ۇكىمەت جولداۋدى جۇزەگە اسىرۋعا كىرىستى

1971
0
بولىسۋ:

ەلباسىنىڭ «قازاقستاننىڭ ۇشىنشى جاڭعىرۋى: جاھاندىق باسەكەگە قابىلەتتىلىك» اتتى قازاقستان حالقىنا جولداۋىن جۇزەگە اسىرۋعا ەل ۇكىمەتى جەدەل دەن قويدى. كەشە
ب.ساعىنتاەۆتىڭ توراعالىعىمەن وتكەن ۇكىمەت وتىرىسىندا قازاقستان پرەزيدەنتىنىڭ جولداۋدا بەلگىلەگەن تاپسىرمالارىنا دەربەس جاۋاپ بەرەتىن تۇلعالار ناقتى انىقتالدى.

– جولداۋدى ىسكە اسىرۋعا بۇگىننەن باستاپ كىرىسۋىمىز قاجەت, – دەدى پرەمەر ب.ساعىنتاەۆ. – پرەزيدەنت قازاقستاننىڭ ۇشىنشى جاڭعىرۋى بويىنشا كەڭ اۋقىمدى مىندەت قويدى. ونى ىسكە اسىرۋ ۇشىن قازىرگى كۇردەلى ۋاقىتتا ەلىمىزدىڭ باسەكەگە قابىلەتتىلىگىن قامتاماسىز ەتەتىن «ەكونو­ميكالىق وسىمنىڭ جاڭا مودەلىن» قۇرۋ تالاپ ەتىلەدى. بۇگىندە تيىستى جالپىۇلتتىق جوسپار دايىندالىپ جاتىر. وعان دەيىن مەن جولداۋدىڭ نەگىزگى باسىمدىقتارىنا توقتالىپ, مەملەكەتتىك ورگاندارعا بىرقاتار تاپسىرمالار بەرەمىن.
ۇكىمەت جەتەكشىسى ەلباسىنىڭ 5 نەگىزگى باسىمدىقتى بەلگىلەگەنىنە نازار اۋدارت­تى. ونىڭ بىرى – ەكونوميكانىڭ جەدەل­دەتىلگەن تەحنولوگييالىق جاڭعىرتىلۋى. مۇنداعى باستى ماقسات – تسيفرلى تەح­نولوگييالاردى قولدانا وتىرىپ, داستۇرلى سەكتورلارمەن جانە قىزمەتتەر سالالا­رىمەن ۇيلەسىمدە داميتىن جاڭا يندۋس­ترييالاردى قۇرۋ.
«بۇل جەردە اڭگىمە 3D-پرينتينگ, ونلاين-ساۋدا, موبيلدى بانكينگ, ونەر­كاسىپتىك ينتەرنەت, كاسىبي قىزمەت كور­سەتۋلەردەگى تسيفرلىق سەرۆيستەر جانە باسقا دا پەرسپەكتيۆتى سالالاردى دامىتۋ تۋرالى بولىپ وتىر. جاڭا تەحنولوگييا­لاردىڭ بيزنەس-مودەلدەرگە تەز تاراۋى قازىردەن-اق وسى سالالاردى رەتتەۋ بويىن­شا جاڭا تالاپتار قويۋدا. وسى ماقساتتا پرەزيدەنت ۇكىمەتكە «تسيفرلىق قازاق­ستان» جەكە باعدارلاماسىن ازىرلەۋدى جانە ۇلتتىق زاڭنامانى ىت-تەحنولوگييالاردىڭ دامۋىن ىنتالاندىرۋ ىسىنە بەيىمدەۋدى تاپسىردى» دەگەن باقىتجان ساعىنتاەۆ اقپارات جانە كوممۋنيكاتسييالار مي­نيسترلىگىن, مۇددەلى مەمورگاندارمەن تىزە قوسا وتىرىپ, وسى باعدارلامانى جانە زاڭنامالىق تۇزە­تۋلەردى ازىرلەۋ جۇمىس­تارىن جەدەلدەتۋگە مىندەتتەدى.
سونىمەن بىرگە, ۇكىمەت باسشىسى اۋىلداردا جوعارى جىلدامدىقتى ينتەرنەت بولۋى ۇشىن ولاردى 2020 جىلعا دەيىن تالشىقتى-وپتيكالىق جەلىلەرگە قوسۋدى ەرەكشە باقىلاۋعا الۋ قاجەتتىگىن مالىمدەدى.
پرەمەر-مينيستر يننوۆاتسييالاردى جانە ولاردى وندىرىسكە جىلدامداتىپ ەنگىزۋ ىسىن قولداۋ ۇشىن «ەكسپو – 2017» ينفرا­قۇرىلىمدىق بازاسىندا IT-ستارتاپ­تار­دىڭ حالىقارالىق تەحنوپاركى قۇرى­لاتىنىن حابارلادى. وسىعان باي­لانىستى اقپارات جانە كوممۋنيكاتسييالار, ۇلتتىق ەكونوميكا, قارجى مينيستر­لىكتەرىنە وسى تەحنوپاركتى قۇرۋ, سالىقتىق جەڭىلدىكتەر, جەڭىلدەتىلگەن ۆيزالىق جانە ەڭبەك رە­جيمى تۇرىندە زاڭنامالىق قولداۋ ماسە­لەلەرىن پىسىقتاۋ تۋرالى تاپسىرما بەردى.
