوسقاندا) 2016 جىلعى 37 789 تەڭگەدەن 2017 جىلعى 1 شىلدەدەن باستاپ 45 711 تەڭگەگە دەيىن ۇلعايادى. ياعني, 45,7 مىڭ تەڭگەدەن از الاتىن زەينەتكەر بولماۋعا تيىس. زەينەتاقىنىڭ ورتاشا مولشەرى (بازالىق زەينەتاقىنى قوسا ەسەپتەگەندە) 55 117 تەڭگەدەن 66 676 تەڭگەگە دەيىن ارتادى.
مۇنىڭ سىرتىندا بالا تۋۋىنا بايلا­نىستى تولەنەتىن بiرجولعى مەملەكەتتىك جاردەماقىنىڭ مولشەرى جىل باسىندا 7%-عا ارتتىرىلىپتى, ال 2017 جىلعى 1 شىل­دەدەن باستاپ تاعى 20%-عا ارتپاق.
– 2016 جىلمەن سالىستىرعاندا, بيىل بۇل جاردەماقى وسىمى 27%-دى قۇرايدى. ەگەر 2016 جىلى بالا تۋۋىنا بايلانىستى تولەنەتىن بiرجولعى مەم­لەكەتتىك جاردەماقى بىرىنشى, ەكىنشى, ۇشىنشى بالاعا 66 621 تەڭگە بولسا, 2017 جىلعى 1 قاڭتاردان باستاپ, ول 71 270 تەڭگەنى, ال وسى جىلعى 1 شىلدەدەن باستاپ, 86 222 تەڭگەنى قۇرايتىن بولادى, – دەدى ۆيتسە-مينيستر.
مەملەكەت كوپبالالى وتباسىلاردى قۇندىلىق كورىپ, قورعاۋدى جاقسارتا تۇسۋگە جول اشىپ وتىر.
«تورتىنشى جانە ودان كەيىنگى با­لا­لارىن تۋعان انالارعا مەملەكەت بۇعان دەيىن 111 035 تەڭگە كولەمىندە بىر رەتتىك مەملەكەتتىك جاردەماقى تولەپ كەلسە, ەندى 2017 جىلعى 1 قاڭتاردان باستاپ, ونىڭ مولشەرى 118 مىڭ تەڭگەگە دەيىن جو­عا­رى­لادى. 1 شىلدەدەن باستاپ, بۇل جاردەماقى 142 947 تەڭگەگە جەتكىزىلەدى» دەدى سۆەتلانا جاقىپوۆا.
ەڭبەك جانە حالىقتى الەۋمەتتىك قورعاۋ مينيسترلىگىنىڭ دەرەگىنشە, زەينەتاقىنى جانە جاردەماقىنى ارتتىرۋ ۇشىن رەس­پۋبليكالىق بيۋدجەتتەن 81,6 ميلليارد تەڭگە بولىنۋدە.

ەلدوس سەنباي

بولىسۋ:

پىكىر جازۋ


*