سيرييا قاقتىعىسىن شەشۋدەگى قوسىمشا مۇمكىندىك

2120
0
بولىسۋ:
نۇرسۇلتان نازارباەۆ ستاففان دە ميستۋرامەن كەزدەستى

قازاقستان پرەزيدەنتى نۇرسۇلتان نازارباەۆ بۇۇ باس حاتشىسىنىڭ سيرييا بويىنشا ارناۋلى ەلشىسى  ستاففان دە ميستۋرامەن كەزدەستى.

كەزدەسۋ بارىسىندا تاراپتار سيريياداعى قاقتىعىستى رەتتەۋ جونىندەگى الداعى كەلىسسوزدەر ماسەلەسىن تالقىلادى.

مەملەكەت باسشىسى استانانىڭ كەلىسسوزدەر وتكىزۋگە دايىن ەكەنىن ايتىپ, بارلىق قاتىسۋشىلار ۇشىن جاعداي جاسالعانىن اتاپ وتتى.

– مەن رەسەي, تۇركييا جانە يران پرەزيدەنتتەرىنىڭ استانادا كەلىسسوزدەر وتكىزۋ جونىندەگى ۇسىنىسىن قابىل الدىم. بىز كەزدەسۋدىڭ جەمىستى وتكەنىن قالايمىز. قازاقستان كەزدەسۋگە قاتىساتىن تاراپتاردىڭ بارىمەن تەڭ ارى سەنىمدى قارىم-قاتىناستا بولعاندىقتان, كەلىسسوزدەر قالىپتى وتۋ ۇشىن بارلىق جاعداي جاسالادى دەپ ويلايمىن, – دەدى قازاقستان پرەزيدەنتى.

نۇرسۇلتان نازارباەۆ سيرييا ماسەلەسى بۇگىندە تاياۋ شىعىستى عانا ەمەس, بۇكىل الەمدىك قاۋىمداستىقتى الاڭداتىپ وتىرعانىن اتاپ وتتى.

– تاراپتار دا بولىپ جاتقان وقيعالارعا بىز سيياقتى الاڭداۋشىلىقپەن قاراپ وتىر دەپ ۇمىتتەنەمىن. ساراپشىلاردىڭ ايتۋىنشا, قاقتىعىس باستالعالى 300 مىڭنان استام ادام قازا تاپقان. وسىنىڭ بارى بىزدى بۇل ماسەلەنى بەيبىت جولمەن عانا شەشۋگە ۇمىتتەنۋگە جەتەلەيدى, – دەدى مەملەكەت باسشىسى.

قازاقستان پرەزيدەنتى بۇۇ-نىڭ ارناۋلى ەلشىسىنە استاناداعى كەزدەسۋ جەنەۆاداعى بەيبىت كەلىسسوزدەرگە دايىندىق بارىسىنا ەلەۋلى ىقپال ەتەتىنىن ايتتى.

ستاففان دە ميستۋرا نۇرسۇلتان نازارباەۆقا استانادا كەلىسسوزدەر وتكىزۋگە مۇمكىندىك بەرگەنى ۇشىن بۇۇ باس حاتشىسى انتونيۋ گۋتتەريشتىڭ اتىنان العىس بىلدىردى.

– سىزدىڭ ەلىڭىز حالىقارالىق ارەناداعى ەڭ كۇردەلى تۇيتكىلدەردى رەتتەۋ ىسىندە زور تاجىريبەسىن كورسەتىپ, ۇلگى بولىپ كەلەدى. قازاقستاننىڭ بىرىككەن ۇلتتار ۇيىمى قاۋىپسىزدىك كەڭەسىنە تۇراقتى ەمەس مۇشەلىگى سيرييا قاقتىعىسىن شەشۋدەگى قوسىمشا مۇمكىندىك بولىپ سانالادى, – دەدى ستاففان دە ميستۋرا.

كەزدەسۋ قورىتىندىسى بويىنشا تاراپتار قارۋلى قاقتىعىستى ودان ارى رەتتەۋ شارالارى جونىندە پىكىر الماستى.

بەرىك بەيسەنۇلى

بولىسۋ:

پىكىر جازۋ


*