جوعارى وقۋ ورىندارى, نازارباەۆ ۋنيۆەرسيتەتى جانە «الاتاۋ» يننوۆاتسييا­لىق تەحنولوگييالار پاركى بازاسىندا وتاندىق عىلىمي جانە يننوۆاتسييالىق الەۋەتتى دامىتۋ ۇشىن قاجەتتى شارالار قابىلداۋ بىلىم جانە عىلىم مينيسترلىگىنە جۇكتەلدى.
سونداي-اق پرەمەر-مينيستر قا­زاقستان ەكونوميكاسىنىڭ نەگىزگى سەك­تورلارىن, اتاپ ايتقاندا, لوگيستيكالىق ينفراقۇرىلىمدى, تاۋ-كەن مەتاللۋرگييا جانە اگروونەركاسىپتىك كەشەندەردى ودان ارى دامىتۋعا قاتىستى بىرقاتار تاپسىر­مالار بەردى.
باقىتجان ساعىنتاەۆ تاۋ-كەن مەتال­لۋرگييا جانە مۇناي-گاز كەشەندەرىن ارى قاراي دامىتۋ ۇشىن وتاندىق ونىمدەردى جەتكىزۋ گەوگرافيياسىن كەڭەيتۋ, گەولو­گييالىق بارلاۋ جۇمىستارىن بەلسەندى دامىتۋ قاجەت ەكەنىن اتاپ وتتى. وسىعان وراي ەنەرگەتيكا مينيسترلىگىنە جىل سوڭىنا دەيىن جاڭا جەر قويناۋى تۋرالى كودەكستىڭ جانە سالىق زاڭناماسىنا قاجەتتى تۇزەتۋلەردىڭ قابىلدانۋىن قامتاماسىز ەتۋ تاپسىرىلدى.
بۇعان قوسا, ب.ساعىنتاەۆ مەملەكەت باسشىسىنىڭ تاپسىرماسىنا سايكەس, وتاندىق اۋىل شارۋاشىلىعى قازاقستان ەكونوميكاسىنىڭ درايۆەرىنە اينالۋعا تيىس ەكەنىنە نازار اۋدارتتى.
– بىز ەكولوگييالىق تازا ازىق-تۇلىك ونىمدەرىن شىعارۋ ارقىلى الەمدىك نارىق­تارىندا وز ورنىمىزدى يەلەنە الامىز. Made in Kazakhstan برەندىنىڭ وزى ەكولوگييالىق تازا ونىممەن بايلانىس­تىرىلۋى كەرەك. بىز سۋبسيدييالاردى بولۋ جانە جەكە قوسالقى شارۋاشىلىقتاردىڭ الەۋەتىن پايدالانا وتىرىپ, كووپەراتيۆ قۇرۋدىڭ, سونىمەن قاتار ەڭبەك ونىمدىلىگىن ارتتىرۋدىڭ جاڭا قاعيدالارى بويىنشا تاسىلدەردى ەندىگى تۇزدىك. وسى بارلىق مىندەتتەر كەشەنى اوك-تى دامىتۋدىڭ جاڭا مەملەكەتتىك باعدارلاماسى اياسىندا ىسكە اسىرىلۋعا تيىس, – دەدى باقىتجان ابدىرۇلى.
ول ەلباسىنىڭ جاڭا ەۋرازييالىق لوگيستيكالىق ينفراقۇرىلىمدى دامىتۋ تۋرالى مىندەت قويعانىن ەسكەرتتى: «بۇل ۇشىن بىز جۇك تاسىمالىنا ەركىندىكتى قام­تاماسىز ەتۋىمىز, كولىك دالىزدەرىن قۇرىپ, جاڭعىرتۋىمىز قاجەت, بۇل بىزدىڭ ازييا مەن ەۋروپا اراسىنداعى ترانسكونتينەنتتىك قۇرلىقتىق حابقا اينالۋىمىزعا مۇمكىن­دىك بەرەدى. ناتيجەسىندە 2020 جىلعا قاراي كونتەينەرلىك جۇكتەردىڭ ترانزيتتىك تا­سىمالى كولەمىن 7 ەسەگە, ترانزيتتىك جو­لاۋشىلار تاسىمالىنىڭ كولەمىن 4 ەسەگە ارتتىرۋعا تيىسپىز» دەگەن ب.ساعىنتاەۆ ينۆەستيتسييالار جانە دامۋ, سىرتقى ىستەر, ۇلتتىق ەكونوميكا مينيسترلىكتەرىنە قويىلعان مىندەتتەردى شەشۋ ۇشىن قاجەتتى شارالاردى قابىلداۋعا تاپسىرما بەردى.
