الاۋ – سپورتتاعى كۇش-قايرات نىشانى!

1863
0
بولىسۋ:

كەشە استانادا ەلباسىنىڭ قاتىسۋىمەن, الەمدىك دارەجەدەگى ايتۋلى دا, ابىرويلى سپورت سايىسى – XXVIII دۇنيەجۇزىلىك قىسقى ۋنيۆەرسيادانىڭ العاشقى الاۋىن جاعۋ سالتاناتى وتتى. جالپى, وسىنداي جاھاندىق جارىستى قازاقستاننىڭ وزىندە وتكىزۋى – ونىڭ حالىقارالىق بەدەلىنىڭ عانا ەمەس, سونداي-اق ەلدەگى بەيبىتشىلىك پەن بىرلىكتىڭ نىشانى بولىپ سانالادى. ايتپەسە, تۇراقسىزدىق جايلاپ, بەرەكەسى كەتكەن بولاشاعى بۇلىڭعىر ەلگە ەشبىر مەملەكەت وز سپورتشىسىن جىبەرمەس ەدى.

راسىمدە سوز سويلەگەن پرەزي­دەنت نۇرسۇلتان نازارباەۆ ۋني­ۆەرسيادانى «ەلىمىزدىڭ تاۋەلسىزدىگى تاريحىندا حالىقتىڭ بىرلىگىن ودان ارى نىعايتۋعا ىقپال ەتەتىن سپورت سا­لاسىنداعى ەڭ ىرى وقيعا» دەپ اتادى.
– بۇگىن بىز 29 قاڭتاردا ال­ماتىدا اشىلاتىن XXVIII جا­ھاندىق ۋنيۆەرسيادانىڭ الاۋىن جاققالى تۇرمىز. قازاقستاننىڭ جەڭىستەرى تاۋەلسىزدىك جىلدا­رىندا ەلەۋلى بولىپ, ەلىمىز ەڭ­سەلەنە تۇستى. دال وسىنداي اۋقىم­داعى جانە دەڭگەيدەگى الەمدىك سپورت سايىسىن قازاقستان بۇرىن-سوڭدى وتكىزىپ كورگەن ەمەس. ارى بۇل مەم­لەكەتتەردىڭ بارلىعىنىڭ بىردەي قولىنان كەلە بەرمەيدى. سوندىق­تان وزدەرىڭىز بىلەتىندەي, تاڭداۋ بىزدىڭ ەلىمىزگە تۇستى. مەن بۇل جا­رىستاردى ابىرويمەن وتكىزەتى­نىمىزگە بەك سەنىمدىمىن, ويتكەنى سوعان لايىقتى دايىن­دالدىق, – دەگەن ن.نازارباەۆ ەل نامىسىن قورعار ۇلتتىق قۇراما كوماندا­مىزدىڭ مۇشەلەرىنە قايىرىلدى.
«ەندى بۇل الاۋ رەسپۋبلي­كا­مىزدىڭ بارلىق وڭىرلەرىن ارا­لايدى. بۇل سىزدەر جانكۇيەرلەردىڭ كەڭ قولداۋىنا, ىزگى تىلەكتەرىنە يە بولۋلارىڭىز جانە سول ارقىلى ۇلكەن جەڭىستەرگە شابىتتانۋ­لارىڭىز ۇشىن جاسالىپ وتىر. كو­ماندامىزدىڭ 168 مۇشەسىنىڭ ارقايسىسى جەڭىستىڭ بيىك تۇعى­رىنا كوتەرىلۋگە لايىق. مەن سولاي بولادى دەپ سەنەمىن. بۇكىل قازاق­ستان سىزدەرگە جانكۇيەر بولادى. بۇكىل قازاقستان ستۋدەنت­تىك كو­ماندامىزدىڭ بيىكتەن كو­رى­نۋىن تىلەيدى!» دەدى ەلباسى.
مەملەكەت باسشىسى ۋنيۆەر­سيا­دانى وتكىزۋ بىرىنشىدەن, قا­زاقستاندىق جاستاردىڭ سپورتقا دە­گەن قىزىعۋشىلىعىن ارتتى­راتىنىن اتاپ وتتى. ەكىنشىدەن, جا­ھاندىق جارىس ۇشىن حا­لىقارا­لىق جوعارى ستاندارتتارعا جاۋاپ بەرەتىن زا­ماناۋي سپورت نىسان­دارى سالىن­دى. ونىڭ بارلىعى بولاشاق سپورت­­شىلاردى باۋلۋعا ۇلكەن كومەك.
– اتقارىلعان جۇمىستاردىڭ بارىن جاستار ۇشىن جاسادىق. ۋني­ۆەرسيادانىڭ الەۋمەتتىك ينفرا­قۇرىلىمى, سپورت نىساندارى بىزگە ۇزاق جىل بويى قىزمەت ەتە­تىن بو­لادى, – دەدى مەملەكەت باس­شىسى.
ۇشىنشىدەن, قازاقستان ۋني­ۆەر­سيادانى وتكىزگەن ساناۋلى, تاڭ­داۋلى ەلدەردىڭ قاتارىنا قوسىلادى, بۇل ەلىمىزدىڭ تانى­مال­دى­لىعىن ارتتىرا تۇسۋگە تيىس.
نۇرسۇلتان نازارباەۆ 2017 جىلعى ۋنيۆەرسيادا شىن ما­نىندە, بۇكىلحالىقتىق مەرەكەگە اينالا­تىنىنا سەنىم بىلدىردى. سوز سوڭىن­دا ەلباسى سپورت­شى­لارعا ال­داعى جارىستاردا تابىس جانە جارقىن جەڭىستەر تىلەدى: «ارالارىڭىزدان اتى بۇكىل الەمگە تارايتىن تانى­مال سپورت­شىلار شىعادى جانە ەلىمىزدىڭ ماقتانىشىنا اينالادى دەپ ۇمىتتەنەمىن!» دەدى نۇرسۇلتان نازارباەۆ.
وسىدان كەيىن پرەزيدەنت «وت ۇياسىنداعى» ۋنيۆەرسيادا الاۋىن جاعىپ, ەستافەتانى استانادان باس­تاپ بەردى.

ايحان شارىپ

بولىسۋ:

پىكىر جازۋ


*