وتىرىستا ەل ۇكىمەتىنىڭ بارلىق مەملەكەتتىك ورگانداردىڭ بيۋد­جەتتىك شىعىندارىنىڭ تيىمدىلىگىنە تالداۋ جۇرگىزەتىنى حابارلاندى. «جۇر­گىزىلگەن جۇمىستاردىڭ قورىتىندىلارى بويىنشا بىز قارجىنى تيىمسىز باعدار­لا­ما­لاردان ۇشىنشى جاڭعىرتۋدىڭ مىن­دەتتەرىن جۇزەگە اسىرۋدى قامتاماسىز ەتەتىن جاڭا باستامالارعا قايتا بولۋ تۋرالى شەشىم قابىلدايتىن بولامىز» دەدى پرەمەر-مينيستر.
ۇكىمەت وتىرىسىندا باقىتجان ساعىن­تاەۆ وزىنىڭ بارلىق ورىنباسار­لارىنا جانە ۇكىمەت مۇشەلەرىنە پرەزي­دەنتتىڭ جولداۋىن ىسكە اسىرۋعا بايلا­نىستى ناقتى مىندەتتەر جۇكتەپ شىقتى.
تاعى بىر ايتا كەتەر جايت, مەملەكەت باسشىسى ۇكىمەتكە «بۇكىل ەلدى مەكەن­دەردەگى بارلىق بوس جۇمىس ورىندارى بويىنشا بىرىڭعاي ونلاين-پلاتفورما قالىپتاستىرۋدى» جۇكتەگەنى مالىم. وسى ورايدا «ەڭبەك رەسۋرستارىن دامىتۋ ورتالىعىنىڭ» پرەزيدەنتى داۋلەت ارعىن­دىقوۆتىڭ ايتۋىنشا, قازاقستانداعى جۇمىس ىزدەۋشىلەر مەن بوس جۇمىس ورىندارى تۋرالى ينتەرنەت كەڭىستىگىندەگى بارلىق دەرەكتەر enbek.kz پورتالىندا بىرىكتىرىلەتىن بولادى. ول اتالعان پور­تالدى مەملەكەتتىڭ 2013 جىلى قۇرعانىن جەتكىزدى.
پورتالدىڭ نەگىزگى مىندەتى – جۇمىس ىزدەۋدە جانە پەرسونالدى ىرىكتەۋدە كومەك كورسەتۋ. ەڭبەك جانە حالىقتى الەۋمەتتىك قورعاۋ مينيسترلىگى enbek.kz پورتالىندا كۇن سايىن بوس جۇمىس ورىن­دارى جانە ازاماتتاردىڭ تۇيىندەمەلەرى جارييا­لاناتىنىن, ول دەرەكتەر ارتۇرلى كوز­دەردەن جينالاتىنىن, اتاپ ايتقاندا, ولار پورتالدا تىركەۋدەن وتكەن جۇمىس بەرۋشىلەر جانە جۇمىس ىزدەۋشىلەردەن, جۇمىسپەن قامتۋ ورگاندارىنىڭ دەرەكتەر بازالارىنان, جەكە اگەنتتىكتەردەن جانە اقپارات قۇرالدارىنان الىناتىنىن ەسكە سالادى.
«جۇمىسپەن قامتۋ زاڭناماسىنا وزگەرىستەر پاكەتى ازىرلەندى. ول اعىمداعى جانە پەرسپەكتيۆتى بوس ورىندار تۋرالى اقپاراتتى ەnbek.kz پورتالى ارقىلى بەرۋگە مىندەتتەيدى. بۇل قاعازباستىلىقتى جويىپ, بيزنەس جۇمىسىن جەڭىلدەتۋگە مۇمكىندىك بەرەدى. تەك جۇمىسپەن قامتۋ ورتالىقتارى, نە جەكە اگەنتتىكتەر عانا ەمەس, سونداي-اق جۇمىس بەرۋشىلەر دە بوساعان جۇمىس ورىندارىنا قاجەتتى مامانداردى پورتال ارقىلى تابا الادى. بۇل ۇشىن ولارعا پورتالداعى «جەكە كابي­نەتتەرىندە» حابارلاندىرۋ ورنالاستىرۋ مۇمكىندىگى ۇسىنىلادى. بىز ەندىگى وسى پورتال عالامتورداعى جۇمىس نە جۇمىس ىزدەۋشىلەر تۋرالى مالىمەتتەردىڭ بار­لىعىن بىر جەرگە توپتاستىرۋى ۇشىن جۇمىس جاساۋدامىز» دەيدى د.ارعىندىقوۆ.
ەلدوس سەنباي

بولىسۋ:

پىكىر جازۋ


*